Read Samo, Southern BBN 33 Bible Online

BBN 33 - Samo, Southern bible

BBN 33

¹ Dɛnaa boo da Muizu ni, á pɛ: «N bɔ bǎã kɛ nɛ, n din laanka zaman kɛ lɛ, ń soo ǹ ne n nə ǹ bɔ Ezipti gána nɛ. Man liɛ má n lɛ kɔ Abrahamu la, Izaaki ni ka Zakɔba nɛ ka gána mɛn nɛ, má pɛ ǹ nɛ, máa ma á re koe ǹ nɛnyaanan la, ka bɛa zii kũ.

²Ma á re lon a dia dí-a wole goon diɛ n nyɛɛnɛ, ma á re Kanaan minin lui, ka Amɔɔrɔ minin ni, Ɛti laanka Perɛzi minin ni, Ivii laanka Zebuzu minin ni.

³Ka wɔ bɛa gána kɛ lɛ nɛ, tɔɔ-too laanka tán-kɔsiɛ á bǐɛ̃ koe a nɛ. Ma a boe la ma wo kun ka nɛ bɛa gána kɛ lɛ-n wa, a giala, ka n tɔrɔ too kaka-a lɛa, ma tɔn kiɛ̃ ma ka dɛ ma ka nya zii la.»

⁴Zaman lɛ bɛ́ á bɛa makara boo kɛ ma, ǹ yɔrɔ kɔsɛ parsiini, min goon din yɛ, a ná a nyaǹ bɔ ǹ mànan wɔ wa.

⁵A giala, Dɛnaa na á pɛ Muizu ni, mà a pɛ Izirayeli nɛnyaanan lɛn manɛ: «Ka n tɔrɔ too kaka-a lɛa. Bɛ̀ ma biikoo boɛɛn kooro saa, ma tɔ wɔ kun ka nɛ, ma tɔn ka dɛ, ma ka nya kooro. Kanna kəni, ka kaa nyaǹ bɔ ǹ mànan waa ka ǹ kaa tán, ma doamaa bɛ́, ma màn mɛn zɛnaa ka nɛ, ma á re bɛ doɛ̃.»

⁶Izirayeli nɛnyaanan lɛn nə yoo lɔn, ǹ nə́ n bɔ Orɛbu kele kɛ li, ǹ nə́ ǹ nyaǹ bɔ ǹ mànan wɔ toa.

⁷Ǹ zii tɔ wɔ lɛ gɔ́ɔ̃ nɛ, bɛ̀ ǹ nə́ golee ǹ nə́ giã bǎã mɛn nɛ, Muizu na á goã mɔnaa kion sonbore lɛ siɛ, a na a lɛ bɔ, a doa para li, sɔsɔɔ ǹ giã ǹ bǎã lɛ ganaa. Á bíi: «Kɔn yɛ ka Lawa nɛ ǹ kion.» Min woo min, á n giɛ li a n mɔrɔ Dɛnaa ganaa kəni, bɛa dɛnaa n soe a n bɔ ǹ giã ǹ bǎã lɛ nɛ, a wo kɔn yɛ ǹ kion kɛ nɛ.

⁸Bɛ̀ Muizu din tá woe a nɛ, min tumaa n yui lon, didie golee a din a kion kiɛnlɛ-a, a ga a ganaa, yǎa a woe doe kion lɛ nɛ.

⁹Bɛ̀ Muizu á kion lɛ gɔ́ɔ̃ nɛ, bara kɛ n gisĩ, a da golee kion lɛ a kiɛnlɛ-a, Dɛnaa boo da nɛ.

¹⁰Bɛ̀ zaman lɛ yii tá bara lɛ ganaa golee-n kion lɛ a kiɛnlɛ-a lɔn gɔrɔ, ǹ tumaa n yui, didie nə n musin kumii tán a din a kion kiɛnlɛ-a.

¹¹Dɛnaa na á goã boo diɛ kɔn ka Muizu ni buə̃buə̃, ka minin bɛ́ boo diɛ kɔn nɛ lɔn. Bɛ kio, Muizu n wusii, a da giã ǹ bǎã lɛ nɛ, bɛ á zɛnɛɛ bɛ̀ a kiodɛnaa tɔntɔraa ke, Nuunu a nɛgiĩ lɛa, a tɔ n Zozoe, bɛ̀ bɛ sɛ tɔn soo, á n bɔ mɔnaa kion lɛ-n wa.

