Read Samo, Southern BBN 18 Bible Online

BBN 18 - Samo, Southern bible

BBN 18

¹Zetro n Madiã gána a wúlu-bɔlen goledɛnaa lɛa, Muizu ǹ daãgiĩ dɔ nɛ. Lawa màn mɛn tumaa zɛnaa a laanka Izirayeli a zaman kɛ nɛ, a soo ǹ ne, á ǹ bɔ Ezipti gána-n lɔn, Zetro bɛ yii ma.

² Ǹ daãgiĩ Zetro lɛ Muizu a lɔ Sipora kũ ka a nɛnyaanan nɛ, ǹ nə́ daa a li a giã ǹ bǎã nɛ, don gɔ́ɔ̃ nɛ, Lawa a kele kɛ li. Bɛ na á n zɛnaa, bɛ̀ a bɛ́ á Sipora toa walan ka a nɛnyaan min paa kɛ nɛ: Goon tɔ n Gɛrsɔn, "Gùli", a giala, a na á pɛ: «Masɛ n gùli lɛa bǎã kɔsɔ nɛ», goon kɛ dɔ tɔ n Eliezɛrɛ, bɛ giala mà "maa Lawa lɛ n dɔmalɛ wole lɛa" a giala, mà ǹ digolon Lawa lɛ na á daa n dɔ asɛ lɛ, a ná asɛ si *Faarahɔn a gɔya gɛ̀ la.

⁶Zetro pɛ, mà ǹ pɛ nɛ mà asɛ Zetro ne, a din daãgiĩ ke, mà asɛ n die a li ka a din a lɔ nɛ, ka a nɛnyaan min paa n kun ni.

⁷Muizu soo á n da ǹ daãgiĩ lɛ lɛ, á kaa tán a giulun, á tɔn nə n sɔɔ a nɛ. Ǹ nə́ kaasiĩnii da kɔn nɛ, ǹ nə́ wɔ mɔnaa kion gɔ́ɔ̃ nɛ.

⁸Dɛnaa sii mɛn tumaa zɛnaa Faarahɔn laanka Ezipti minin manɛ, Izirayeli a lɛa, ǹ dinin nə sii kakan mɛnɛn yɛ zii gialaa, Dɛnaa nə́ ǹ kanbaa ǹ ganaa, Muizu bɛ yii laakalaa ǹ daãgiĩ ni.

⁹Dɛnaa bǐɛ̃ mɛn tumaa zɛnaa Izirayeli ni, á bɔ Ezipti minin gɔn, Zetro nə́ n nyɛnyɛɛ bɛ tumaa a lɛa.

¹⁰Á pɛ: «Barka tá Dɛnaa ganaa! Asɛ mɛn bɛ́ á ka bɔ Ezipti minin laanka Faarahɔn gɔn.

¹¹Masɛ á doɛ̃ kanna, má Dɛnaa lɛ n gole á la lawan tumaa nɛ. Á bɛ nyaa Ezipti minin kɛn manɛ, bɛ̀ ǹ bɛ́ Izirayeli nɛnyaanan nɔmɛɛ.»

¹²Ǹ daãgiĩ Zetro lɛ woo *wúlu màn tã kunun ǹ ni, ǹ nə́ wúlu màn tɔrɔ kɔsɔn dɔn bɔ ǹ nə́ ǹ kɔ Lawa la. Aarɔn laanka Izirayeli a min golen kɛn tumaa daa màn bii Lawa yɔrɔ-a, kun ka ǹ daãgiĩ Zetro lɛ nɛ.

¹³A lɛawaa gɔrɔ, Muizu giã tán, á n kiri we zaman lɛ ganaa. Zaman lɛ goã a yɔrɔ-a, baayɛlɛ yǎa wasa woo mɛ.

