Read Samo, Southern BBN 13 Bible Online

BBN 13 - Samo, Southern bible

BBN 13

¹Dɛnaa pɛ Muizu ni:

² — Izirayeli nɛnyaanan nɛgiĩ bibinaan bɔ, n nə ǹ koa masɛ wɔn lɛa. A giala, Izirayeli nɛnyaanan bii, lɔ gɔn binaa nɛ mɛn bɛ́ giĩ lɛa, bɛ n masɛ wɔ lɛa. Tɔɔn dɔn wɔ baa miɛ̃.

³A pɛ zaman lɛ-n kɛnɛn: Ka n yiri kɔ lɛawaa kɛ li, ka soo ka n bɔ Ezipti gána nɛ ǹ mɛn pinaa, ka baa zɔ́n lɛa, gána mɛn bɛ́ ka goã bɛ̀rɛbaa nɛ a nɛ. A giala Lawa na á soo ka ka nɛ ka a din pàã nɛ. Bɛa pinaa kɛ nɛ, ka baran toa ka buuru yɔ bùdɛnaa wɔ ka lɛ-n wa.

⁴Pelo ne ka á soe, mui bibinaa kɛ lɛ nɛ.

⁵Dɛnaa n woe ka kiɛ Kanaan minin gána kɛ nɛ, Ɛti minin gána ke ka Amɔɔrɔ minin wɔ nɛ, Ivii minin laanka Zebuzu minin gána kɛ nɛ, a din bɛ́ á n lɛ kɔ, mà a n die gána mɛn lɛ koe ka digolon la. Tɔɔ-too laanka tán-kɔsiɛ n bǐɛ̃ koe bɛa gána kɛ lɛ nɛ. Bɛ̀ Dɛnaa ka kaa bɛ nɛ ǹ mɛn waáraa, ka die ka toa ka bɛa sii kɛ lɛ zɛnaa mui bibinaa kɛ lɛ nɛ.

⁶Lɛawaa sɔbaa gɔ́ɔ̃ nɛ, ka buuru sɔ̃ yɔ bù ná a ba li wa. A lɛawaa sɔbaabaa ǹ wɔ pinaa die a zɔ́n baa, ka zɛnaa Dɛnaa a lɛa.

⁷Lɛawaa sɔbaa gɔ́ɔ̃ nɛ, ka buuru sɔ̃ yɔ bù ná a ba li wa. Min yii baran mɛ yɔ bù buuru ganaa wa. Min yii baran mɛ yɔ bù ganaa gána lɛ din tumaa gɔ́ɔ̃-n wa.

⁸Bɛa zɔ́n kɛ lɛ li, ka die ka bɛa sii kɛ lɛ a daraa kɔ kaa nɛnyaanan la. Ka pɛ ǹ nɛ: «Dɛnaa bɛ́ á bǐɛ̃ zɛnaa wɔ nɛ, á soo wɔ nɛ á wɔ bɔ Ezipti gána nɛ, bɛ lɛ a lɛa nɛ.»

⁹Zɔ́n kɛa zɛnaa n die goɛ̃ ka gɔn, goon ka nyaǹ kɛ nɛ ka gɔn laanka ka nyanlɛ ganaa. Á re nyɛɛ ka nɛ mà ka doamaa nɛ, ka n yiri gisĩ a nɛ, ka Dɛnaa a boo lɛ pɛ. Zɔ́n kɛ n die ka yiri gisĩ a nɛ, mà Dɛnaa din na á soo ka nɛ, á ka bɔ Ezipti gána nɛ, ka a din pàã gole kɛ nɛ.

¹⁰Lɛ̀ woo lɛ̀, ka bɛa dí-pɛ kɛ lɛ a sii zɛnaa a kɔnpɛ a lɛawaa nɛ.

¹¹Bɛ̀ Dɛnaa daa Kanaan gána kɛ kɔ ka la, ka a bɛ́ á n lɛ kɔ ka la lɔn, á kɔ ka digolon dɔn la,

¹² ka daa ka kaa nɛgiĩ binaan tumaa kɔ Dɛnaa la, ka kaa tɔɔn dɔn wɔn nɛ.

