Read Samo, Southern BBN 25 Bible Online

BBN 25 - Samo, Southern bible

BBN 25

¹Dɛnaa pɛ-n doo:

²«A pɛ Izirayeli nɛnyaanan manɛ ǹ mànan bobo masɛ Lawa wɔ lɛa. Min mɛnɛn tumaa bɛ́ boe la, ǹ bɛa sii kɛ lɛ zɛnaa ka foo sonbore ne, ka màn si bɛn la.

³Ka bɛ́ re mànan mɛnɛn sii ǹ la, ǹ goã sana lɛa, wɔrɔgiala nɛ ka zan tã nɛ.

⁴Ka kɛn dɔn si. Gɛ̀sɛ korebore ne, a tã nɛ, a tã zenzen ne, mɔnaa guguru sonboren ne, ka bòe ka mɔnaan nɛ,

⁵ka sère kin ni, ǹ nə́ ǹ yii tã kɔ, ka ki kəkə tɔrɔn nɛ. Ka gɔn dɔ si, a n boe da kɛ nɛ a tɔ n kaasia.

⁶Ka bolon da ǹ nyɔɔ si, ka nyɔɔ gìĩ kɔɔ̃nɔn nɛ, lɔ minin ganaa ǹ wɔ lɛa, ka a tã ǹ wɔ nɛ.

⁷Ka kɔlɔ sonboren dɔn si, ǹ tɛnɛn nə goã wúlu-bɔlen kiã a dí nya ǹ mɔnaa kɛ paǹ tɛn zɛnaa ǹ kɔlɔn lɛa, ka tìãbii zéwo kɛ nɛ.

⁸Izirayeli nɛnyaanan lɛn tá re ma guguru kɔ ǹ bǎã zɛnɛɛ, ma á re goɛ̃ ǹ bii.

⁹Mɔnaa kion sonbore lɛ zɛnaa, ka màn sonboren kɛn tumaa nɛ, a kɔnpɛ ka sii yɔrɔ-bɔn kɛn nɛ, má n die nyɛɛ ka nɛ.»

¹⁰A pɛ Izirayeli nyɛnyaanan lɛn nɛ, ǹ goo zɛnaa ka kaasia gɔn nɛ. A sasabaa goã gùrù yii paa ka talɛɛ, a pəməbaa goã gùrù yii goon ka talɛɛ, a wo lon dɔ goã gùrù yii goon ka talɛɛ.

¹¹N sana yoreen yoreen kaa la, n kaa a gɔ́ɔ̃ la, n kaa a kanaa la, n sana dɔ a lɛkoro ganaa, n na a lɛnpɛnɛ nɛ.

¹²N sana kaaran màn sii zɛnaa goo lɛ wɔn lɛa, n nə ǹ doa a gòã sii kɛ ganaa. A màn paa goã paǹ goon ganaa, a màn paa dɔ goã paǹ goon kɛ dɔ ganaa.

¹³Bàlàn zɛnaa ka kaasia gɔn nɛ, n sana kaa ǹ la.

¹⁴Bɛa bàlàn kɛn lɛn wɔ goo lɛ a paǹan li ǹ kaaran yalan kɛn nɛ, ǹ goã goo lɛ a gũ ǹ bàlàn lɛa.

¹⁵Bàlàn lɛn man goɛ̃ goo lɛ a kaaran yalan kɛn lɛn nɛ, min ba ǹ boe wa.

¹⁶Ma bɛ́ re dí-pɛn mɛnɛn koe n la ke, n bɛn koa goo lɛ gɔ́ɔ̃ nɛ.

¹⁷ Bɛ kio, n goo lɛ a lɛpii zɛnaa ka sana yoreen yoreen ne. A sasabaa goã gùrù yii paa ka talɛɛ, a pəməbaa goã guru yii goon ka talɛɛ.

¹⁸N sana dɛ, n lon màn yiikoonaa nyín màn paa zɛnaa nɛ, n nə ǹ zɛnaa n nə ǹ doa Goo lɛpii lɛ a lɛkoron paanan ganaa.

¹⁹Goon zɛnaa a lɛkoro goon ganaa, n goon kɛ dɔ zɛnaa a lɛkoro goon kɛ dɔ ganaa. Lon mànan nyínin lɛn zɛnaa, n nə ǹ doa kɔn ka lɛpii lɛ nɛ, gogoon ná a lɛkoron paanan ganaa.

²⁰Lon mànan nyínin lɛn nə n nyàan lɛ bɔ, ǹ nə ǹ dia lon, ǹ nə n nyàa kan kɔ goo lɛpii lɛ lɛ. Ǹ yɔrɔ goã dia-n kɔn la, bɛ̀ ǹ nə́ giɛ Goo lɛpii lɛ ganaa.

²¹Ma bɛ́ re dí-pɛn mɛnɛn koe n la, bɛn koa Goo lɛ gɔ́ɔ̃ nɛ, n tɔn lɛpii lɛ kɔ lɛ.