¹⁴A bɛ́ dí mɛn tumaa nyɛɛ zaman lɛ nɛ, ǹ daãgiĩ lɛ bɛ lɛ tumaa yɛ. Á pɛ nɛ: «Wàa n kɛ nɛ n tá zɛnɛɛ zaman lɛ nɛ? Wàa na á baa n dinsɔɔ̃ á giɛ̃ tán, n tá kiri lɛ we, zaman kɛ tumaa n golee ne n yɔrɔ-a, baayɛlɛ yǎa wasa miɛ.»

¹⁵Muizu pɛ ǹ daãgiĩ lɛ nɛ: «Zaman lɛ n die ma li, ǹ nə́ nɔ̀n diɛ Lawa la ka siin ni.

¹⁶Bɛ̀ zia tá ǹ bii ni, maǹ die ma a yɔrɔ bɔ. Man zia lɛ nyɛɛ ǹ bii ni, ma tɔn Lawa a dí-pɛn laanka a daraan nyaa ǹ nɛ.»

¹⁷Ǹ daãgiĩ lɛ pɛ nɛ: «N dí nya ǹ gɔn lɛa siĩn wa.

¹⁸N tá re n din pàã nyɛɛ, ka zaman kɛ lɛ dɔ wɔ-n kun ni. Dí lɛ á guguru n ganaa. N ba boe la n nya n dinsɔɔ̃ wa.

¹⁹N too kɔ ma lon sisia! Man die yiri goon koe n la, Lawa dɔ die a n dɔ n lɛ! N nə n zaman lɛ a dia dí-a wole lɛa Lawa yɔrɔ-a,

²⁰n ná a dí-pɛn laanka a daraan nyɛɛ minin manɛ. Ǹ doamaa bɛ́ nɛ, ǹ zii laanka tɔ wɔ ǹ gɔn mɛn saa, n nə n bɛn nyɛɛ ǹ nɛ, ǹ dɔ̃.

²¹Sɛnɛ, bɛ tumaa kio, toa n min barkadɛnan dɔ̃ zaman lɛ bii, nyɛ́ɛ baa Lawa-n wolen lɛa, foo n doa nɛ ǹ ganaa. Ǹ bɛ́ ǹ ba boe la, ǹ min mɛnɛn lɛ pii wa, n bɛn bɔ, n nə ǹ koa zaman lɛ mìi la kiin lɛa, min duu gogoon (1 000) mìi la ka min paabibiɛ nɛ, ka min poposooro ne, ka min fùfù ni.

²²Bɛn tá re zaman lɛ a kiri we biikoo tumaa li. Bɛ̀ sii lɛ mɛn tá guguru, ǹ tá re die bɛ nyɛɛ n nɛ. Sɛnɛ, bɛ̀ ǹ mɛn ba guguru wa, toa ǹ dinin nə bɛ yɔrɔ bɔ. Guĩ lɛ puusə kɔ n din ganaa bɛa yɔrɔ kɛ la, n toa ǹ gũ kunun n ni.

²³Bɛ̀ ń bɛ zɛnaa, bɛ̀ Lawa lɛ kɔ n la, n tá re goɛ̃ kaka, ka bɛ dɔ nɛ, zaman lɛ tumaa á re doe ǹ bǎã nɛ, ka là nyantoro ne.»

²⁴Muizu nə́ n too kɔ ǹ daãgiĩ lɛ lon, a ná a boo lɛ tumaa si, á zɛnaa.

²⁵Izirayeli nɛnyaanan lɛn tumaa bii, Muizu min barkadɛnan bɔ, á ǹ koa zaman lɛ mìi la: kiin lɛa min duu gogoon mìi la, ka min paabibiɛ nɛ, ka min poposooro ne, ka min fùfù ni.

²⁶Bɛn nə́ goã kiri we zaman lɛ ganaa biikoo tumaa li. Bɛ̀ sii lɛ mɛn tá kaka, maǹ die bɛ nyɛɛ Muizu ni, sɛnɛ, sii lɛ mɛn bɛ́ a kaka wa, ǹ dinin man bɛ yɔrɔ boe.

²⁷Muizu tɔ́n zii kɔ ǹ daãgiĩ lɛ la, á woo a gána nɛ.