Read Samo, Southern BBN 10 Bible Online

BBN 10 - Samo, Southern bible

BBN 10

¹Dɛnaa pɛ Muizu-n doo: «Wo wɔ *Faarahɔn li. A giala, ma din ni má a laanka a kiodɛnan too kaka kɔ, ń giɛ ma tá ma din nyaa ǹ siin zɛnɛɛ ǹ bii.

²Man má baa miɛ̃, máa n na a laakalaa n nɛnyaanan laanka n nɔ̀ɔnɔn manɛ, mà Lawa sàn kɔ ka Ezipti minin ni, a ná a sii nyaa ǹ siin zɛnaa ǹ bii. Ka tá re doɛ̃ mà ma din lɛ n Dɛnaa lɛ lɛa.»

³Muizu laanka Aarɔn woo wɔ Faarahɔn li, ǹ nə́ pɛ-n kɛnɛn: — Dɛnaa lɛ, Ebrəən Lawa lɛa, bɛ n kɛ pii: «N nə n die n piɛ̃ ka din gisiĩ-n masɛ Lawa yɔrɔ-a yǎa biĩ doo? A toa maa zaman lɛ soo, a wo dí nya ma nɛ.

⁴Bɛ̀ ń tá tɔn nə n piɛ̃, n ba toɛ maa zaman lɛ á soe woe wa, biɛ̃ dinin gɔrɔ, man die bisinin diɛ n bǎã yii ni.

⁵Ǹ tá re gána lɛ kuĩ taãn-taãnɛ, yii ná a ba a bǎã kooro yii wa. Màn gialakun mɛn nə n si á goã, la gii ná a ziziɛ̃ wa, maǹ die bɛ soɛ̃. Kaa dan mɛnɛn bɛ́ don, ǹ ba re màn toɛ bɛ kɔ́n ganaa wa.

⁶Ǹ tá re n kionən piɛ̃, ka n kiodɛnan tumaa a kionən ne, ka gána lɛ a minin tumaa a kionən ne. Ka din laanka ka digolon dinin bɛ́ ǹ màn mɛn yɛ wa, a kũ ǹ tá kanaa ganaa a da kaa pelo lɛ, bɛ n die n zɛnɛɛ.» Muizu soo á n bɔ Faarahɔn li, á wusoo á woo.

⁷Faarahɔn a kiodɛnan lɛn nə́ pɛ nɛ kɛnɛn: «Giĩ kɛ n die bɔ̀n diɛ wɔ ganaa yǎa biĩ doo? A toa giĩn kɛn nə wo dí nya ǹ Dɛnaa Lawa nɛ. N ba tɔn doɛ̃ mà Ezipti gána n bɔ̀n biɛ woe wa?»

⁸Ǹ nə́ wusoo ǹ nə́ lɛ dia Muizu laanka Aarɔn la Faarahɔn li, á pɛ ǹ nɛ: «Ka soo, ka wo dí nya kaa Dɛnaa Lawa lɛ nɛ. Sɛnɛ, die doamaa-n ka woo ne?»

⁹Muizu pɛ: «Wɔ n die woe ka wɔa nɛnyaanan nɛ, ka wɔa min golen ne, wɔa giĩn laanka wɔa lɔn nɛ, wɔa sèren ne, wɔa bòen ne, ka wɔa diin ni. A giala, wɔ n die zii tɔ we don bii, wɔ zɔ́n zɛnaa wɔa Dɛnaa tɔ a lɛa.»

¹⁰Faarahɔn pɛ ǹ nɛ kɛnɛn: «Dɛnaa goã kun ka-n le. Ma á re toɛ ka soo ka kaa nɛnyaanan nɛ ke? A n foaã nɛ, yiri baraa-n ka á boe.

¹¹A re n zɛnɛɛ miɛ̃ wa. Á soɛ ka dinin giĩn nə woo, ka dí nya Dɛnaa nɛ, ka laadoo n bɛ dinsɔɔ̃ ganaa.» Bɛ kio, ǹ nə́ ǹ loo ǹ nə́ ǹ bɔ Faarahɔn li.

¹²Dɛnaa pɛ Muizu ni: «N gɔn saa lon n dia Ezipti gána la, n lɛ dia bisinin la, ǹ yoo ǹ kɔ Ezipti gána lɛ, ǹ gána lɛ a màn-kɔsiɛ tumaa sɔ̃, ǹ mɛn tumaa nə n si la gii la á goã.»

¹³Muizu ná a bàlà lɛ saa lon, á dia gána lɛ la. Dɛnaa piɛ̃ bɔ lɛ̀giala-n á dia gána lɛ la, bɛa pinaa kɛ lɛ din tumaa gɔ́ɔ̃ nɛ: penleen laanka tèlò ne. Lɛ̀ waa á daa yaa, bɛ̀ piɛ̃ lɛ na á daa ka bisinin ni.

