Read Samo, Southern Ɛsit 9 Bible Online

Ɛsit 9 - Samo, Southern bible

Ɛsit 9

¹*Adaara mui ke, lɛ̀ a mui fulupaabaa ǹ wɔ lɛa, bɛa lɛawaa fulusɔɔbaa ǹ wɔ daa á dɔ. Kii lɛ a lɛ dia lɛ a sii doamaa nɛ, a n zɛnaa bɛa pinaa lɛ nɛ. Zuifun zɔ́ɔn lɛn yiri na á goã a ganaa, mà ǹsɛn tá re boe Zuifun lɛn la, ǹ nə ǹ kaa ǹ pàã giulun bɛa pinaa lɛ nɛ. Sɛnɛ sii lɛ wusoo á n lusi, Zuifun lɛn sii bɛ́ a ba min mɛnɛn lɛn ganaa wa, Zuifun lɛn sɛn man nə́ wusoo, ǹ nə́ boo bɛn la, ǹ nə́ ǹ kaa ǹ pàã giulun.

²Kii Zɛrzɛsi lɛ a gána bǎãn tumaa nɛ, Zuifun lɛn nə́ n sɔkɔn ǹ kiwin ni, màn mɛn bɛ́ toɛ, min mɛnɛn nə goã giɛ li mà ǹ basaã kɔ ǹ nɛ, ǹ bɛn dɛ. Min kɔn goã n gòãn doɛ ǹ nyɛɛn wa, a giala min tumaa na á goã nyɛ́ɛ biɛ ǹ nɛ.

³Kii lɛ kiodɛnan mɛnɛn tumaa bɛ́ bǎãn mìi la, bɛn nɛ, kii lɛ a pàãdɛnan nɛ, a kiwin sii yɔrɔ-bɔlen ne, a pàã lɛ a dí-nyalin ni, ǹ tumaa na á goã n doe Zuifun lɛn lɛ, a giala ǹ nə́ goã nyɛ́ɛ biɛ Mardoose ne.

⁴Sonbore, Mardoose lɛ goã gole kii a piɛ lɛ nɛ, a tɔ bɔ gána lɛ a bǎãn tumaa nɛ. Màn na á goã miɛ a pàã li woe.

⁵Zuifun lɛn nə́ ǹ zɔ́ɔn lɛn tumaa dɛ ka gɔya nɛ, ǹ nə́ ǹ dɛ ǹ nə́ ǹ nya lenlen. Zuifun lɛn sii bɛ́ a goã min mɛnɛn lɛn ganaa wa, ǹ nə́ n dùũ bɔ bɛn la.

⁶Suuzu kiwi gole lɛ dinsɔɔ̃ nɛ, Zuifun lɛn man nə́ min biɛsooro dɛ.

⁷Hamedaata a nɛgiĩ Haman mɛn lɛ á ke boe Zuifun yii ni, ǹ nə́ bɛa nɛgiĩ fù kɛ dɛ: Parsandaata nɛ, Dafɔn nɛ, Asipaataa nɛ, Paraataa nɛ, Adalia nɛ, Aridataa nɛ, Parmastaa nɛ, Arisayii ni, Aridayii ni, ka Wayiizataa nɛ. Sɛnɛ, Zuifun lɛn nə n gɔn da ǹ gɔn mànan ganaa wa.

¹¹Ǹ minbuiin lɛ mɛn dɛ Suuzu kiwi gole lɛ nɛ, bɛa boo dɔ kii li a din pinaa lɛ nɛ.

¹²Kii lɛ tɔ́n pɛ a lɔ Ɛsitɛɛrɛ nɛ: «Suuzu kiwi gole lɛ nɛ, Zuifun lɛn nə́ gɛ̀ dɛ, ǹ nə́ min biɛsooro dɛ ka Haman a nɛgiĩ fú kɛ nɛ. Bǎã gialakunun kɛn dɔn nɛ, maǹ nə́ boo la ǹ nə́ wàa sii zɛnaa ke kəni? Sɛnɛ, n bɛ́ tɔn giɛ màn mɛn kɔsɔ li, a pɛ, masɛ á die koen la. N gɔ́ɔ̃ bɛ́ sii mɛn ganaa doo, a pɛ, á die n zɛnɛɛ n nɛ.»

