Read Samo, Southern BBN 12 Bible Online

BBN 12 - Samo, Southern bible

BBN 12

¹ Dɛnaa pɛ Muizu laanka Aarɔn nɛ Ezipti gána lɛ nɛ:

²«Mui kɛ n die goɛ̃ mui bibinaa lɛa ka gɔn. Ka n die lɛ̀ giala koe a din lɛ nɛ.

³Ka a yɔrɔ pɛ Izirayeli nɛnyaanan zaman lɛ-n kɛnɛn: Mui kɛ lɛ a lɛawaa fù, kion gogoonmaa tɔɔ bɔ a dɛ.

⁴Bɛ̀ kion mɛn tá boɛɛn tɔɔ bɔ ganaa, a minin nə́ ǹ ba boe la, ǹ tɔɔ sɔ̃ ǹ nya wa, a kɔn ma ka ǹ miãkɛnɛn nɛ, a kɔnpɛ a zaman lɛ nɛ, ǹ boo la ǹ tɔɔ bɔ a kɔnpɛ ka ǹ soɛ̃ nɛ. Ka bɛ́ re boe tɔɔ mɛn la ka sɔ̃ ka nya, ka bɛ bɔ.

⁵Ka tɔɔ bɔ, wɔ̀lɔ̀ ná a ba a ganaa wa, lɛ̀ goon pia lɛa. Ka bɔ sère nɛn hinlaa bòe nɛn bii.

⁶Ka bɔ ka koa yǎa mui kɛ lɛ a lɛawaa fulusii. Izirayeli nɛnyaanan zaman lɛ tumaa na a wɔ bɔlɔ kuru wasa yii siɛ̃ waáraa.

⁷Ka a mà bɔ, ka bɛ́ re a siĩ soɛ̃ kion mɛn nɛ, ka bɛa mà lɛ lɔ kion lɛ a kiɛnlɛ gɔnɔn ganaa, a wàã li ǹ wɔ màn paa kɛ laanka lon wɔ kɛ nɛ.

⁸Tɔɔ lɛ siĩ nə n paparɛ, a n sɔ̃ bɛa tèlò lɛ nɛ, ka buuru ni, yɔ bù ná a ba li wa, ka buu kɔɔsɛn nɛ.

⁹A siĩ kɔ́n a fumaa baran wɔ ka lɛ-n wa, ka baran kɔrɛ ka mu dɔ-n wa. Sɛnɛ, yǎa a paparɛɛ, a mìi ni, a keren ne ka a màn baaran nɛ.

¹⁰Ka baran màn kɔ́n toa baayɛlɛ wa. Bɛ̀ ǹ mɛn nə n si á goã, ka tã.

¹¹Bɛ̀ ka tá a siĩ lɛ soɛ̃, ka sɔ̃ fufuu, ka binbin goã yii-n ka maabɛlɛ nɛ, kɔsɔn nə́ ka gòã ganaa, bàlà n ka gɔn, ka n pɛ mà ka n woe zii-n sisia. Dɛnaa bɛ́ re kiɛ̃ a ka toa walan, bɛa zɔ́n nɛ.»

¹²Dɛnaa pɛ: «Ma á re boe Ezipti gána lɛ gɔ́ɔ̃-n bɛa pinaa tèlò kɛ lɛ nɛ. Ma á re gána lɛ a nɛgiĩ bibinaan yii dii ǹ gã, minbuiinin laanka tɔɔn wɔn nɛ. Ma á re a dɔlɔ boe Ezipti gána a dì din tumaa ganaa. Ma din lɛ n Dɛnaa lɛa.

¹³Mà lɛ n die ka lɛduə̃ ǹ sii biɛ, ka bɛ́ re goɛ̃ kionən mɛnɛn nɛ, a goã bɛn kiɛnlɛn ganaa. Ma á re bɛa mà lɛ yii, bɛ̀ ma á Ezipti minin lɛn dii, basaã kɔ ǹ dɔlɔ kɛ a re doe ka ganaa wa, a giala, ma á re kiɛ̃ ma ka toa walan.