¹³Sɛnɛ, dundun nɛ binaa mɛn bɛ́ sa lɛa, ka bɛ lonkɔ ka sère ne. Bɛ̀ ka a lonkɔ wa, ka a mìi yu a dungiala ganaa, a gã. Nɛgiĩ binaa din tumaa kaa nɛnyaanan bii, ka wusoo ka bɛn mìi bɔ.

¹⁴Lawa mà bɛ̀ kaa nɛnyaanan nə́ nɔ̀n da ka la kio mà wàa nɛ ka tá kɛ zɛnɛɛ, ka pɛ ǹ nɛ kɛnɛn: «Dɛnaa na á soo ka wɔ nɛ, á wɔ bɔ Ezipti gána nɛ ka a din pàã nɛ, á wɔ bɔ bɛ̀rɛbaa nɛ.

¹⁵Sonbore, *Faarahɔn bɛ́ n too kaka koe, a ná a ba toɛ wɔ tá soe woe wa, Dɛnaa na á Ezipti gána a nɛgiĩ binaa tumaa dɛ, ǹ nə́ gã. A kũ minbuiinin wɔn ganaa, a wo tɔɔn wɔn yaa. Bɛ lɛ na á toa, wɔa tɔɔn nɛ binaa mɛn tumaa bɛ́ gɔ̀lɔ̀n lɛa, wɔ tá bɛ dii *wúlu màn lɛa Dɛnaa nɛ. Minbuiinin nɛgiĩ binaan kɛn, wɔ n bɛn mìi boe.»

¹⁶Zɔ́n kɛa zɛnaa n die goɛ̃ ka gɔn, goon ka nyaǹ kɛ nɛ ka gɔn laanka ka nyanlɛ ganaa. Á re ka yiri gisĩ a nɛ, mà Dɛnaa din na á soo ka nɛ, á ka bɔ Ezipti gána nɛ, ka a din pàã gole kɛ nɛ.

¹⁷Faarahɔn bɛ́ á toa zaman lɛ soo, Lawa nə́ ǹ nyɛɛnaa ǹ bɔ. A Filisiti minin gána a zii kɛ kũ ǹ ni wa, a laan bɛa zii lɛ goã kunu. Lawa yɛ mà bɛ̀ zaman lɛ dɔ̃ mà a doamaa nɛ a zia da, mà a yiri á re n bɔyɛɛ, mà á re wusii a wo Ezipti gána nɛ.

¹⁸Lawa zaman lɛ yɔrɔ bɔyaa á dia Sawɛɛ tà diə gole la. Izirayeli nɛnyaanan lɛn man nə́ soo, ǹ nə́ n bɔ Ezipti gána-n ka màn gigiã nɛ.

¹⁹ Muizu nə́ ǹ digolo Zozɛfu wen goa. A giala, Zozɛfu dinmaa na á goã á laa Izirayeli nɛnyaanan lɛn ganaa, mà ǹ nə n liɛ, mà ǹ tá re woe ka asɛ wen ne. Á pɛ ǹ nɛ: «Sàabaa ba la wa, Lawa á die bǐɛ̃ zɛnɛɛ ka nɛ. Bɛa biikoo li, ka masɛ wen waa, ka ǹ bɔ kànaa.»

²⁰Ǹ nə́ soo Sukɔti kiwi, ǹ nə́ woo golee Etamu kiwi, diə gole lɛkoro-a.

²¹Dɛnaa dinmaa na á goã ǹ nyɛɛnaa ǹ boe. Lɛawaa li, tɛmaa bara goon nə ǹ nyɛɛnɛ, zii nyɛɛ ǹ nɛ. Tèlò-n tɛ bara goon ne, a n wɔlɔ fúli ǹ ni. Bɛa yɔrɔ kɛ lɛ la, maǹ nə́ goã boe la ǹ nə́ tɔ we penleen laanka tèlò.

²²Lɛawaa li, tɛmaa bara lɛ goã n boe zaman lɛ lalan wa. Tèlò-n dɔn, tɛ lɛ dɔ goã n boe wa.