Read Samo, Southern BBN 19 Bible Online

BBN 19 - Samo, Southern bible

BBN 19

¹Mui sɔɔ Izirayeli nɛnyaanan lɛn soo Ezipti gána-n kio, pelo kɛ lɛ din ni, ǹ nə́ dɔ Sinayii don.

²Ǹ nə́ yoo Refidimu, ǹ nə́ daa dɔ Sinayii don, ǹ nə́ golee don lɛ gɔ́ɔ̃ nɛ. Izirayeli giã walan, kele lɛ yɔrɔ-a gɔrɔ.

³Sɛnɛ, Muizu dii á woo Lawa li. Dɛnaa nə́ n toa kele lɛ la, á lɛ dia la, á pɛ: — N die n kɛ pɛ Zakɔba tɔrɔ minin kɛn manɛ, Izirayeli nɛnyaanan lɛa, n daraa kɛ kɔ ǹ la.

⁴«Ǹ dinin nə́ sii kɛ lɛ yɛ ma zɛnaa Ezipti gána nɛ. Ka sia bɛ́ a nɛnyaanan guĩ lɔn, man má ka goa miɛ̃, má ka gũ, má daa dɔ ka nɛ ma din li.

⁵ Kanna kəni, bɛ̀ ka tá n too koe ma lon, ka n masɛ a lɛ kɔ kɔn la lɛ tamaɛ, ka á re goɛ̃ ma din wɔn lɛa, ka n masɛ a wúlu-bɔle zaman lɛa. Kanaa din tumaa n masɛ wɔ lɛa. Sɛnɛ, tɔrɔ mɛn bɛ́ ma din wɔ lɛa á la yii ni, ka dinin man bɛa tɔrɔ kɛ lɛ a minin lɛa tɔrɔn tumaa bii.» Bɛa boon kɛn lɛn pɛ Izirayeli nɛnyaanan lɛn manɛ.

⁷Muizu wusoo á daa, á lɛ dia zaman lɛ a min golen la, á bɛa boon kɛn lɛn tumaa pɛ ǹ nɛ, Lawa din màn mɛnɛn pɛ nɛ.

⁸Zaman lɛ tumaa na a lɛ si kun: «Dɛnaa din màn mɛn tumaa pɛ, wɔsɛn tá re bɛ tumaa zɛnɛɛ.» Muizu wusoo á daa zaman lɛ a boon lɛn pɛ Dɛnaa nɛ.

⁹Dɛnaa pɛ nɛ: — Á ke, masɛ á re die n li tɛmaa bara kaara kɛ bii, màn mɛn bɛ́ toɛ, bɛ̀ ma á boo diɛ n nɛ, zaman lɛ ma, ǹ boo la ǹ golee n dɔ li yǎa duduu. Muizu wusoo á zaman lɛ a boon lɛn pɛ Dɛnaa nɛ.

¹⁰Dɛnaa pɛ-n doo: «Wo zaman lɛ li, n na a *yoreen kɔ pelo laanka biɛ̃ nɛ. A pɛ ǹ nɛ, mà ǹ nə ǹ mɔnaan pii,

¹¹ǹ nə n yɔrɔ bɔ lɛawaa sɔɔbaa ǹ wɔ kɛa lɛa. A giala, Dɛnaa n die gisĩ Sinayii kele kɛ la lɛawaa sɔɔbaa ǹ wɔ pinaa kɛ nɛ, zaman lɛ tumaa yɔrɔ-a.

¹² Golee ǹ bǎã lɔ tán zaman lɛ nɛ, n pɛ, mà ǹ nyan dii kele kɛ la wa, ǹ baran n mɔrɔ a lɛkoron dɔn ganaa wa. Min woo min bɛ́ re n mɔrɛ kele lɛ ganaa, ǹ bɛa dɛnaa dɛ a gã!

¹³Min dɔ baran n gɔn da bɛa sii ziziɛ̃ wole kɛ lɛ ganaa wa, sɛnɛ, ǹ dɛ ka kɔlɔ nɛ hinlaa ǹ pã ka kiɛ nɛ. Ta tɔɔ nɛ hinlaa minbuiin ni, a yii baran goã koo wa. Sɛnɛ, bɛ̀ bɛn wuu bɔ, min tɛnɛn nə dii kele lɛ la.»

¹⁴Muizu gisĩ á n bɔ kele lɛ la, á woo zaman lɛ li. Á zaman lɛ yoreen kɔ, á pɛ ǹ nɛ, mà ǹ nə́ ǹ mɔnaan pii.

¹⁵Á pɛ zaman lɛ nɛ: «Ka n yɔrɔ bɔ lɛawaa sɔɔ gɔ́ɔ̃ nɛ. Ka baran n mɔrɔ kaa lɔn ganaa wa.»

¹⁶ A lɛawaa sɔɔbaa ǹ wɔ pinaa lɛ kəni, lɛ̀ bɛ́ á waa, la a ginii wuu bɔ, ka la a tɛ-pɛn nɛ, tɛmaa bara kaara kɔ́n nə́ n kɔ kele lɛ lɛ, bɛn wuu kaka goon bɔ. Zaman lɛ tumaa bìn da ǹ giã ǹ bǎã nɛ.

¹⁷Muizu soo ka zaman lɛ nɛ, á ǹ bɔ ǹ giã ǹ bǎã nɛ, ǹ nə́ woo n da Lawa lɛ. Ǹ nə́ golee kele lɛ genli.

¹⁸Sinayii kele lɛ goã tɛmaa lɛa, a giala, Dɛnaa gisĩ la tɛ bii. A tɛmaa lɛ yoo ka n pɛ mà kùsì gole tɛmaa nɛ, kele lɛ tumaa bìn da taãn-taãnɛ.

¹⁹Bɛn wuu lɛ gole kɔ. Muizu n boo diɛ. Lawa dɔ na a lɛ sii ka la a ginii ni.

²⁰Dɛnaa gisĩ Sinayii kele lɛ mìi ni, á n toa walan á lɛ dia la. Muizu dii.

²¹Dɛnaa pɛ nɛ: «Gisĩ n nə n gɔn waa zaman lɛ nɛ, mà ǹ baran bǎã loe lɛ lanparɛ, mà maǹ die giɛ Dɛnaa ganaa wa dɛ! Bɛ bie wa, ǹ gigiã á re giɛ̃.

²²A laanɛ wúlu-bɔlen mɛnɛn dɔn dinin bɛ́ boe la, ǹ tá n mɔrɛ ma ganaa, ǹ dɔ́n nə *gɔ̀ bɔ ǹ dinin ganaa, màn mɛn bɛ́ toɛ, ma baran yoo ǹ gialaa wa.»

²³Muizu pɛ Dɛnaa nɛ: «Zaman lɛ a boe la a dii kele lɛ la wa, a giala, n nə́ n gɔn waa wɔ nɛ, ń pɛ mà ma bǎã lɔ tán kele lɛ li, zaman lɛ baran n mɔrɔ a ganaa wa.»

²⁴Dɛnaa pɛ Muizu ni: «Gisĩ, bɛ kio, n laanka Aarɔn dii. Wúlu-bɔlen kɛn laanka zaman lɛ baran n nanaa ǹ dii, ǹ da masɛ Dɛnaa li wa, màn mɛn bɛ́ toɛ, ma baran yoo ǹ gialaa wa.»

²⁵Á gisĩ á woo zaman lɛ li, á bɛ lɛ pɛ ǹ nɛ.