Read Samo, Southern Ɛsit 2 Bible Online

Ɛsit 2 - Samo, Southern bible

Ɛsit 2

¹Bɛa siin lɛn kiɛ̃ kio, kii Zɛrzɛsi foo bɛ́ á basã, a yiri daa ka Vastii ni. Vastii sii mɛn zɛnaa, sii mɛn dɔ nə n yɔrɔ bɔ a wɔ paǹ li, Zɛrzɛsi yiri daa ka bɛ nɛ.

²Min mɛnɛn bɛ́ dí nyɛɛ kii lɛ giulun, bɛn nə́ tɔ́n pɛ: Ka ga nɛniɛ tenən mali kii lɛ wɔn lɛa, ǹ mɛnɛn nə́ ke ǹ tɔn giĩ dɔ̃ wa, ǹ nə́ siĩni a tɔ-a.

³Kii lɛ minin bɔ á ǹ koa a gána lɛ a bǎãn tumaa nɛ. Nɛniɛ tenən mɛnɛn bɛ́ ǹ tɔn giĩ dɔ̃ wa, ǹ nə́ siĩni a tɔ-a bɛa minin kɛn lɛn die ǹ nə ǹ tumaa sɔkɔn lɔn kion, Suuzu kiwi gole kɛ nɛ. Egee mɛn bɛ́ kii a kiodɛnaa lɛa, lɔn lɛduĩ, ǹ bɛa nɛlɔn lɛn sii wɔ bɛ gɔn. Lɔ ǹ nyɔɔn mɛnɛn bɛ́ min siĩn koe, ǹ die ǹ bɛn kɔ nɛniɛ tenən lɛn la.

⁴Nɛniɛ ten lɛ mɛn bɛ́ re kɔɔ̃n koe kii lɛ-a, bɛ n die kii a lɔ lɛ biɛ, Vastii bǎã nɛ. Bɛa boo lɛ kɔɔ̃n kɔ kii lɛ-a, a dɔ zɛnaa miɛ̃.

⁵Zuifun giĩ goon goã Suuzu kiwi gole lɛ nɛ, a tɔ n Mardoose, Yayiri a nɛ nɛ. A n Simei laanka Kiisi tɔrɔ lɛa, Bɛnzamɛn tɔrɔ goon ne.

⁶ *Baabilonii gána a kii Nebukadenezɔɔrɔ goã, á minin mɛnɛn goa Zeruzalɛmu kun ka Zudaa gána a kii Zozakimu ni, á woo ǹ ne, Mardoose lɛ dɔ goã kun ka bɛa minin lɛn nɛ.

⁷Mardoose na á goã á nɛnyaan kɔn too a tɔn Ɛsitɛɛrɛ[1]. Bɛa Hadaasa[2] lɛ na á goã Mardoose gɔn á n toe, a giala, ǹ di goã a tan wa, ǹ dan dɔ goã a tan wa. Mardoose lɛ dikoɛ goon a nɛlɔ nɛ. Ɛsitɛɛrɛ lɛ goã kiɛ yii ni, siĩni a tɔ-a.

⁸Ǹ bɛ́ ǹ nə́ kii a boo lɛ laanka a gɔn-waa lɛ a lɛ dia, ǹ nə́ nɛniɛ ten gigiã sɔkɔn Suuzu kiwi gole kɛ nɛ, ǹ nə́ ǹ sii wɔ Egee gɔn. Ǹ nə́ daa ka Ɛsitɛɛrɛ dɔ nɛ kii a piɛ, ǹ ná a sii wɔ lɔn-lɛduə̃li Egee lɛ gɔn.

⁹Nɛlɔ ten Ɛsitɛɛrɛ lɛ sii kɔɔ̃n kɔ Egee ganaa, a sii kaa a foo la. Egee nə́ n nanaa, lɔ ǹ nyɔɔn mɛnɛn bɛ́ min siĩn koe, á bɛn kɔ Ɛsitɛɛrɛ la ka Ɛsitɛɛrɛ a màn-bii ni. Ǹ nɛlɔ sɔbaa mɛn bɔ kii a piɛ, Egee bɛn dɔn kaa Ɛsitɛɛrɛ giulun. Bɛ kio, á Ɛsitɛɛrɛ bɔyaa kun ka bɛa nɛlɔn lɛn nɛ, á da lɔn kion kɛ a sonbore ne.

¹⁰Ɛsitɛɛrɛ nə n tɔrɔ pɛ wa, a n tɔrɔ basa dɔ pɛ wa. A giala Mardoose lɛ na á goã á n gɔn waa nɛ mà a baran bɛ kɔn pɛ wa.

¹¹Lɛawaa gogoonmaa, Mardoose na á goã n bibiĩ lɔn kion lɛ a sɔmɔ yɔrɔ-a, màn mɛn bɛ́ toɛ, a Ɛsitɛɛrɛ a giã ǹ gɔn dɔ̃, ǹ bɛ́ kuĩ lɔn a bɛ dɔ dɔ̃.

