Read Samo, Southern BBN 40 Bible Online

BBN 40 - Samo, Southern bible

BBN 40

¹Dɛnaa boo da Muizu ni, á pɛ nɛ:

²«Mui bibinaa kɛa lɛawaa bibinaa li, ń die n kɔn yɛ ka Lawa nɛ ǹ kion lɛ doa.

³Ń die n lɛ kɔ kɔn la ǹ boon goo lɛ da kion lɛ nɛ, n duru bii kuru kɔn-a ǹ mɔnaa lɛ kio.

⁴Ń die n da ka tabala lɛ nɛ, n na a koa tán sii yɔrɔ bɔ. Ń die n da ka bolon da ǹ bǎã kɛ nɛ, n na a bolonən lɛ sã.

⁵Ń die n sana màn gìĩ kɔɔ̃n tã ǹ bǎã kɛ da *lɛ kɔ kɔn la ǹ goo lɛ yɔrɔ-a, n kion lɛ a kiɛnlɛ mɔnaa kɛ da lon.

⁶Ń die n *wúlu bɔ ǹ bǎã kɛ koa kɔn yɛ ka Lawa nɛ ǹ kion lɛ a kiɛnlɛ yɔrɔ-a.

⁷Ń die n doo kaaraa kɛ da kɔn yɛ ka Lawa nɛ ǹ kion lɛ laanka wúlu bɔ ǹ bǎã kɛ bii ni, n mu kaa a nɛ.

⁸Ń die n sumu lɛ a mɔnaa gɔnɔn doa, n sumu lɛ a kiɛnlɛ mɔnaa da lon.

⁹Ń die n minin bɔ ǹ koa ǹ nyɔɔ kɛ saa, n kaa kion lɛ laanka a gɔ́ɔ̃gɔ́ɔ̃ ǹ màn tumaa ganaa, n kion lɛ baa masɛ Dɛnaa wɔ lɛa ka a màn bisinin tumaa nɛ, a màn sonbore baa.

¹⁰Ń die n nyɔɔ kaa wúlu bɔ ǹ bǎã kɛ laanka a màn bisinin ganaa, n baa masɛ wɔ lɛa, a wúlu bɔ ǹ bǎã sonbore sonbore baa.

¹¹Ń die n nyɔɔ kaa doo kaaraa kɛ laanka a koamala ǹ màn kɛ ganaa n baa masɛ wɔ lɛa.

¹²Ń die n da ka Aarɔn nɛ, ka a nɛgiĩn ni kɔn yɛ ǹ kion lɛ a kiɛnlɛ-a, n nə ǹ zoo mu lɛ li.

¹³Ń die n mɔnaa sonboren kɛn wɔ Aarɔn ganaa, n nyɔɔ kaa a mìi ni, n bɔ n koa masɛ wɔ lɛa, a boo la a masɛ a wúlu bɔ.

¹⁴Da ka a nɛgiĩn kɛn dɔn nɛ, n dɔnkɛn wɔ ǹ ganaa,

¹⁵n nyɔɔ kaa ǹ ganaa ka ǹ díi wɔ bɛ́ lɔn, ǹ boo la ǹ masɛ a wúlu bɔ. N nyɔɔ kaa ǹ ganaa kɛnɛn kɛ lɛ n die wúlu-bɔlebaa kɛ biɛ ǹ wɔ lɛa biikoo tumaa li yǎa duduu.»

¹⁶Muizu yoo á dí lɛ nya, á zɛnaa sɔnbɔraanɛ ka Dɛnaa bɛ́ á pɛ-n lɔn.

¹⁷A lɛ̀ paabaa ǹ wɔ kɛ li, a mui bibinaa a lɛawaa bibinaa pinaa, kion lɛ nə́ n doa.

¹⁸Muizu kion lɛ doa, a ná a giãmala ǹ mànan kaa tán, a ná a doa ǹ bàlàn doa, á na a kerekaã ǹ bàlàn ka-a, a ná a gɔn sɔsɔrɔn wɔ.

¹⁹Á siã lɛ a mɔnaan lɛ bɔ á ǹ kɔ kion lɛ lɛ, bɛ kio a ná a tamaa ǹ kɔmalɛ kɛ kɔ a lalan lɛ, ka Dɛnaa din bɛ́ á pɛ-n lɔn.

²⁰Muizu dí-pɛ fù lɛ a kɔlɔ sɛlɛɛn kɛn goa, á ǹ koa goo lɛ gɔ́ɔ̃ nɛ, a ná a bàlàn kaa a ganaa, a ná a lɛpii kɔ lɛ.

