Read Samo, Southern BBN 29 Bible Online

BBN 29 - Samo, Southern bible

BBN 29

¹N bɛ́ re Aarɔn laanka a nɛgiĩn koɛ lɔn masɛ Lawa wɔn lɛa, ǹ maa dí nya, bɛ á ke: ga dii gɔ̀lɔ̀ ten li ka sère gɔ̀lɔ̀ màn paa nɛ, wɔ̀lɔ̀ ná a ba ǹ ganaa wa.

²Yɔ bùbaã buuru zɛnaa, n kiɔmɔsɔ̃ wùsu yaa ka nyɔɔ nɛ, yɔ bù ná a ba li wa, n da. N mɔ̀mɔ dɔ da ka nyɔɔ nɛ yɔ bù ná a ba li wa. Bɛ tumaa zɛnaa ka buuru wùsu ni.

³Ǹ kaa kankaan nɛ, n da kɔ Lawa la, kun ka dii gɔ̀lɔ̀ ten lɛ laanka sère gɔ̀lɔ̀ màn paa lɛ nɛ.

⁴N da Aarɔn laanka a nɛgiĩn lɛn nɛ, kɔn yɛ ka Lawa nɛ ǹ Kion lɛ a kiɛnlɛ-a, n nə ǹ zoo mu li.

⁵N wúlu-bɔlen mɔnaan lɛn goa, n dɔnkɛ kɛ wɔ Aarɔn ganaa ka dɔnkɛ sasa kɛ nɛ, ka dí nya ǹ mɔnaa kɛ nɛ, ka tìãbii zéwo kɛ dɔ nɛ. N dí nya ǹ mɔnaa lɛ a biɛn kɛn pɛnɛ a ganaa.

⁶N mìi yii ǹ mɔnaa gɔn kɛ da a mìi ganaa, n bɔ n koa Lawa wɔ lɛa ǹ gɛlɛ da mìi yii ǹ mɔnaa lɛ ganaa.

⁷Bɛ kio, n min koa Lawa wɔ lɛa ǹ nyɔɔ kɛ saa, n kaa a mìi ni, n koa masɛ Lawa wɔ lɛa.

⁸Da ka Aarɔn a nɛgiĩn lɛn dɔn nɛ, n mɔnaa wɔ ǹ ganaa.

⁹N binbin yii ǹ màn yii ǹ bɔsɔ̃-n, n bafolon wɔ ǹ mìin ganaa kəni. Wúlu bɔ ǹ dí lɛ nə ǹ dinin wɔ lɛa, a kɔnpɛ ka sii yɔrɔ bɔ kɛ nɛ. Bɛ ba n bɔyɛɛ doo duduu wa. Bɛa sii kɛ lɛ n die wúlu bɔ ǹ dí lɛ koe Aarɔn laanka a nɛnyaanan la.

¹⁰Da ka dii gɔ̀lɔ̀ ten lɛ nɛ kɔn yɛ ka Lawa nɛ ǹ kion lɛ a kiɛnlɛ-a. Aarɔn laanka a nɛgiĩn nə n gɔn da a mìi ni.

¹¹N dii gɔ̀lɔ̀ lɛ bɔlɔ kuru Dɛnaa yɔrɔ-a, kɔn yɛ ka Lawa nɛ ǹ kion lɛ a kiɛnlɛ-a.

¹²Dii lɛ mà bɔ ka n gòon ne, n da *wúlu bɔ ǹ bǎã lɛ a bìbìn ganaa. Bɛ kio, a mà gialakun kɛ lɛ tumaa kaa wúlu bɔ ǹ bǎã lɛ giala ganaa.

¹³Nyɔɔ mɛn bɛ́ tɔɔ lɛ gɔ́ɔ̃ nɛ, a nànan lɛnpɛnɛ, n bɛ bɔ, ka a foo ne, ka a dɔ̀ɔ̃ koron màn paa kɛ nɛ, ka nyɔɔ mɛn bɛ́ ǹ ganaa, n tã wúlu bɔ ǹ bǎã lɛ nɛ.