¹⁴ Lɛ̀ woo lɛ̀, ka die ka n yiri gisĩ bɛa sii kɛ lɛ nɛ, ka baa zɔ́n gole lɛa, ka masɛ guguru kɔ nɛ. A n sii lɛa, màn mɛn ná a sàabiɛ doo duduu wa.»

¹⁵Dɛnaa pɛ: «Lɛawaa sɔbaa gɔ́ɔ̃ nɛ, ka buuru sɔ̃ yɔ bù ná a ba li wa. A lɛawaa bibinaa pinaa gɔrɔ, ka yɔ bù tumaa goa ka bɔ kaa kionən ne. Min mɛn bɛ́ re yɔ bù buuru we a lɛ-n, lɛawaa bibinaa pinaa lɛ-n gɔrɔ a wo a sɔbaabaa ǹ wɔ yaa, bɛa dɛnaa á re n boe, a n bɔ Izirayeli nɛnyaanan li.

¹⁶Lɛawaa bibinaa lɛ li, ka tá re n lɛ soekɔn ka Lawa guguru kɔ. A lɛawaa sɔbaabaa ǹ wɔ pinaa doo, ka wusoo ka zɛnaa miɛ̃. Bɛa lɛawaan kɛn lɛn li, min baran dí kɔ́n nya wa, yǎa kaa màn-bii dinsɔɔ̃, bɛ á boe la a n zɛnaa.

¹⁷Ka *yɔ bùbaã buuru zɔ́n kɛ tamaa, a giala, bɛa pinaa taãn-taãn lɛ nɛ, má soo kaa zaman lɛ nɛ má bɔ Ezipti gána nɛ. Ka bɛa pinaa kɛ tamaa ka baa zɔ́n lɛa lɛ̀ woo lɛ̀. A na á sii baa, sii mɛn bɛ́ a sàabiɛ doo wa.

¹⁸Mui bibinaa lɛ a lɛawaa fulusiibaa ǹ wɔ pinaa, wasamiɛ̃nɛ, ka buuru sɔ̃ yɔ bù ná a ba li wa, yǎa a woe doe mui lɛ a lɛawaa fuəwengoon dɔ a wasamiɛ̃n ganaa.

¹⁹Lɛawaa sɔbaa lɛ gɔ́ɔ̃ nɛ, yɔ bù baran yɛ kaa kionən ne wa. Min mɛn bɛ́ re buuru yɔ bùdɛnaa soɛ̃, ta tii ni, hinlaa kɛnaa nɛ, bɛ á re n boe, a n bɔ Izirayeli nɛnyaan zaman lɛ li.

²⁰Buuru yoo wole, yɔ bù n li, bɛ baran wɔ ka lɛ-n wa. Ta ka n bǎã woo bǎã, ka buuru sɔ̃ yɔ bù ná a ba li wa.»

²¹Muizu lɛ dia Izirayeli nɛnyaanan min golen tumaa la, á pɛ ǹ nɛ: — Ka wo ga tɔɔn li kaa tanlɛn wɔn lɛa, ka ǹ dɛ *Kiɛ̃mala ǹ zɔ́n mànan lɛa.

²²Ka *izopi luu yiikɔn saa, ka sã mà li tan nɛ, ka lɔ kiɛnlɛ-a ǹ gɔnɔn ganaa, a lon wɔ laanka a wàã li ǹ wɔn nɛ. Kaa min kɔ́n baran soo a n bɔ a kion wa, yǎa baayɛlɛ.

²³ Dɛnaa á re boe Ezipti gána gɔ́ɔ̃ nɛ, a dɔlɔ bɔ a ganaa, á re mà lɛ yii kaa kiɛnlɛ-a ǹ gɔnɔn ganaa, a lon laanka a wàã li ǹ wɔn nɛ. Bɛ lɛ a lɛa, Dɛnaa á re kiɛ̃ kiɛnlɛ lɛ lɛ-a, a re toɛ bɔ̀n-dali lɛ wɔ kaa kionən ne, a bɔ̀n da wa.

²⁴Ka bɛ din tumaa tamaa, ka zɛnaa. Boo ne, á n pɛ ka dinin manɛ ka kaa nɛnyaanan nɛ yǎa duduu.