²¹Á daa ka goo lɛ nɛ kion lɛ gɔ́ɔ̃ nɛ, bɛ kio, a ná a bii kuru kɔn-a ǹ mɔnaa kɛ da lon, á kɔ lɛ kɔ kɔn la ǹ goo lɛ siã, ka Dɛnaa din bɛ́ á pɛ-n lɔn.

²²Muizu tabala lɛ da kɔn yɛ ǹ kion lɛ gɔ́ɔ̃ nɛ, a gɔsɛ a wàã ganaa, bii kuru kɔn-a ǹ mɔnaa lɛ yɔrɔ-a.

²³Á Dɛnaa gɔ ǹ buurun kɛn kaa la ka Dɛnaa bɛ́ á pɛ-n lɔn.

²⁴Á bolon da ǹ bǎã lɛ da kion lɛ gɔ́ɔ̃ nɛ, a gusin a wàã ganaa, tabala lɛ para li.

²⁵Á tɛ da bolonən lɛn ganaa Dɛnaa yɔrɔ-a, ka Dɛnaa din bɛ́ á pɛ-n lɔn.

²⁶Màn gìĩ kɔɔ̃n tã ǹ bǎã ke sana lɛa, Muizu bɛ da kion lɛ gɔ́ɔ̃ nɛ, bii kuru kɔn-a ǹ mɔnaa kɛ lɛ yɔrɔ-a,

²⁷yǎa a màn gìĩ kɔɔ̃n kaa a nɛ, á tã, ka Dɛnaa din bɛ́ á pɛ-n lɔn.

²⁸Muizu kion lɛ a kiɛnlɛ mɔnaa da lon.

²⁹A bɛ́ á wúlu bɔ ǹ bǎã lɛ da kion lɛ gɔ́ɔ̃ nɛ, a kiɛnlɛ yɔrɔ-a gɔrɔ, á *wúlu màn tã la, ka Lawa gɔ ǹ màn nɛ, ka Dɛnaa din bɛ́ á pɛ-n lɔn.

³⁰Muizu doo kaara lɛ koa kion lɛ laanka wúlu bɔ ǹ bǎã lɛ bii ni, á mu kaa a nɛ, *gɔ̀ bɔ ma-a ǹ wɔ lɛa.

³¹Muizu ni, Aarɔn nɛ ka a nɛgiĩn ni, ǹ nə́ ǹ gɔnɔn laanka ǹ gòãn pii ni.

³²Bɛ̀ ǹ tá we kion lɛ nɛ, bɛ̀ ǹ tá n mɔrɛ wúlu bɔ ǹ bǎã kɛ dɔ ganaa, maǹ gɔ̀ boe ǹ dinin ganaa, ka Dɛnaa din bɛ́ á pɛ-n lɔn.

³³Muizu sumu lɛ doa á kion lɛ laanka wúlu bɔ ǹ bǎã lɛ lɛnpɛnɛ nɛ, á sumu lɛ a kiɛnlɛ mɔnaa da lon. Muizu na á dí lɛ tumaa nya á nya kɛnɛn.

³⁴ Tɛmaa bara lɛ daa n kuməə kɔn yɛ ǹ kion lɛ la, Dɛnaa a gugurubaa kion lɛ pã.

³⁵Muizu goã boe la á we kɔn yɛ ka Lawa nɛ ǹ kion lɛ-n wa, a giala, tɛmaa lɛ goã a nɛ, Dɛnaa a gugurubaa dɔ goã piɛ̃-n kion lɛ gɔ́ɔ̃ nɛ.

³⁶Bɛ̀ tɛmaa lɛ yoo kion lɛ lalan ǹ mɛn waáraa, Izirayeli nɛnyaanan dɔn man yui ǹ nə́ ǹ zii tɔ wɔ.

³⁷Bɛ̀ tɛmaa lɛ yoo duduu wa, ǹ dɔn ba n gòã woɛ̃ wa. Maǹ nə́ n yii diɛ yǎa tɛmaa lɛ a yoo pinaa kɔsɔ doe.

³⁸Dɛnaa a tɛmaa lɛ na á goã kion lɛ la lɛawaa li, sɛnɛ tèlò-n, tɛ n boe a nɛ. Izirayeli nɛnyaanan lɛn tumaa yii goã bɛ yii, ǹ zii tɔ wɔ lɛ gɔ́ɔ̃ nɛ.