¹⁴Sɛnɛ, dii siĩ lɛ sɛ, a ki ni, ka a bù ni, n soo ka bɛn nɛ, n nə bɔ kaa giã ǹ bǎã nɛ, n wo ǹ tã kaa bǎã lɛ kio. Bɛn man die goɛ̃ wúlu mànan lɛa, màn mɛn bɛ́ toɛ, wúlu-bɔlen lɛn sii baraan nə n toa ǹ nɛ.

¹⁵Bɛ kio, n sère gɔ̀lɔ̀ bibinaa kɛ kũ, Aarɔn laanka a nɛgiĩn nə n gɔn da a mìi ni.

¹⁶N sère lɛ bɔlɔ kuru, n na a mà bɔ n pɛsɛ̃ wúlu bɔ ǹ bǎã lɛ tumaa ganaa.

¹⁷Tɔɔ lɛ kukuru kɔn, n na a nànan laanka a gòãn pii, n nə ǹ kaa wúlu bɔ ǹ bǎã lɛ la, siĩ kukurii lɛ laanka a mìi lɛ lalan.

¹⁸ N sère gɔ̀lɔ̀ lɛ tumaa tã wúlu bɔ ǹ bǎã lɛ nɛ, a goã *wúlu màn tiɛ̃ lɛa Dɛnaa wɔ lɛa. Wúlu màn tiɛ̃ wole ne, a gìĩ n kɔɔ̃n masɛ Dɛnaa ganaa.

¹⁹Bɛ kio doo, n sère gɔ̀lɔ̀ lɛ a paabaa ǹ wɔ kɛ kũ, Aarɔn laanka a nɛgiĩn nə n gɔn da a mìi ni.

²⁰N sère gɔ̀lɔ̀ lɛ bɔlɔ kuru, n na a mà bɔ, n da Aarɔn gusin a too lɛwɔn ganaa, n da a nɛgiĩn lɛn dɔn too lɛwɔnɔn ganaa. N da ǹ gusin a gɔn a gòon mìi gole ganaa, ka ǹ gusin a gòã wɔ nɛ. N mà lɛ gialakun pɛsɛ̃ wúlu bɔ ǹ bǎã lɛ gɔ̀nɔn tumaa ganaa.

²¹N mà kɛ saa wúlu bɔ ǹ bǎã lɛ la, ka min koa Lawa wɔ lɛa ǹ nyɔɔ lɛ nɛ, n nə ǹ pɛpɛsɛ̃ Aarɔn ganaa, ka a mɔnaan nɛ. N pɛpɛsɛ̃ a nɛgiĩn lɛn dɔn ganaa ka ǹ mɔnaan nɛ. Bɛa yɔrɔ kɛ la, ǹ tá re masɛ wɔn biɛ: Aarɔn nɛ ka a mɔnaan nɛ, a nɛgiĩn ni ka ǹ mɔnaan nɛ.

²²Sère gɔ̀lɔ̀ lɛ a nyɔɔ kɔ ǹ bǎã saa, a mui gòã nɛ, a nyɔɔ kɛ nɛ a nànan lɛnpɛnɛ, a foo ne, ka a dɔ̀ɔ̃ koron màn paa kɛ laanka nyɔɔ mɛn bɛ́ doa nɛ ǹ ganaa, ka a gusin a nyàa dɔ nɛ. Sère paabaa ǹ wɔ lɛ a dɛ n wúlu-bɔlen lɛn bɔ a koa ǹ sii nyɛɛ.

²³Bɛ kio kəni, ga buuru kankaan kɛ lɛ nɛ masɛ Dɛnaa yɔrɔ-a, n buuru luurii bɔ, ka kiɔmɔsɔ̃ nyɔɔnaa nɛ, ka mɔ̀mɔ nyɔɔnaa nɛ.