¹³Ɛsitɛɛrɛ ná a lɛ si á pɛ: «Bɛ̀ kii lɛ dùũ ni, kii lɛ a boo mɛn bɛ́ a gòãn la pelo, ǹ zii kɔ Suuzu kiwi a Zuifun la biɛ̃ doo, ǹ bɛa boo lɛ a sii zɛnaa, ǹ Haman a nɛgiĩ fù kɛ gere lɔɔ lon gɔn ganaa.»

¹⁴Kii lɛ tɔ́n pɛ mà ǹ zɛnaa miɛ̃. Ǹ nə́ bɛa boo lɛ a lɛ dia Suuzu kiwi. Ǹ nə́ Haman a nɛgiĩ fù lɛ gere lɔɔ lon.

¹⁵Suuzu kiwi a Zuifun lɛn nə́ tɔ́n nə n sɔkɔn Adaara mui lɛ a lɛawaa fulusiibaa ǹ wɔ doo. Suuzu kiwi lɛ nɛ, man nə́ min biɛsɔɔ dɛ, sɛnɛ, ǹ nə n gɔn da ǹ gɔn mànan ganaa wa.

¹⁶Zuifun gialakunun mɛnɛn dɔn bɛ́ kii lɛ a gána lɛ a bǎãn nɛ, bɛn dɔn nə́ n sɔkɔn, ǹ nə́ yɔ bɔ ǹ nyin taman yii, ǹ nə́ n gɔn si ǹ zɔ́ɔn lɛn la. Ǹ sii bɛ́ a goã min mɛnɛn lɛn ganaa wa, ǹ nə́ bɛn min duu pɔsɔbaa ka sooro dɛ. Sɛnɛ, ǹ nə n gɔn da ǹ gɔn mànan ganaa wa.

¹⁷Bɛ na á n zɛnaa Adaara mui a lɛawaa fulusɔɔbaa ǹ wɔ pinaa. A lɛawaa fulusiibaa ǹ wɔ pinaa, ǹ nə́ n susu, ǹ ná a pinaa baa zɔ́n gole laanka nyɛnyɛɛ lɛa.

¹⁸Suuzu kiwi a Zuifun kɛn, ǹ nə́ n sɔkɔn mui lɛ a lɛawaa fulusɔɔ laanka a fulusii, bɛn sɛn man nə́ n susu mui lɛ a lɛawaa fulusooro, ǹ ná a pinaa baa zɔ́n gole laanka nyɛnyɛɛ lɛa.

¹⁹Bɛ lɛ n ke, Zuifun mɛnɛn bɛ́ giã-n don kionən ne, bɛn nə́ Adaara mui a lɛawaa fulusiibaa ǹ wɔ lɛ baa nyɛnyɛɛ pinaa lɛa, ǹ nə́ baa zɔ́n laanka màn bii ǹ lɛawaa lɛa, ǹ nə́ màn-bii koe kɔn la.

²⁰Mardoose bɛa siin kɛn lɛn kiɛ̃ sɛ́wɔ nɛ. Zuifun mɛnɛn tumaa bɛ́ kii Zɛrzɛsi lɛ a gána lɛ a bǎãn tumaa nɛ, á sɛ́wɔ dia ǹ la, á wɔlɔ kunu dɛnan laanka a wɔlɔ sɔsɔɔ dɛnan nɛ,

²¹màn mɛn bɛ́ toɛ, ǹ Adaara mui a lɛawaa fulusiibaa ǹ wɔ laanka a fulusoorobaa ǹ wɔ baa zɔ́n lɛa lɛ̀ tunaa nɛ.

²²A giala, bɛa lɛawaan kɛn lɛn gɔ́ɔ̃ nɛ, Zuifun lɛn nə́ n gɔn si ǹ zɔ́ɔn la. Bɛa mui lɛ nɛ, sii lɛ goã á n lusi, foo ziziɛ̃ nə́ n bɔyaa á foo kɔɔ̃nbaa baa, gɛ̀ koa ǹ yɔrɔ kɔsiɛ nə́ n bɔyaa á zɔ́n baa. Mardoose mà ǹ bɛa lɛawaan kɛn lɛn baa màn bii laanka nyɛnyɛɛ pinaa lɛa, ǹ màn-bii kɔ kɔn la, ǹ bǐɛ̃ baa doobaan la.

²³Zuifun lɛn nə́ Mardoose a boo lɛ si, ǹ sii mɛn lɛ a zɛnaa giala kɔ, ǹ nə́ bɛ baa landa lɛa.