¹⁴ Bisinin lɛn nə́ yoo ǹ nə́ kɔ gána lɛ paǹ tumaa lɛ, ǹ nə́ mɛ bǎã tumaa nɛ. Bɛa bisinin kɛn lɛn mɔnaabaa miã tɔrɔ tɔn yɛ bɛ nyɛɛn wa, a re yii a kio dɔn wa.

¹⁵Ǹ nə́ n kɔ gána lɛ a tán tumaa lɛ, bǎã tumaa tì kɔ. Ǹ nə́ gána lɛ a màn-kɔsiɛ tumaa sɔ̃, ka a da nɛn tumaa nɛ, mànan mɛnɛn nə n si la gii lɛ la ǹ nə́ goã. Da luu buruu kɔ́n goã wa, màn buruu kɔ́n dɔ goã tɔɔn gɔ buu ni ǹ bǎãn nɛ, gána lɛ paǹ kɔ́n nɛ wa.

¹⁶Faarahɔn nə́ n nanaa á lɛ dia Muizu laanka Aarɔn la, á pɛ ǹ nɛ: «Má sã má wɔ kaa Dɛnaa Lawa lɛ lon, ma wɔ ka dinin dɔn lon.

¹⁷Kanna kəni, man ka nyankoe, máa ka maa sã toa ma-n doo. Ka kaa Dɛnaa Lawa lɛ nyankɔ, a bǐɛ̃ kɔ a dɔlɔ baraa kɛ saa a bɔ ma mìi ni.»

¹⁸Muizu soo á n bɔ Faarahɔn li, á woo Dɛnaa nyankɔ.

¹⁹Dɛnaa piɛ̃ lɛ bɔyaa, á baa piɛ̃ kaka kɔ́n lɛa, boe lɛ̀nyɛɛnɛ, bɛ́ bisinin lɛn goa, á ǹ nyɛnaa á woo ǹ ne Sawɛɛ tà lɛ-a. Bisin goon din goã Ezipti gána lɛ paǹ kɔ́n nɛ wa.

²⁰Sɛnɛ, Dɛnaa toa Faarahɔn too kaka kɔ, a Izirayeli nɛnyaanan lɛn toa ǹ nə́ soo, ǹ nə́ woo wa.

²¹Dɛnaa pɛ Muizu ni: «N gɔn saa lon, màn mɛn bɛ́ toɛ, wɔlɔ tii Ezipti gána lɛ paǹ tumaa nɛ. Wɔlɔ tii yǎa minin nə n gɔn talɛɛ.»

²² Muizu nə́ n gɔn saa lon. Lɛawaa sɔɔ gɔ́ɔ̃ nɛ, wɔlɔ tii ka biribiri Ezipti gána lɛ paǹ tumaa ganaa.

²³Lɛawaa sɔɔ gɔ́ɔ̃ nɛ, min kɔ́n yii ba ǹ dɔɔ̃n ganaa wa, min dɔ nə n zɔ̃ á n bɔ a bǎã-n wa. Sɛnɛ, wɔlɔ fúlu goã Izirayeli nɛnyaanan lɛn sɛn giã ǹ bǎã nɛ.

²⁴Faarahɔn lɛ dia Muizu la, á pɛ nɛ: «Ka woo, ka dí nya Dɛnaa lɛ nɛ. Ka á re boe la ka wo ka kaa lɔn laanka kaa nyɛnyaanan nɛ. Sɛnɛ, kaa tɔɔn kɛn sɛn, kaa sèren ne, kaa bòen ne, ka kaa diin ni, bɛn ba woe wa. Sɛnɛ, kaa nɛnyaanan tá boe la ǹ wo kun ka nɛ.»

²⁵Muizu pɛ kɛnɛn: «Haayii. N din nə die wúlu mànan kɛn koe wɔ la, wɔ bɔ wɔa Dɛnaa Lawa nɛ, a bɔ kooro laanka a tã lenlen wɔn kɛn?

²⁶Wɔa tɔɔn man die woe kun wɔ nɛ, tɔɔ lɛ kɔ́n ba goɛ̃ wa. A giala, wɔ n die màn boe ǹ dinin lɛn bii, wɔ dí nya wɔa Lawa lɛ nɛ. Bɛ̀ wɔ bie wɔ dɔ walan wa, wɔ bɛ́ re màn mɛn koe Lawa la, wɔ dɔn dinin ba bɛ doɛ̃ wa.»

²⁷Sɛnɛ, Dɛnaa toa Faarahɔn too kaka kɔ, a lɛ kɔ á toa Izirayeli nɛnyaanan lɛn nə́ soo, ǹ nə́ woo wa.

²⁸Faarahɔn pɛ Muizu ni: «Soo! N baran toa wɔ yii kɔn yɛ doo wa. Wɔ yii bɛ́ re wusii a kɔn yɛ ǹ mɛn pinaa, n gɛ̀ pinaa dɔ n bɛ-n gɔrɔ.»

²⁹Muizu pɛ-n kɛnɛn: «Ka n din pɛ lɔn, wɔ yii á re kɔn yii doo wa!»