²⁴N bɛ lɛ din tumaa kaa Aarɔn gɔn, ka a nɛgiĩn ni, n pɛ ǹ nɛ mà ǹ kɔ masɛ la, a kɔnpɛ ka a zɛnaa ǹ gɔn nɛ masɛ din Dɛnaa yɔrɔ-a.

²⁵N wusoo n bɔ ǹ gɔnɔn nɛ, n tã wúlu bɔ ǹ bǎã lɛ nɛ, kun ka wúlu màn tiɛ̃ wole kɛ nɛ, ǹ gìĩ kɔɔ̃n kɔ masɛ din Dɛnaa ganaa. Wúlu màn tiɛ̃ wole ne, a gìĩ á kɔɔ̃n masɛ din Dɛnaa ganaa.

²⁶Sère paabaa ǹ wɔ kɛ lɛ, Aarɔn koa a dí lɛ la ǹ wúlu màn lɛa, n bɛ lɛ tìãbii saa, n din kɔ masɛ la, a kɔnpɛ ka a zɛnaa ǹ gɔn kɛ nɛ masɛ din Dɛnaa yɔrɔ-a. Bɛ lɛ n die n wɔ gii biɛ.

²⁷N tìãbii mɛn kɔ masɛ la, ka nyàa mɛn bɛ́ ń bɔ Aarɔn laanka a nɛgiĩn koa ǹ sère lɛ ganaa, bɛn lɛn man masɛ wɔn lɛa.

²⁸Bɛ a re sàabiɛ doo wa. Izirayeli nɛnyaanan doamaa nɛ, ǹ bɛa paǹan kɛn lɛn bɔ. Ǹ nə́ ǹ bɔ bii kɔɔ̃n kɔ kɔn ka Lawa nɛ ǹ wúlu mànan lɛa, ǹ nə́ ǹ bɔ ǹ nə́ ǹ kɔ Aarɔn laanka a nɛgiĩn la. Màn boe ne ǹ tá re koe Dɛnaa la.

²⁹Aarɔn a gɛ̀ kio, a mɔnaa sonboren lɛn man doe a nɛnyaanan ganaa. Ǹ dɔn manə ǹ we, ǹ dí laanka ǹ bɔ a koa kɛ wɔn lɛa.

³⁰Lɛawaa sɔbaa gɔ́ɔ̃ nɛ, wúlu-bɔle mɛn bɛ́ re koɛ Aarɔn la, a ná a din a nɛgiĩ goon lɛa, bɛ nə ǹ we, a wɔ kɔn yɛ ka Lawa nɛ ǹ Kion kɛ nɛ, a dí nya Lawa nɛ bǎã sonbore kɛ nɛ.

³¹Aarɔn koa ǹ sère gɔ̀lɔ̀ kɛ lɛ saa, n na a siĩ kɔrɛ bǎã sonbore kɔ́n nɛ.

³²Aarɔn laanka a nɛgiĩn man soɛ̃, kɔn yɛ ka Lawa nɛ ǹ kion lɛ a kiɛnlɛ-a, sère gɔ̀lɔ̀ siĩ lɛ nɛ, ka buuru kɛ nɛ kankaan nɛ.

³³Ǹ dininsɔɔ̃nɔn man bɛa mànan kɛn lɛn soɛ̃, mànan mɛnɛn nə n zɛnaa, ǹ dinin bɔ a koa laanka ǹ dí kɔmala ǹ mànan lɛa, màn mɛn bɛ́ toɛ, Lawa nə ǹ sãn toa ǹ nɛ. Min kooro kɔ́n ba bɛa màn kɛ lɛ we a lɛ-n wa, a giala, màn sonbore ne.

³⁴Bɛ̀ dí kɔmala ǹ siĩ kɛ lɛ kɔ́n goã baayɛlɛ, ka buuru kɛ dɔ nɛ, n na a tumaa tã tɛ-n. Min baran sɔ̃ wa, a giala, màn sonbore ne.