¹²Muizu pɛ Dɛnaa lɛ nɛ: «Á ke, n din nə ń pɛ masɛ nɛ, mà ma wo ka zaman kɛ lɛ nɛ. Sɛnɛ, n bɛ́ re min mɛn diɛ kun ka masɛ nɛ dɔmalɛ wole lɛa, n bɛ nyaa ma-n wa. A da yaa, n din dɔ nə ń goã ń pɛ mà n tá ma doɛ̃ ka ma tɔ nɛ, mà ma kɔɔ̃n kɔ n ganaa.

¹³Sisia kəni, bɛ̀ a kɔɔ̃n kɔ n ganaa sonbore, zii nyaa masɛ nɛ, ma boo la ma n din dùũ dɔ̃, ma tɔn kɔɔ̃n kɔ n ganaa, a wo nyɛɛnɛ. N yiri koa a-n dɔn, mà tɔrɔ kɛ lɛ nə n din wɔ lɛa.»

¹⁴Dɛnaa Muizu lɛ si: «Ma n giɛ li masɛ dinmaa daa, ma wo susui kɔ ǹ la?»

¹⁵Muizu dɔ́ pɛ nɛ: «Bɛ̀ n dinmaa a die, n wo kun ka wɔsɛn nɛ wa, n baran pɛ mà wɔ n bɔ kànaa, wɔ wo bǎã kɔsɔ-n wa.

¹⁶Man die doɛ̃ wàa dɔ li dɔn, mà wɔ tá kɔɔ̃nɛ n ganaa, ma din laanka maa zaman kɛ nɛ? Bɛ̀ n din tá tɔ we wɔ nyɛɛnɛ, wɔ bie re doɛ̃ bɛ lɛ li wa? Hiĩ! N nə n die nyɛɛ wɔ-n dɔn, mà wɔ ba goon ka tɔrɔ gialakun kɛ kɔ́n nɛ kanaa kɛ gɔ́ɔ̃-n wa, ma din laanka maa zaman kɛ nɛ.»

¹⁷Dɛnaa tɔ́n pɛ Muizu ni: «N boo mɛn da sisia ke, ma á re bɛ lɛ dɔ zɛnɛɛ. A giala, ma á doɛ̃ taãn-taãnɛ, máa n kɔɔ̃n kɔ ma ganaa.»

¹⁸Muizu ná a nyankɔ á pɛ: «Dɛnaa, a toa kəni, masɛ nə n gugurubaa tɛ-pɛle kɛ yɛ ka ma yii ni.»

¹⁹ Dɛnaa lɛ tɔ́n pɛ: — Man die kiɛ̃ n yɔrɔ-a, ma maa bǐɛ̃ kɛ tumaa nyaa n nɛ, ma ma din tɔ pɛ n nɛ: «Dɛnaa.» Bɛ̀ min mɛn kɔɔ̃n kɔ masɛ ganaa, man makara boe bɛ ganaa, man din nyaa nɛ. Bɛ lɛ nɛ, má makara bɔ n ganaa, má n din nyaa nɛ.

²⁰N ba boe la n masɛ yɔrɔ yɛ wa, a giala, minbuiin nɛ a boe la a masɛ yɔrɔ yɛ, a yii wusoo a goã koo wa.

²¹Bǎã kɔ́n nə́ ke ma genli, giã kɔlɔ kɛ la.

²²Bɛ̀ má kiɛ̃ ka maa gugurubaa tɛ-pɛle kɛ nɛ ǹ mɛn waáraa, ma á re n nyɛnɛɛ, ma n da kele lɛ kɔ́sɔ nɛ, man gɔn kɔ n lɛ.

²³Bɛ kio, ma á re n gɔn zoɛ̃, n tá re ma dɔ̀ɔ̃ koe yii, sɛnɛ, ma yɔrɔ ke, n ba boe la n bɛ yɛ wa.