²⁵Dɛnaa din bɛ́ á pɛ mà asɛ á re gána mɛn koe ka la, bɛ̀ ka dɔ bɛ nɛ ǹ mɛn waáraa, ka landa sii kɛ tamaa.

²⁶Bɛ̀ kaa nɛnyaanan nə́ nɔ̀n da mà landa sii ke, ka á zɛnɛɛ, mà a n wàa giala pii,

²⁷ka die ka pɛ ǹ nɛ kɛnɛn: «*Kiɛ̃mala ǹ zɔ́n *wúlu màn nɛ, wɔ á boe koe Dɛnaa la. A giala, a na á kiɛ̃, á wɔsɛn Izirayeli nɛnyaanan kionən toa walan Ezipti gána nɛ. A bɛ́ bɔ̀n diɛ Ezipti gána minin ganaa, á wɔsɛn kion minin si gɛ̀ la.» Zaman lɛ kaa tán, á Lawa guguru kɔ.

²⁸Izirayeli nɛnyaanan lɛn nə́ tɔn woo kəni, ǹ nə́ yoo dí li, ǹ nə́ sii tumaa zɛnaa tɛrɛɛnɛ, ka Dɛnaa bɛ́ á pɛ Muizu laanka Aarɔn nɛ lɔn.

²⁹ Làan nɛ, Dɛnaa bɔ̀n da Ezipti minin nɛgiĩ bibinaan tumaa ganaa. A kũ *Faarahɔn din a nɛgiĩ bibinaa kɛ ganaa, ǹ mɛn doamaa bɛ́ a kii baa a kio lɛ-n, a wo kòso nɛ wɔ yaa, ka tɔɔn wɔn tumaa nɛ.

³⁰Faarahɔn yoo bɛa tèlò kɛ lɛ nɛ, ka a kiodɛnan laanka Ezipti gána minin tumaa nɛ. Wuu gole bɔ Ezipti gána nɛ, a giala, kion goã, mà min ná a gã a-n wa.

³¹Á lɛ dia Muizu laanka Aarɔn la tèlò-n, á pɛ: «Ka soo, ka n bɔ maa gána minin li, ka laanka Izirayeli nɛnyaanan lɛn nɛ. Ka woo ka dí nya kaa Dɛnaa lɛ nɛ, ka ka bɛ́ ka pɛ lɔn.

³²Kaa tɔɔn lɛn, kaa sèren ne, kaa bòen ne, kaa diin ni, ka ǹ loo ka ka bɛ́ ka pɛ lɔn. Haya! Ka sawaa kɔn-a ǹ fòo da ma nɛ, ka woo.»

³³Ezipti gána minin lɛn nə́ zaman lɛ nyankɔ, ǹ nə́ zii kɔ ǹ la fufuu, mà ǹ soo ǹ nə bɔ gána lɛ nɛ. Maǹ taasɛ mà ǹsɛn tumaa n die giɛ̃.

³⁴Zaman lɛ nɔmaa á yoo ka a buuru wùsu yia nɛ bɛ̀ a ná a tɔn yoo wa. Ǹ nə́ ǹ wùsu yia ǹ mànan yii ǹ mɔnaan nɛ, ǹ nə́ ǹ kaa ǹ wìi li.

³⁵ Izirayeli nɛnyaanan lɛn nə́ ǹ sii zɛnaa, á kɔnpɛ ka Muizu a boo ne. Ǹ nə́ wɔrɔgiala mànan nyankɔ Ezipti minin lɛn la, ka sana mànan nɛ, ka mɔnaa dadaran nɛ.

³⁶Dɛnaa zaman lɛ gɛrɛsiɛ bɔ Ezipti gána minin lɛn lon, ǹ nə́ lɛ kɔ, ǹ nə́ ǹ màn nyankoen lɛn kɔ ǹ la. Maǹ nə́ Ezipti gána minin lɛn gɔn yu bɛa yɔrɔ kɛ lɛ la.

³⁷Izirayeli nɛnyaanan lɛn nə́ soo Ramusɛsi kiwi, ǹ nə́ woo Sukɔti. Ǹ nə́ woo dɔ giĩ duu biɛsɔrɔ (600 000) kɛ miã, nɛnyaanan nə́ ǹ ba a-n wa.