²²Masɛ n die n toɛ walan lɛ nɛ, man din nyaa n nɛ, Goo lɛpii lɛ lalan, lon mànan lɛn bii ni dí-pɛn tamaa ǹ Goo lɛ la. Ma doamaa bɛ́ nɛ, ma boon mɛnɛn tumaa kɔ n la Izirayeli nɛnyaanan wɔ lɛa, ma á re bɛn tumaa pii n ni.

²³Bɛ kio, n tabala goon zɛnaa ka kaasia gɔn nɛ. A sasabaa goã gùrù yii paa, a pəməbaa goã guru yii goon, a wo lon goã gùrù yii goon ka talɛɛ.

²⁴N sana yoreen yoreen kaa la, n na a lɛkiri zɛnaa ka sana nɛ, n na a lɛnpɛnɛ nɛ.

²⁵N na a lɛ dɔ doo ka gɔn kɔsɔ nɛ, pəmə ka gɔn yii goon bɛ́ lɔn, n na a lɛnpɛnɛ nɛ. N sana kaa bɛa gɔn kɛ lɛ lɛkoro ganaa.

²⁶N sana kaaran màn sii zɛnaa tabala lɛ wɔn lɛa, ǹ kaa a gòã màn sii kɛa gùrù sii kɛ ganaa.

²⁷N kaaranan lɛn doa kunu a lɛ dɔ ǹ gɔnɔn kɛn lɛn li. Ǹ bɛ́ re bàlàn mɛnɛn we tabala lɛ li, ǹ saa, bɛn man we kaaranan kɛn lɛn nɛ.

²⁸Bàlàn zɛnaa ka kaasia gɔn nɛ, n sana kaa ǹ la. Ǹ dinin lɛn man die tabala lɛa saa ǹ bàlàn biɛ.

²⁹N wúlu mànan kaa ǹ mànan zɛnaa: tasanan nɛ, gongonən ne, tàanan nɛ ka yɔ zuməə ǹ mànan nɛ. N nə ǹ tumaa zɛnaa ka sana yoreen yoreen ne.

³⁰ Biikoo tumaa waáraa, n masɛ gɔ ǹ buuru da tabala lɛ la ma yɔrɔ-a.

³¹Bɛ kio kəni, n bolon da ǹ bǎã zɛnaa ka sana yoreen yoreen ne. N sana dɛ, n zɛnaa nɛ. A giala nɛ, a bàlà nɛ, a tàanan nɛ, a kòròn ne ka a nyaǹan kɛn nɛ ka da buũn bɛ́ lɔn, bɛn tumaa nə n zɛnaa kɔn, ka a din sana goon lɛ nɛ.

³²N gùrù sɔrɔ bɔ a paran li, n bolon da ǹ bǎã lɛ a gùrù sɔɔ bɔ a para goon ganaa, n sɔɔ bɔ a para goon kɛ dɔ ganaa.

³³Gùrù goon ganaa tàan sɔɔ goã ka da nɛ bɛ́ lɔn, kòròn laanka da buũ nyaǹan ná a ganaa. Gùrù goon kɔsɔ dɔ ganaa doo, tàan sɔɔ ka da nɛ bɛ́ lɔn, kòròn laanka da buũ nyaǹan ná a ganaa. A n baa miɛ̃ gùrù sɔrɔ kɛ lɛ tumaa ganaa boe bolon da ǹ bǎã lɛ ganaa.

³⁴Gùrù mɛn bɛ́ bii, bɛ ganaa, tàan sii goã ka da nɛ bɛ́ lɔn, kòròn laanka da buũ nyaǹan ná a ganaa.

³⁵Gùrù bibinaa màn paa mɛn bɛ́ boe bolon da ǹ bǎã lɛ ganaa, kòrò goã bɛn giulun, kòrò goã gùrù màn paa kɔsɔ kɛ dɔ giulun, kòrò goã màn paa nyɔɔbaa kɛ dɔ giulun. A n baa miɛ̃, ka gùrù sɔrɔ kɛ lɛ din tumaa nɛ, boe bolon da ǹ bǎã lɛ ganaa.

³⁶Kòròn lɛn laanka gùrùn lɛn man die goɛ̃ kɔn, ǹ tumaa n zɛnaa-n ka a din sana yoreen yoreen kɛ lɛ nɛ, ǹ nə́ dɛ.

³⁷Bolonən zɛnaa, màn sɔbaa, ǹ bɛ́ boe la ǹ fúlu bɔ ka yɔrɔ-a lɔn, ǹ koa miɛ̃.

³⁸Bolon lɛ bɔ ǹ banbaalanan laanka ton kaa ǹ mànan lɛn dɔn doamaa nɛ ǹ goã sana yoreen yoreen lɛa.

³⁹Bolon da ǹ bǎã lɛ laanka a màn bisinin tumaa doamaa nɛ ǹ nə n zɛnaa ka sana yoreen yoreen kilo pɔsɔɔ nɛ.

⁴⁰ Muizu, toa n màn lɛ tumaa zɛnaa, ká a yɔrɔ bɛ́ á n nyaa n nɛ lɔn kele lɛ la.