Read Samo, Southern BBN 14 Bible Online

BBN 14 - Samo, Southern bible

BBN 14

¹Dɛnaa boo da Muizu ni:

²«A pɛ Izirayeli nɛnyaanan lɛn manɛ, mà ǹ nə n lɛ goa ǹ da gole Piayirɔti kiwi yɔrɔ-a, Migdɔli kiwi laanka tà bii ni. Ǹ giã walan Bali-Sefɔn yɔrɔ-a gɔrɔ, kunu tà lɛ ganaa.

³*Faarahɔn tá re pii ǹ wɔ paǹ li kəni, mà ǹ nə́ ke n binbirin boe gána lɛ nɛ, ǹ yiri n yoo ne, don papaã ǹ la.

⁴Lawa mà asɛ á re toɛ Faarahɔn too kaka kɔ, a yoo a ǹ kio loo. Sɛnɛ, mà asɛ á re a din tɔ bɔ ǹ siin zɛnɛɛ Faarahɔn laanka a pàã din tumaa ganaa. Mà Ezipti gána minin tumaa á re doɛ̃, mà asɛ din nə Dɛnaa Lawa lɛa.» Ǹ dɔn nə́ zɛnaa miɛ̃.

⁵Minin nə́ pɛ Faarahɔn nɛ, mà Izirayeli nɛnyaanan lɛn nə́ baa si. Faarahɔn laanka a dí-nyalin taasiɛ nə́ n bɔyaa Izirayeli nɛnyaanan zaman lɛ wɔ paǹ li. Ǹ nə́ pɛ: «Wɔ n wɔ́ wàa zɛnaa kɛnɛn, wɔ́ toa Izirayeli nɛnyaanan lɛn nə́ soo, ǹ nə́ wɔa dí toa walan.»

⁶A ná a wotoro yɔrɔ bɔ, a ná a zaman kũ, ǹ nə́ woo kun ka a din ni.

⁷Á soo ka ziabaa ǹ wotoro sonbore biɛsɔrɔ (600) nɛ, ka Ezipti gána a ziabaa ǹ wotoron tumaa nɛ, zia-baalin nə́ ǹ gɔ́ɔ̃ nɛ.

⁸Dɛnaa toa Ezipti gána a kii Faarahɔn too kaka kɔ. Á yoo á Izirayeli nɛnyaanan loo, Izirayeli nɛnyaanan mɛnɛn nə soo, ǹ nə́ n bɔ bɛ̀rɛbaa nɛ.

⁹Izirayeli nɛnyaanan lɛn bɛ́ ǹ nə́ golee tà lɛ-a, Ezipti minin lɛn nə́ ǹ loo. Ǹ nə́ daa dɔ ǹ ganaa walan, dia-n woe Piayirɔti kiwi la, Bali-Sefɔn yɔrɔ-a. Faarahɔn na á daa ka ziabaa ǹ màn tumaa nɛ: a zia-baalin ni ka a sùin ni, a wotoron ne, ka a wotoron sùi lɛ-kũlin ni.

¹⁰Faarahɔn bɛ́ á diri, Izirayeli nɛnyaanan nə́ n yii saa, ǹ nə́ ga. Ǹ nə́ yɛ mà Ezipti minin lɛn man nə́ zii saa, ǹ tá ǹ kio lui. Nyɛ́ɛ nə́ ǹ kũ parsiini, ǹ nə́ n lɛ dɛ Dɛnaa Lawa ganaa.

¹¹Ǹ nə́ pɛ Muizu ni: «Yalan man nə́ nyaabaa Ezipti gána nɛ, ń nə́ die wɔ kiɛ gɛ̀ kooro li don bii? Wàa mɛn sii ni ń zɛnaa wɔ-n kɛnɛn? N bɛ́ ń wɔ kũ ń soo wɔ nɛ, ń wɔ bɔ Ezipti gána nɛ.

¹²Táa wɔ pɛ n nɛ gána lɛ-n walan, wáa n toa wɔ dí nya Ezipti minin lɛn manɛ! Wɔa dí nya Ezipti minin lɛn ma-n tá soɛ wɔ ganaa gã don bii kɛ nɛ.»

¹³Muizu pɛ zaman lɛ nɛ: «Ka baran nyɛ́ɛ baa wa. Ka golee kiĩni ka ga Dɛnaa a minin kirisibaa ǹ sii kɛ ganaa a n die zɛnɛɛ ka-n pelo. Sonbore, ka yii bɛ́ Ezipti minin mɛnɛn ganaa pelo ke, ka yii ba re ǹ yii doo duduu wa.

¹⁴Dɛnaa din nə die kaa zia gii diɛ. Kasɛn nə giã ka kiĩni!»

¹⁵Dɛnaa pɛ Muizu ni: «Wàa na á baa, n tá n lɛ dii ma ganaa? A pɛ Izirayeli nɛnyaanan lɛn manɛ, mà ǹ yoo ǹ zii tɔ wɔ!

¹⁶N dinmaa lɛ nə n bàlà saa lon, n nə n gɔn dia tà lɛ la. N tà lɛ bii kuru kɔn, màn mɛn bɛ́ toɛ, Izirayeli nɛnyaanan nə kiɛ̃, ǹ gòã ná a ba n siɛ̃ mu li wa.