²⁴ A giala, Hamedaata a nɛgiĩ Haman mɛn lɛ á ke, Agaagi tɔrɔ lɛa, Zuifun tumaa a ziadɛnaa lɛa, bɛ́ goã á ná a yɔrɔ bɔ mà ǹ Zuifun lɛn bɔ̀n baa. A na á goã á n pã ǹ bɔma yii-n lɛ laanka ǹ bɔ̀nbaa lɛ a sii ganaa.

²⁵Sɛnɛ Ɛsitɛɛrɛ bɛ́ á woo kii lɛ li, kii lɛ sɛ́wɔ kiɛ̃, á zii kɔ, mà Haman sii baraa mɛn yɔrɔ bɔ Zuifun taman yii, mà bɛ die a kũ a din mìi ni, mà ǹ die ǹ na a bɔlɔ yu gɔn ganaa, ka a nɛgiĩn ni.

²⁶Bɛ lɛ nɛ, ǹ nə́ bɛa lɛawaan kɛn lɛn bíi mà Puurimu. Ǹ bɛ́ n piɛ̃ màn mɛn ganaa, a tɔ n puuri, maǹ nə́ Puurimu tɔ lɛ kɔ á kɔnpɛ ka bɛ nɛ. Bɛ lɛ dɔ ná á toa, a kɔnpɛ ka Mardoose a sɛ́wɔ lɛ a boo ne, ka ǹ dininmaan yii màn mɛn yɛ bɛa sii lɛ paǹ li, a kɔnpɛ ka sii kɛ dɔ nɛ, á goã á ǹ yɛ,

²⁷Zuifun lɛn nə́ sii lɛ a zɛnaa baa landa lɛa, ǹ nə́ lɛ kɔ a ganaa, ǹ dinin laanka ǹ nɛnyaanan wɔ lɛa, ka min mɛnɛn dɔn bɛ́ re kiɛ kunun ǹ ni. Lɛ̀ woo lɛ̀, maǹ bɛa lɛawaa paa lɛ koɛ, a kɔnpɛ ka a zɛnaa ǹ gɔn nɛ, ka a zɛnaa ǹ biikoo ne.

²⁸Sumu gogoonmaa nɛ, gána lɛ a bǎã gogoonmaa nɛ, kiwi gogoonmaa nɛ, maǹ bɛa lɛawaan kɛn lɛn koɛ die miɛ̃, nɛnyaanan nə́ siɛ ǹ din mala. Bɛa Puurimu lɛawaan kɛn lɛn ba re sàabiɛ Zuifun li wa, ǹ koa lɛ ba re n diɛ Zuifun tɔrɔn li wa.

²⁹Kii a lɔ Ɛsitɛɛrɛ lɛ, Abiayili a nɛlɔ lɛa, bɛ laanka Zuifun giĩ Mardoose wusoo doo, ǹ nə́ sɛ́wɔ kaka kiɛ̃, ǹ nə́ pàã kɔ sɛ́wɔ kɛ la, boo diɛ Puurimu lɛawaan lɛn wɔ gɔn la.

³⁰Zuifun mɛnɛn tumaa bɛ́ kii Zɛrzɛsi a gána lɛ a bǎã paabiɛ ka fuəwensɔbaa lɛ nɛ, ǹ nə́ sɛ́wɔn kiɛ̃, ǹ nə́ ǹ dia ǹ la. Là nyantoro boo laanka bɔlɔgoondɛnaabaa boo na á goã bɛa sɛ́wɔn lɛn nɛ.

³¹Ǹ nə́ Puurimu lɛawaan lɛn koa, á zɛnɛ a biikoo lɛ, ka Zuifun giĩ Mardoose laanka kii a lɔ Ɛsitɛɛrɛ goã ǹ nə́ bɛa lɛawaan kɛn lɛn koa lɔn, ǹ nə́ kɔ ǹ la. Maǹ nə́ ǹ koa ǹ dinin laanka ǹ nɛnyaanan wɔ lɛa, ǹ lɛ-sɔɔ laanka ǹ lɛ-dɛ biikoo li.

³²A bɛ́ miɛ̃, Ɛsitɛɛrɛ a boo lɛ Puurimu lɛawaan lɛn koa baa landa lɛa, ǹ nə́ bɛa boo kiɛ̃ sɛ́wɔ nɛ.