Read Samo, Southern Ɛsit 3 Bible Online

Ɛsit 3 - Samo, Southern bible

Ɛsit 3

¹Bɛa siin kɛn lɛn kiɛ̃ kio, kii Zɛrzɛsi lɛ nyɛɛnaandɛnaabaa kɔ Haman la, Hamedaata a nɛgiĩ ke Agaagi tɔrɔ lɛa. Kiodɛnan mɛnɛn tumaa goã kun ka Zɛrzɛsi ni, á Haman saa á da bɛn tumaa mìi la.

²Kii lɛ a kiodɛnan tumaa goã kiɛ tán Haman lɛ giulun ǹ tá a guguru koe, ka kii lɛ goã á pɛ a wɔ paǹ li lɔn. Sɛnɛ, Mardoose sɛ goã kiɛ tán a giulun, a tá a guguru koe wa.

³Kiodɛnan gialakunun kɛn, bɛn nə́ tɔ́n pɛ Mardoose ne: mà wàa na á baa a tá kii bɔlɔ tii?

⁴Man nə́ goã bɛ lɛ pii Mardoose ne baraabaraa, sɛnɛ a dɔ goã n too koe ǹ lon wa. Ǹ nə́ tɔ́n na a boo da Haman nɛ ǹ nə́ ga a ganaa, bɛ̀ Mardoose lɛ tá re n lɛ parɛɛ a da ǹ boon lɛn ganaa. Sonbore, Mardoose lɛ na á goã á da á nyaa ǹ nɛ, mà Zuifun ka asɛ nɛ.

⁵Haman yii bɛ́ a ganaa mà Mardoose ba kiɛ tán asɛ giulun wa, a foo nə́ n da a lɛ la.

⁶Sɛnɛ, a n gɔn da Mardoose dinsɔɔ̃ ganaa, bɛ na a gɔ́ɔ̃ yɛ wa. A giala ǹ nə́ goã ǹ nə́ Mardoose lɛ tɔrɔn boo da nɛ. Haman lɛ na á goã giɛ li, mà a Mardoose tɔrɔn tumaa dɛ a ǹ nya. Zuifun mɛnɛn bɛ́ Zɛrzɛsi a gána lɛ nɛ, bɛn tumaa.

⁷Kii Zɛrzɛsi a kiibaa lɛ̀ fulupaabaa ǹ wɔ, *Niizã mui ke lɛ̀ a mui bibinaa lɛa, bɛ gɔ́ɔ̃ nɛ, ǹ nə́ n papã lɛawaan laanka muin ganaa Haman yɔrɔ-a màn mɛn bɛ́ toɛ ǹ Zuifun dɛ, a na á woo mɛnaa *Adaara mui la, lɛ̀ a mui fulupaabaa ǹ wɔ.

⁸Haman tɔ́n pɛ kii Zɛrzɛsi ni: «Tɔrɔ lɛ kɔn tan a ba goon ka ǹ miãn nɛ wa. Bɛa tɔrɔ lɛ a minin tá ǹ mìi ni pɛsiɛ̃ nɛ tɔrɔn bii n gána lɛ a bǎãn tumaa nɛ. Ǹ sii zɛnaa ǹ gɔnɔn ba goon ka tɔrɔ kɔn wɔn nɛ wa, ǹ ba kii lɛ bɔlɔ sii wa. Bɛ̀ kii lɛ nə́ ǹ toa walan kiĩn ni, a là ba a-n wa.

⁹Bɛ̀ kii lɛ dùũ ni, sɛ́wɔ nə n kiɛ̃, bɛa tɔrɔ kɛ lɛ a minin bɔ̀nbaa ǹ wɔ lɛa. Min mɛnɛn bɛ́ gɔn mànan soekɔn gána lɛ wɔ lɛa, masɛ á die wɔrɔ tɔnɔ biɛsɔɔ nimii ma kaa bɛn gɔn, ǹ kaa gána lɛ gɔn màn li.»

¹⁰Kii lɛ tɔ́n a gòon ganaa ǹ kaaran[3] bɔ a gòon ganaa, á kɔ Hamedaata a nɛgiĩ Haman la, Agaagi tɔrɔ kɛ lɛ boe Zuifun yii ni.

¹¹Bɛ kio, kii lɛ pɛ Haman nɛ: Wɔrɔ ke, bɛ toa walan. Minin lɛn dɔn, bɛ̀ sii mɛn kɔɔ̃n kɔ n ganaa, n bɛ zɛnaa ǹ nɛ.

¹²Min mɛnɛn bɛ́ kii a sɛ́wɔ-kiɛ̃lin lɛa, ǹ nə́ tɔ́n lɛ dia bɛn la, lɛ̀ a mui bibinaa a lɛawaa fulusɔɔbaa ǹ wɔ li. Ǹ nə́ sɛ́wɔ lɛ kiɛ̃ á kɔnpɛ ka Haman a da ǹ boo ne ka te. Ǹ nə́ dia kii a kiodɛnan la, ka gána lɛ a bǎã gogoonmaa a pàãdɛnan nɛ, ka tɔrɔ gogoonmaa a nyɛɛnaandɛnan nɛ. A ná n kiɛ̃ ka bǎã gogoonmaa a sɛ́wɔ kiɛ̃ ǹ gɔn nɛ, ka tɔrɔ gogoonmaa a bɔlɔ nɛ. Man nə́ sɛ́wɔ lɛ kiɛ̃ ka kii Zɛrzɛsi tɔ nɛ, ǹ ná a gòon ganaa ǹ kaaran lɛ bǎã da la, kii gɔn bǎã lɛa.

¹³Bɛ kio, ǹ nə́ sɛ́wɔn lɛn kɔ dia dí-a wolen la, ǹ nə́ woo ǹ koa kii lɛ a gána a bǎãn tumaa nɛ. Adaara mui ke lɛ̀ a mui fulupaabaa ǹ wɔ lɛa, bɛa lɛawaa fulusɔɔbaa ǹ wɔ, ǹ Zuifun lɛn tumaa dɛ lenlen ǹ nə ǹ nya pinin goon, min tenən laanka min zizin ni, nɛnyaanan laanka lɔn nɛ. Ǹ nə ǹ mànan kokoo.

¹⁴Sɛ́wɔ lɛ bɛ́ màn mɛn pii, bɛa lɛ doamaa nɛ a n dia pàã boo lɛa, gána lɛ a bǎã gogoonmaa nɛ, a boo nə n da tɔrɔn tumaa nɛ, màn mɛn bɛ́ toɛ, lɛawaa mɛn nə n pɛ, ǹ yɔrɔ goã boe-n bɛ li.

¹⁵Kii lɛ bɛ́ á boo da, dia dí-a wolen lɛn nə́ woo belenbelen, ǹ nə́ boo lɛ a lɛ dia Suuzu kiwi gole lɛ nɛ. Suuzu kiwi minin tumaa yiri lɔlɔkɔnmaa nɛ, a da yaa Kii lɛ laanka Haman giã tán ǹ nə́ duvɛ̃ mii.