³⁵A zɛnaa miɛ̃ Aarɔn laanka a nɛgiĩn lɛn manɛ, a kɔnpɛ ka boo kɛ lɛ din tumaa nɛ masɛ pɛ nɛ. Lɛawaa sɔbaa gɔ́ɔ̃ nɛ, Aarɔn laanka a nɛgiĩn lɛn koa kɛa siin zɛnaa.

³⁶Baraabaraa, dii gɔ̀lɔ̀ dɛ ga sii baraan toa li ǹ wúlu màn lɛa. N *gɔ̀ bɔ wúlu bɔ ǹ bǎã lɛ ganaa miɛ̃. Bɛ kio, n nyɔɔ kaa a ganaa, n kɔ Lawa la.

³⁷Bɛ dɔ a siin zɛnaa doamaa nɛ, ǹ belebɔ yǎa lɛawaa sɔbaa. Bɛ tumaa kio kəni, wúlu bɔ ǹ bǎã lɛ á re goɛ̃ bǎã sonbore sonbore lɛa, min hinlaa màn mɛn bɛ́ re n loe a ganaa, bɛ á re soɛ̃ màn biɛ.

³⁸Ǹ bɛ́ re màn mɛn zɛnɛɛ wúlu bɔ ǹ bǎã lɛ la doo, bɛ dɔ á ke: Ǹ lɛ̀ goon sère nɛ màn paa dɛ baraabaraa yǎa duduu.

³⁹Sère nɛ bibinaa ke, ǹ bɛ dɛ baayɛlɛ, a paabaa ǹ wɔ ke, ǹ bɛ dɛ wasamiɛ̃nɛ.

⁴⁰Baayɛlɛ wɔ a sère nɛ lɛ laanka wasamiɛ̃n wɔ lɛ nɛ, bɛ̀ ǹ tá bɛn dii, maǹ dii ka wùsu kilo sɔɔ nɛ, ǹ yia ka nyɔɔ tàan yii goon ka talɛɛ nɛ, maǹ dii ka yɔ paan yii goon ka talɛɛ dɔ nɛ. Bɛa wúlu mànan kɛn lɛn gìĩ á kɔɔ̃n masɛ Dɛnaa ganaa.

⁴²Bɛ lɛ n die wúlu màn tiɛ̃ lɛ biɛ, ka doamaa bɛ́ ka ǹ mɛn bɔ biikoo tumaa li, lɛ̀ woo lɛ̀. Ka bɔ Dɛnaa yɔrɔ-a, kɔn yɛ ǹ kion kɛ lɛ a kiɛnlɛ-a, masɛ bɛ́ re n diɛ ka lɛ bǎã mɛn nɛ lɛn, ma boo da n nɛ.

⁴³Man die n diɛ Izirayeli nɛnyaanan lɛ bǎã kɛ lɛ nɛ, ma din bɔ, má maa gugurubaa koa a nɛ.

⁴⁴Kɔn yɛ ǹ kion lɛ laanka wúlu bɔ ǹ bǎã lɛ n masɛ din wɔn lɛa. Aarɔn dɔ laanka a nɛgiĩn man masɛ din wɔn lɛa, màn mɛn bɛ́ toɛ, ǹ dí nya masɛ din ni.

⁴⁵Masɛ n die goɛ̃ Izirayeli nɛnyaanan bii, ma goã Lawa lɛa ǹ yii li.

⁴⁶Ǹ tá re doɛ̃, mà masɛ din lɛ n Dɛnaa lɛa, ǹ mɛn lɛ bɛ́ ǹ Lawa lɛa. Ma din mɛn bɛ́ má soo ǹ ne, má ǹ bɔ Ezipti gána nɛ, má giã kunu ǹ ni. Ma din lɛ n Dɛnaa lɛa, ǹ mɛn lɛ bɛ́ ǹ Lawa lɛa.»