Read Samo, Southern BBN 16 Bible Online

BBN 16 - Samo, Southern bible

BBN 16

¹Ǹ nə́ soo Elimu, ǹ nə́ woo dɔ Sini don, Elimu laanka Sinayii kele bii ni. Ǹ nə́ woo dɔ walan, ǹ soo Ezipti gána nɛ a mui paabaa ǹ wɔ a lɛawaa fulusooro pinaa.

²Don lɛ gɔ́ɔ̃ nɛ, Izirayeli nɛnyaanan zaman lɛ tumaa zùũzùũ si, Muizu laanka Aarɔn ganaa.

³Izirayeli nɛnyaanan lɛn nə́ pɛ ǹ nɛ: «Á ke le! Wɔ bɛ́ siĩ soɛ̃, wɔ n màn dɔ bii wɔ n kiɛ̃ Ezipti gána nɛ ǹ mɛn waáraa, toa bɛ̀ Dɛnaa na á wɔ dɛ bɛa biikoo kɛ li. Á ke, ka soo ka zaman kɛ tumaa nɛ, ka daa wɔ-n don gɔ́ɔ̃ nɛ, wɔ n die giɛ̃ ka bòo ne!»

⁴ Dɛnaa pɛ Muizu ni kɛnɛn: «Man die màn-bii boe lon, ma kaa tán ǹ wɔ lɛa. Zaman lɛ á re soe baraabaraa, ǹ nə ǹ lɛawaa gogoon màn-bii goa. A n die n zɛnɛɛ miɛ̃, màn mɛn bɛ́ toɛ, man da ǹ gɔ́ɔ̃ li, ma ga ǹ ganaa, bɛ̀ ǹ tá re tɔ we a kɔnpɛ ka maa boo ne, hinlaa bɛ̀ ǹ ba re tɔ we a kɔnpɛ-n wa.

⁵Lɛawaa sɔrɔbaa ǹ wɔ pinaa, bɛ̀ ǹ nə́ woo ǹ màn-bii goa lɛ zɛnaa, ǹ tá re yii a la baraabaraa wɔ a goa lɛ nɛ gunyin paa.»

⁶Muizu laanka Aarɔn pɛ Izirayeli nɛnyaanan lɛn tumaa nɛ: «Wasamiɛ̃nɛ, Dɛnaa á re siĩ koe ka la ka sɔ̃, a giala, ka zùũzùũ mɛn si a ganaa, á ma. Ka á re doɛ̃ kəni, mà a din lɛ na á soo ka nɛ, á ka bɔ Ezipti gána nɛ. Biɛ̃ baayɛlɛ dɔn, á re màn-bii koe ka la a ka bɔ, ka á re a gugurubaa yii. Muizu laanka Aarɔn pɛ ǹ nɛ: Wɔsɛn mìi á kiɛrɛ ka zùũzùũ si wɔsɛn ganaa. Bɛ̀ ka tá zɛnɛɛ dɔn, ka bie wɔsɛn gialaa wa, ka n Dɛnaa din gialaa.»

⁹Muizu pɛ Aarɔn nɛ: «A pɛ Izirayeli nɛnyaanan zaman lɛ tumaa nɛ, mà ǹ da Dɛnaa yɔrɔ-a, a giala, á ǹ zùũzùũ sii lɛ ma.»

¹⁰Aarɔn bɛ́ boo diɛ zaman lɛ nɛ, ǹ nə́ n yɔrɔ bɔyaa ǹ nə́ dia don la, Dɛnaa a fulu tɛ-pɛle tɔn nə n din nyaa tɛmaa bara lɛ bii.

¹¹Dɛnaa boo da Muizu ni:

¹²«Má Izirayeli nɛnyaanan zùũzùũ sii lɛ ma. A pɛ ǹ nɛ kɛnɛn: Wɔlɔ nyin giɛ̃ biikoo li, ǹ tá re siĩ soɛ̃, baayɛlɛ, ǹ tá re màn bii ǹ kã, ǹ tá re doɛ̃ mà ma din Dɛnaa lɛ nə ǹ Lawa lɛa.»

¹³Wasamiɛ̃n lɛ din ni, bàan bisinin kɔnɔn nə́ daa ǹ nə́ giã ǹ bǎã lɛ pã, baayɛlɛ dɔn, pele bɔ á giã ǹ bǎã lɛ lɛnpɛnɛ.

¹⁴Pele lɛ bɛ́ á kaa, màn kɔ́n tɔn goã tán don lɛ nɛ, a n bisin ka la gii bɛ́ lɔn a golee yɔyɔrɛɛ-n wa.

¹⁵ Izirayeli nɛnyaanan lɛn nə́ ga a ganaa, ǹ nə́ pɛ kɔn nɛ kɛnɛn: «Kɛ n wàa lɛa?» A giala, a bɛ́ màn mɛn lɛa, ǹ goã bɛ doɛ̃ wa. Muizu pɛ ǹ nɛ: — Màn-bii ni, Dɛnaa n koe ka la mà ka bii.

¹⁶Dɛnaa màn mɛn pɛ, bɛ á ke: «Ka bɛ́ boe ǹ mɛn la ka bii, ka bɛ goa. Kiondɛnaa gogoonmaa na a kion minin wɔ goa, a goa a kɔnpɛ a kion minin lɛn nɛ, a goa kunun yii sii min goon wɔ lɛa.»

¹⁷Izirayeli nɛnyaanan man nə́ zɛnaa kɛnɛn: Ǹ tɛnɛn nə́ goa á kiɛ̃, ǹ tɛnɛn nə́ goa á nyaabaa.