¹⁷Ma á re toɛ Ezipti minin lɛn too kaka kɔ, màn mɛn bɛ́ toɛ, ǹ wɔ mu lɛ li ka kio. Má tɔn ma din tɔ bɔ ǹ sii zɛnaa Faarahɔn ganaa, ka a ziabaa ǹ mànan tumaa nɛ, a wotoron ne, ka a sùi lɛ-kũlin ni.

¹⁸Bɛ̀ má ma din tɔ bɔ ǹ sii zɛnaa Faarahɔn ganaa, ka a wotoron laanka a sùi lɛ-kũlin ni bɛa yɔrɔ kɛ la, Ezipti minin tá re doɛ̃, mà ma din nə Dɛnaa Lawa lɛa.»

¹⁹Dɛnaa a lon a dia dí-a wole mɛn goã tɔ we Izirayeli nɛnyaanan lɛn nyɛɛnɛ, bɛ́ kiɛ̃ á giã ǹ kio ganaa. Tɛmaa bara lɛ dɔ yoo ǹ nyɛɛnɛ, á daa ǹ kio.

²⁰Bɛa bara lɛ wɔ Ezipti minin lɛn laanka Izirayeli nɛnyaanan bii ni. Bara lɛ na á goã, a n wɔlɔ fúli paǹ goon, bɛ̀ tèlò a wɔlɔ tì tá paǹ kɔsɔ kɛ li. Tèlò lɛ tumaa gɔ́ɔ̃ nɛ, ǹ nə n mɔrɔ kɔn wa.

²¹Muizu nə́ n gɔn saa lon tà lɛ la. Dɛnaa lɛ̀giala piɛ̃ gole kɔ́n da bɔ ganaa tèlò lɛ tumaa gɔ́ɔ̃ nɛ. Á tà lɛ a mu kurəə ne, mu lɛ nə́ n na kɔn, tà lɛ gɔ́ɔ̃ n laa nɛ.

²² Izirayeli nɛnyaanan lɛn nə́ wɔ tà gɔ́ɔ̃ gere lɛ nɛ, ǹ nə́ kiɛ̃. Mu lɛ n soe-n kɔn ǹ paǹan paanan li ka kungɔn bɛ́ lɔn.

²³Ezipti minin lɛn nə́ ǹ kio loo, ǹ nə́ wɔ ǹ kio. Faarahɔn a sùin tumaa, ka a wotoron ne ka a sùi lɛ-kũlin ni, ǹ nə́ wɔ yǎa mu lɛ bii.

²⁴Baayɛlɛ yiisoo lɛn li, Dɛnaa nə n toa tɛ laanka tɛmaa bara lɛ bii, á ga Ezipti minin lɛn ganaa, á lɔlɔkɔn wɔ ǹ bii.

²⁵Á ǹ wotoro gòãn guguru kɔ, ǹ da-baa-a kaka kɔ. Ezipti minin lɛn nə́ pɛ kɔn nɛ: «Ka daa wɔ wusoo, wɔ n bɔ Izirayeli nɛnyaanan lɛn kio. A giala, Dɛnaa Lawa din nə ǹ zia gii diɛ Ezipti ganaa!»

²⁶Dɛnaa pɛ Muizu ni: «N gɔn saa lon tà lɛ la, mu lɛ wusoo a daa, a kaa Ezipti minin kɛn la, ka ǹ wotoron laanka ǹ sùi lɛ-kũlin ni.»

²⁷Muizu nə́ n gɔn saa lon tà lɛ la. Haya, lɛawaa biikoo li, tà mu wusoo a ná a lɛlɛ a giã ǹ gɔn saa. Ezipti minin lɛn baasiimaa nə́ n da mu lɛ lɛ gɔrɔ. Dɛnaa toa ǹ nə́ papaã li.

²⁸Mu lɛ wusoo á daa, á n kɔ wotoron lɛ, ka sùi lɛ-kũlin ni. Faarahɔn a zia-baalin mɛnɛn tumaa kaa tà lɛ gɔ́ɔ̃ nɛ Izirayeli minin lɛn kio, min kɔ́n bɔ bɛn bii wa.

²⁹Sɛnɛ, Izirayeli nɛnyaanan man nə́ tɔ wɔ tà gɔ́ɔ̃ gere bii, mu lɛ n soe-n kɔn ka kungɔn bɛ́ lɔn ǹ paǹan paanan li.

³⁰Dɛnaa din na á Izirayeli nɛnyaanan kirisibaa Ezipti minin ganaa bɛa pinaa kɛ lɛ nɛ. Izirayeli nɛnyaanan yii Ezipti minin geren yɛ tà lɛ lɛ-a.

³¹Izirayeli nɛnyaanan nə́ Dɛnaa Lawa Pàãyiidɛnaa kɛ a sii nyaa Ezipti minin ni ǹ gɔn yɛ. Zaman lɛ nyɛ́ɛ baa Dɛnaa nɛ. Ǹ nə golee Dɛnaa li, ka Muizu mɛn dɔ bɛ́, a dí-nyali lɛa.