Read Samo, Southern Ɛsit 6 Bible Online

Ɛsit 6 - Samo, Southern bible

Ɛsit 6

¹Bɛa tèlò lɛ nɛ, kii lɛ boo la á nyuù naa a yii-a wa. A tɔ́n pɛ, mà ǹ da ka sɛ́wɔ kɛ nɛ, min yiri gisĩ lɛlɛ siin ni. Ǹ nə́ tɔ́n daa bɛa sɛ́wɔ lɛ pɛ kii lɛ yɔrɔ-a.

² Ǹ nə́ yɛ kiɛ̃ nɛ a nɛ, mà kii a sumu dí-nyali min paa lɛ, ǹ nə́ goã kiɛnlɛ lɛduĩ, Bigitan laanka Terɛsi ni, mà bɛn bɛ́ ǹ nə́ goã giɛ kii lɛ a dɛ ǹ gɔn li, mà Mardoose na á goã á ǹ giala da kanaa.

³Kii lɛ tɔ́n nɔ̀n da mà gugurubaa laanka saraa mɛn na á dɔ Mardoose ganaa bɛ taman yii? Min mɛnɛn bɛ́ dí nyɛɛ kii lɛ giulun, bɛn ná a lɛ si mà ǹ màn kɔn kɔ Mardoose la wa.

⁴Kii lɛ tɔ́n nə n toa mà die n sumu-nə? Bɛ́ daa yaa, bɛ̀ Haman dɔ na á daa kii a sumu-n, á n die pii kii lɛ nɛ, mà a Mardoose bɔlɔ yu gɔn ganaa, gɔn mɛn bɛ́ asɛ din goã a ná a yɔrɔ bɔ Mardoose wɔ lɛa.

⁵Kii a dí-nyalin nə́ pɛ kii lɛ nɛ mà Haman nə́ ke golee-n sumu-n. Kii lɛ nə́ n toa mà a da wɔ.

⁶Haman daa wɔ. Kii lɛ pɛ nɛ: «Kii bɛ́ giɛ li a gugurubaa kɔ min mɛn la, wàa sii doamaa nɛ a n zɛnaa bɛ nɛ?» Haman tɔ́n pɛ a din gɔ́ɔ̃ nɛ, mà kii lɛ bɛ́ giɛ li a gugurubaa kɔ min mɛn la, mà bɛa dɛnaa n boe la a die kɔsɔ baa, asɛ din kio?

⁷Haman tɔ́n kii lɛ si kɛnɛn: — Min mɛn bɛ́ kii lɛ n giɛ li a gugurubaa kɔ la?

⁸Kii dɔnkɛ goon nə die, dɔnkɛ mɛn bɛ́ kii wɔ. Sùi goon nə die, sùi mɛn bɛ́ kii dii la, kii bafolo dɔ ná a mìi ganaa.

⁹Dɔnkɛ lɛ laanka sùi lɛ nɛ, ǹ bɛn kɔ kii a kiodɛnaa gole goon la. Kii lɛ bɛ́ giɛ li a gugurubaa kɔ min mɛn lɛ la, kii a kiodɛnaa lɛ dɔnkɛ lɛ wɔ bɛ ganaa. Bɛ kio, a da sùi lɛ la a n bibiə̃ ne kiwi lɛ a zii gole kɛ la, ǹ nə n lɛ dɛ a nyɛɛnɛ bɛ̀ ǹ nə́ pii: «Kii lɛ bɛ́ giɛ li a gugurubaa kɔ min mɛn la, a nə n zɛnɛɛ bɛ-n kɛnɛn.»

¹⁰Kii lɛ tɔ́n pɛ Haman nɛ: «N nanaa n dɔnkɛ lɛ saa, n sùi lɛ kũ, ka n din da lɔn, Zuifun giĩ Mardoose ke giã-n tán kii a kiɛnlɛ-a, n zɛnaa bɛ-n miɛ̃. N din màn mɛn yii pɛ, n baran bɛa goon na n da wa.»

¹¹Haman tɔ́n dɔnkɛ lɛ saa, á sùi lɛ kũ, á dɔnkɛ lɛ wɔ Mardoose ganaa, á da sùi la á n bibiə̃ ne kiwi lɛ a zii gole lɛ la, á n lɛ dɛ a nyɛɛnɛ á pɛ: «Kii lɛ bɛ́ giɛ li a gugurubaa kɔ min mɛn la, a nə n zɛnɛɛ bɛ-n kɛnɛn.»

¹²Bɛ kio, Mardoose nə́ n lɛ goa á daa kii a kiɛnlɛ-a, bɛ̀ Haman sɛ tá n nanaɛ woe piɛ, a foo n ziziɛ̃ nɛ màn nə́ koe ne a yɔrɔ lɛ.

¹³Sii mɛn nə Haman yɛ, a ná a tumaa laakalaa a lɔ Zerɛsi laanka a din a giaáran manɛ. Min mɛnɛn bɛ́ yiri koe la, bɛn laanka a lɔ pɛ-n kɛnɛn: «Ǹ nə n puusə kɔ Mardoose mɛn lɛ yɔrɔ-a a din a Zuifu tɔrɔ baa kɛ taman yii ni. Bɛ lɛ taman yii, n tá re goɛ̃ màn kooro lɛa yǎa duduu a yɔrɔ-a. Ma n die goɛ̃ n toe tán a giulun kɛnɛn miɛ̃, bɛa sàabiɛ wa.»

¹⁴A ǹ toa tɔn boo gialaa diɛ ka Haman nɛ, bɛ̀ kii a sumu dí-nyalin nə́ ke, ǹ nə́ dɔ, ǹ nə́ n nanaa ǹ nə́ woo ka Haman nɛ Ɛsitɛɛrɛ a zɔ́n màn bii ǹ bǎã lɛ nɛ.