¹⁸ Wɔ zɔɔ̃ min gogoonmaa wɔ yii li: min mɛn goa á kiɛ̃, màn mɛ bɛa dɛnaa wɔ li wa, min mɛn goa á nyaabaa, màn nyaabaa bɛ dɔ wɔ ganaa wa. Didie ná a wɔ yɛ á kɔnpɛ ka a din nàn yii ni.

¹⁹Muizu pɛ ǹ nɛ: «Min kɔ́n baran a giala koa yǎa baayɛlɛ wa!»

²⁰Ǹ tɛnɛn nə n too kɔ a lon wa, ǹ ná a giala koa yǎa baayɛlɛ, sɛnɛ, nyuun nə́ kaa a nɛ, á bɔɔ̃. Muizu foo tɔ́n yoo ǹ li.

²¹Maǹ nə́ goã goɛ baayɛlɛ woo baayɛlɛ, didie n goɛ á kɔnpii ka a din nàn yii ni. Bɛ̀ wasa dii, a gialakun kɛ n yoe.

²²Lɛawaa sɔrɔbaa ǹ wɔ pinaa, maǹ goɛ á kɔnpii lɛawaa paa màn-bii ni, kunun yii kiwisi min goon wɔ lɛa. Zaman lɛa nyɛɛnaandɛnan tumaa daa a yɔrɔ pɛ nɛ.

²³ Muizu tɔ́n pɛ ǹ nɛ: «Dɛnaa na á bɛ lɛ pɛ, biɛ̃ n *susu ǹ pii lɛa, Dɛnaa din a lɛawaa nɛ. Màn mɛn bɛ́ kɔrɛ ǹ wɔ lɛa, ka bɛ kɔrɛ pelo, ka a pipi ǹ wɔ pipi. A giala mɛn bɛ́ goɛ̃, ka bɛ tamaa yǎa baayɛlɛ.»

²⁴Ǹ ná a giala lɛ koa yǎa baayɛlɛ, ka Muizu bɛ́ á pɛ lɔn. Màn bɔɔ̃ wa, nyuun dɔ wɔ a-n wa.

²⁵Á pɛ: «Ka bɛ bii pelo, pelo n Dɛnaa a susu ǹ pii lɛa. Pelo, ka a re bɛa màn kɛ lɛ yii kaa giã ǹ bǎã lɛ kio wa.

²⁶Maǹ goɛ lɛawaa sɔrɔ gɔ́ɔ̃ nɛ, sɛnɛ, lɛawaa sɔbaabaa ǹ wɔ ke, bɛ n susu ǹ pii lɛa, a re yii bɛa pinaa wa.»

²⁷Minin nə́ yɛ zaman lɛ bii, ǹ nə́ soo mà maǹ goɛ bɛa pina kɛ lɛ nɛ, ǹ màn kɔ́n yɛ wa.

²⁸Dɛnaa pɛ Muizu ni: «Ka bɛ́ tɔn nə n piɛ̃ ka maa dí-pɛn laanka maa daraan kɛn lɛ sii ni, yǎa biĩ kəni ka tɔ́n masɛ lɛ sii?

²⁹Ka ga a ganaa, Dɛnaa susu ǹ pii kɔ ka la, bɛ lɛ nɛ, lɛawaa sɔrɔbaa ǹ wɔ pinaa ke, a n lɛawaa paa màn-bii koe ka la. Didie giã a bǎã nɛ. Min kɔ́n baran soo a n bɔ a piɛ lɛawaa sɔbaabaa ǹ wɔ pinaa kɛ-n wa.»

³⁰Bɛ lɛ a lɛa, zaman lɛ nə́ n susu lɛawaa sɔbaabaa ǹ wɔ pinaa kɛ lɛ nɛ.

³¹ Izirayeli minin lɛn nə́ bɛa màn-bii soree kɛ lɛ bíi *maánə. A na á goã ka da we tɔrɔ bisin kɔ́n bɛ́ lɔn, a n fu, kɔɔ̃n ka zoo mɔ̀mɔ bɛ́ lɔn.

³²Muizu pɛ: — Á ke Dɛnaa pɛ: «Ka kunun yii sii tamaa ka kio kaa nɛnyaanan lɛa, màn mɛn bɛ́ toɛ, ma ka dininmaan lɛn too ka màn-bii mɛn nɛ don gɔ́ɔ̃ nɛ, bɛ̀ ma bɛ́ má soo ka nɛ má ka bɔ Ezipti gána nɛ, ka kio nɛnyaanan lɛn die ǹ bɛ dɔ̃.»

³³ Á pɛ Aarɔn nɛ: «Màn saa, n maánə lɛ a kunun yii sii kaa a nɛ, n koa Dɛnaa yɔrɔ-a, a goã tamaa nɛ ǹ kio nɛnyaanan lɛa.»

³⁴Dɛnaa pɛ Muizu-n lɔn, Aarɔn màn lɛ koa lɛ kɔ kɔn la ǹ kɔlɔn kɛn genli.

³⁵ Izirayeli nɛnyaanan lɛn man nə́ maánə bii lɛ̀ pusi gɔ́ɔ̃ nɛ, yǎa ǹ nə́ woo dɔ giã ǹ gána kɔ́n nɛ, bɛ n ka Kanaan gána nɛ.

³⁶Ǹ baraabaraa a màn goa lɛ, kunun yii sii, bɛ n kɔnpii ka ǹ màn zɔɔ̃ ǹ màn goon a talɛɛ fù baa ǹ wɔ nɛ, bɛ tɔ n efaa.