³⁸Tɔrɔ kɔsɔ minin nə́ goã kunun ǹ ni giãgiã, tɔɔ giãgiã nɛ, sèren ne, bòen ne, ka diin ni.

³⁹Ǹ soo ka buuru wùsu yia mɛn nɛ Ezipti gána nɛ, ǹ nə́ bɛ da mɔ̀mɔ lɛa, yɔ bù ná a ba li wa, a giala, a yoo wa. Ǹ bɛ́ ǹ bie ǹ nə́ n yɔrɔ bɔ, ǹ nə́ tɔ́n nə ǹ loo Ezipti gána lɛ-n wa, ǹ boo la ǹ nə́ màn-bii saa wa.

⁴⁰ Izirayeli nɛnyaanan lɛn man nə́ lɛ̀ biɛsii ka pɔsɔɔ (430) zɛnaa Ezipti gána nɛ.

⁴¹Lɛ̀ biɛsii ka pɔsɔɔ lɛ a lɛ piɛ̃ li, bɛa pinaa kɛ lɛ din taãn-taãn nɛ, Dɛnaa a zaman lɛ soo ka tɛrɛɛnɛ, ǹ nə́ n bɔ Ezipti gána nɛ.

⁴²Dɛnaa din na á n yii dɔraa bɛa tèlò kɛ lɛ nɛ, á soo ka a zaman lɛ nɛ, á bɔ Ezipti gána nɛ. Bɛa tèlò kɛ lɛ n Dɛnaa wɔ lɛa, Izirayeli nɛnyaanan doamaa nɛ, lɛ̀ woo lɛ̀, ǹ nə n yii dɔraa bɛa tèlò kɛ lɛ nɛ, ǹ tamaa.

⁴³Dɛnaa pɛ Muizu laanka Aarɔn nɛ: «Kiɛ̃mala ǹ zɔ́n lɛ a zɛnaa ǹ gɔn nə́ ke: - Tii kɔ́n ba re màn lɛ bii wa.

⁴⁴- Bɛ̀rɛ woo bɛ̀rɛ, ka pii ka wɔrɔ nɛ, ka kuru bɔrɔ, a tɔn boo la a màn lɛ bii.

⁴⁵- Tii mɛn bɛ́ giã nɛ ka bii, hinlaa min mɛn bɛ́ dí nyɛɛ giɛ wɔrɔ li, bɛn doamaa bie ka zɔ́n man-bii kɛ-n wa.

⁴⁶ - Siĩ lɛ nə n soɛ̃ kion goon gɔ́ɔ̃ nɛ. Min baran soo ka a lɛkoro-n kanaa wa. - Ka baran a wen yiyiɛ wa.

⁴⁷- Izirayeli minin tumaa doamaa nɛ, ǹ bɛa zɔ́n kɛ lɛ zɛnaa.

⁴⁸- Gùli mɛn bɛ́ giã nɛ ka li, bɛ̀ bɛ́ pɛ, mà asɛ n die zɔ́n lɛ zɛnɛɛ, a na a kion a giĩ tumaa kuru bɔrɔ. Á re boe la kəni, a n mɔrɔ a zɔ́n lɛ zɛnaa, a n die goɛ̃ ka Izirayeli min bɛ́ lɔn. Sɛnɛ, kurii baãnaa kɔ́n baran zɔ́n lɛ zɛnaa wa.

⁴⁹- Sii zɛnaa ǹ yɔrɔ kɛ lɛ n Izirayeli minin wɔ lɛa, ka tiin mɛnɛn dɔn bɛ́ giã nɛ ka li.»

⁵⁰Izirayeli nɛnyaanan tumaa zɛnaa miɛ̃. Ǹ nə́ zɛnaa á kɔnpɛ ka Dɛnaa a boo kɛ nɛ, á pɛ Muizu laanka Aarɔn nɛ.

⁵¹Bɛa pinaa taãn kɛ lɛ nɛ, Dɛnaa soo ka Izirayeli nɛnyaanan lɛn nɛ, á ǹ bɔ Ezipti gána nɛ, á ǹ kakaa kun ka zia-baalin bɛ́ lɔn.