¹²Siin mɛnɛn zɛnaa pàã baa lɔn lɛn ganaa mui fulupaa gɔ́ɔ̃ nɛ, bɛ̀ nɛniɛ tenən lɛn mɛn bɛ zɛnaa á nya, wo kii Zɛrzɛsi li n doe a ganaa. Bɛa din kũ biikoo lɛ gɔ́ɔ̃ nɛ, sii lɛ na á goã n zɛnɛɛ kɛnɛn: *miíri nyɔɔ gìĩ kɔɔ̃n nɛ ǹ tá loe mui sɔrɔ, bɛ kio, lɔn lɔ ǹ nyɔɔn mɛnɛn bɛ́ gɔ̀nɔn bǐɛ̃ koe, min siĩn koe, bɛn manɛ ǹ tá ǹ loe mui sɔrɔ.

¹³Nɛlɔ ten goã woe kii lɛ li lɔn a din nə ka bɛ nɛ. Bɛ̀ nɛlɔ lɛ tá n toɛ lɔn kion lɛ nɛ, á n die woe kii a piɛ, bɛ̀ á nɔ̀n da màn woo màn li mà a n woe ne, maǹ koe la.

¹⁴Wasamiɛ̃nɛ, a n woe. Bɛa lɛawaa baayɛlɛ a nə n bɔyɛɛ a da lɔn kion kɔsɔ nɛ. Bɛa sii n Saasigaazi gɔn, kii a lɔn-lɛduə̃li lɛa. Bɛa nɛlɔ lɛ ba woe kii lɛ li doo wa, yǎa bɛ̀ a sii kii lɛ kũ, ǹ nə́ tɔ́n lɛ dia la.

¹⁵Woo bɛ́ á dɔ́ Ɛsitɛɛrɛ ganaa, Mardoose ǹ dikoɛ Abiayili a nɛlɔ lɛ, asɛ nɔ̀n da màn kɔn li wa. Bɛ̀ á n bɔ ka màn kɛ nɛ, Egee, kii a lɔn-lɛduə̃li kɛ goã á nyaa nɛ. Min mɛn yii tumaa goã Ɛsitɛɛrɛ yii, a sii na á goã kiɛ ǹ foo la.

¹⁶Kii Zɛrzɛsi a kiibaa lɛ a lɛ̀ sɔbaabaa ǹ wɔ, *Tevɛti mui mɛn nə́ ke, lɛ̀ a mui a fùbaa ǹ wɔ lɛa, bɛ gɔ́ɔ̃ nɛ, ǹ nə́ Ɛsitɛɛrɛ kũ ǹ nə́ woo ne kii lɛ li a piɛ.

¹⁷Yǎa kii lɛ tɔn Ɛsitɛɛrɛ narɛ á la lɔn lɛn tumaa nɛ. Ɛsitɛɛrɛ sii kɔɔ̃n kɔ a ganaa, á kaa a foo la á la nɛniɛ tenən lɛn tumaa wɔ nɛ. Kii lɛ tɔ́n kii bafolo wɔ Ɛsitɛɛrɛ mìi-a, á baa a lɔ lɛa Vastii bǎã nɛ.

¹⁸Bɛ kio, kii lɛ zɔ́n màn-bii gole zɛnaa, Ɛsitɛɛrɛ a zɔ́n màn-bii lɛa, á kɔ a kiodɛnan laanka a sɔraasin nyɛɛnaandɛnan tumaa la. Á nyin giɔ̀mɔ saraa toa ǹ nɛ, á bǐɛ̃ baa, kii a bǐɛ̃ tɔrɔ lɛa.

¹⁹Nɛniɛ tenən lɛn goa a gunyin paabaa ǹ wɔ, Mardoose na á goã dí nyɛɛ kii a sumu-n.

²⁰Ka Mardoose lɛ goã á n gɔn waa-n lɔn, Ɛsitɛɛrɛ nə n tɔrɔ basa pɛ wa, a n tɔrɔ dɔ pɛ wa. Ɛsitɛɛrɛ kɔ Mardoose a boo lɛ lɛ, ka a tá a gɔn biikoo kɛ bɛ́ lɔn.

²¹Bɛa biikoo lɛ li, Mardoose bɛ́ á goã dí nyɛɛ kii a sumu-n, kii a kiodɛnaa min paa kɔn nɛ, kiɛnlɛ-lɛduə̃lin manɛ, Bigitan laanka Terɛsi ni, ǹ foo goã yoo ne, ǹ nə́ goã giɛ li ǹ kii Zɛrzɛsi lɛ dɛ.

²²Sɛnɛ Mardoose bɔ sii lɛ siére-a, á pɛ kii a lɔ Ɛsitɛɛrɛ lɛ nɛ. Ɛsitɛɛrɛ dɔ́ pɛ kii lɛ nɛ ka Mardoose tɔ nɛ.

²³Ǹ nə́ sii lɛ gɔsɛ, ǹ nə́ woo yaa miɛ̃. Ǹ nə́ tɔ́n min paa lɛ bɔlɔ yu gɔn ganaa lon. Ǹ bɛ́ kii a siin kiɛ̃ sɛ́wɔ mɛn lɛ nɛ, ǹ nə́ kiɛ̃ walan.