Read Samo, Southern BBN 31 Bible Online

BBN 31 - Samo, Southern bible

BBN 31

¹Dɛnaa boo da Muizu-n doo, á pɛ:

²«Á ke, man má Urii a nɛgiĩ Besaleli bíi ka a tɔ nɛ. Urii mɛn di tɔ bɛ́ á goã Uuru, Zudaa tɔrɔ lɛa.

³Man má yiri kɔ Besaleli lɛ la, màn mɛn bɛ́ toɛ, a sii-doɛ̃ laanka yiridɛnaabaa yɛ, ka màn-doɛ̃ laanka kanaa sii tumaa zɛnaa doɛ̃ nɛ.

⁴Á re boe la a màn zɛnaa ka nyaǹ nɛ, a sana dí nya, ka wɔrɔ nɛ, ka zan tã nɛ.

⁵Á re boe la a kɔlɔ sonboren sɛlɛ, a ǹ da màn nɛ, a gɔn sɛlɛ. Á re dí tɔrɔ tumaa nyɛɛ a nyaǹ kaa a ganaa.

⁶Ka bɛ dɔ-n doo, man má Dan tɔrɔ Ayisamaaki a nɛgiĩ Oholiabu da kun ni. Má dí nya doɛ̃ kɔ ǹ la, kun ka dí-nyali kɔsɔn nɛ, màn mɛn bɛ́ toɛ, masɛ dí mɛn tumaa pɛ n din ni, ǹ bɛ nya.

⁷Kɔn yɛ ka Lawa nɛ ǹ kion kɛ nɛ, *lɛ kɔ kɔn la ǹ goo kɛ laanka a lɛpii kɛ nɛ a lalan, kion lɛ a dí nya ǹ màn bisinin ni,

⁸tabala kɛ laanka a màn bisinin ni, bolon da ǹ bǎã *yoreen kɛ laanka a màn bisinin ni, màn gìĩ kɔɔ̃n tã ǹ bǎã kɛ nɛ,

⁹*wúlu màn tã ǹ bǎã kɛ laanka a màn bisinin ni, doo kaaraa kɛ nɛ ka a gũ ǹ màn nɛ,

¹⁰dí nya kion kɛ lɛ nɛ ǹ mɔnaan nɛ, wúlu-bɔle Aarɔn din bɛ́ re mɔnaa sonboren mɛnɛn we, ka a nɛgiĩn dɔn bɛ́ re ǹ mɛnɛn we, ǹ dí nya ǹ nɛ,

¹¹minin bɔ a koa ǹ nyɔɔ kɛ nɛ, ka màn gìĩ kɔɔ̃n mɛn bɛ́ re n tiɛ̃ kion sonbore lɛ nɛ. Ma din màn mɛn pɛ n nɛ, ka tá re dí lɛ tumaa nyɛɛ a kɔnpɛ bɛ nɛ ka te.»

¹²Dɛnaa pɛ Muizu ni

¹³mà a pɛ Izirayeli nɛnyaanan lɛn manɛ: «Ka toa ka masɛ a susu ǹ piin lɛn tamaa, a giala, bɛ n sii nyaa ǹ sii lɛa, ka laanka masɛ bii ni yǎa duduu, màn mɛn bɛ́ toɛ, ka dɔ̃ mà masɛ din Dɛnaa nɛ, má ka bɔ má ka koa maa wɔn lɛa.

¹⁴Ka *susu ǹ pii tamaa, a giala, bɛa lɛawaa kɛ lɛ a ziziɛ̃ n soɛ̃ lɛa ka gɔn. Min mɛn bɛ́ re bɛ ziziɛ̃, ka tá re bɛa dɛnaa dii a gã. Sonbore, min mɛn bɛ́ re dí nyɛɛ bɛa pinaa kɛ nɛ, ka tá re ǹ dɛnaa dii ka bɔ ǹ dɔɔ̃nɔn bii.

¹⁵ Lɛawaa sɔrɔ gɔ́ɔ̃ nɛ, didie na a dí nya, sɛnɛ, lɛawaa sɔbaabaa ǹ wɔ kɛ n susu ǹ pii lɛa, a n koa-n a gɔrɔn Dɛnaa nɛ. Min mɛn bɛ́ re dí nyɛɛ susu ǹ pii pinaa, ǹ tá re ǹ dɛnaa dii a gã.

¹⁶Izirayeli nɛnyaanan lɛn die ǹ susu ǹ pii kɛ tamaa, a goã lɛ kɔ kɔn la ǹ sii lɛa ǹ gɔn biikoo tumaa li, a ná a nyɛɛ wa.

¹⁷ A n miɛ̃ yǎa duduu, Izirayeli nɛnyaanan laanka masɛ bii ni. A n die goɛ̃ sii nyaa ǹ sii lɛa. Lɛawaa sɔrɔ gɔ́ɔ̃ nɛ masɛ Dɛnaa n má lon laanka tán zɛnaa. Sɛnɛ, lɛawaa sɔbaabaa ǹ wɔ pinaa, man má golee má n susu.»

¹⁸Dɛnaa bɛ́ á boo da ka Muizu ni Sinayii kele la á nya, bɛ kio kəni, á lɛ kɔ kɔn la ǹ boon kɔlɔ sɛlɛɛ màn paa lɛ kɔ la, Dɛnaa Lawa din boon mɛnɛn kiɛ̃ ka a din gɔn nɛ.