Read Samo, Southern BBN 7 Bible Online

BBN 7 - Samo, Southern bible

BBN 7

¹Dɛnaa pɛ Muizu-n kɛnɛn: «Á ke, ma nə n boe n koɛ, ka Lawa bɛ́ lɔn *Faarahɔn gɔn, n gologiĩ Aarɔn nə die goɛ̃ n boo gii-dali lɛa.

²Ma bɛ́ re boo mɛn tumaa koe n la máa n pɛ, n din nə die bɛ pii, n gologiĩ Aarɔn nə die boo diɛ ka Faarahɔn nɛ, mà a toa Izirayeli nɛnyaanan lɛn nə soo, ǹ nə n bɔ a gána nɛ.

³ Sɛnɛ, ma din tá re Faarahɔn too kaka koe. A laanɛ n tá re sii nyaa ǹ sii dadaran zɛnɛɛ ǹ mɔnaa Ezipti gána nɛ,

⁴Faarahɔn ba re n too koe n lon wa. Ma á re dɔlɔ boe Ezipti gána ganaa, man pàã nyaa nɛ, ma tɔn soo ka maa zaman kɛ nɛ, Izirayeli nɛnyaanan lɛn, kun ka zia-balin bɛ́ lɔn, ma ǹ bɔ Ezipti gána kɛ nɛ.

⁵Ma á re dɔlɔ boe Ezipti gána minin lɛn ganaa, man pàã nyaa ǹ nɛ. Bɛ̀ má bɛ zɛnaa ǹ mɛn waáraa, má soo ka Izirayeli nɛnyaanan lɛn nɛ, má ǹ bɔ gána lɛ nɛ, Ezipti gána minin kɛn tá re doɛ̃, mà ma din lɛ n Dɛnaa Lawa lɛ lɛa.»

⁶Muizu laanka Aarɔn sii lɛ zɛnaa miɛ̃, ǹ nə́ zɛnaa á kɔnpɛ taãn-taãnɛ, ká Dɛnaa din a dí kɔ ǹ la kɛ nɛ.

⁷Muizu na á goã lɛ̀ pɔkiwisi, Aarɔn sɛ pɔkiwisiwensɔɔ, bɛ̀ ǹ bɛ́ boo diɛ ka Faarahɔn nɛ.

⁸Dɛnaa pɛ Muizu laanka Aarɔn nɛ:

⁹«Bɛ̀ Faarahɔn boo da ka nɛ, ka sii nyaa ǹ sii goon zɛnaa, n pɛ Aarɔn nɛ: N bàlà lɛ saa, n zũ tán Faarahɔn yɔrɔ-a, a n bɔyaa a miɛ̃ baa.»

¹⁰Muizu laanka Aarɔn daa Faarahɔn li, ǹ nə́ sii lɛ zɛnaa ka Dɛnaa bɛ́ á pɛ ǹ nɛ lɔn. Aarɔn bàlà lɛ zũ tán Faarahɔn laanka a kiodɛnan yɔrɔ-a, bàlà lɛ miɛ̃ baa.

¹¹Sɛnɛ, Faarahɔn dɔ lɛ dia a màn-dɔ̃lin laanka a kɔ́lɔnbaalin la, ǹ dɔn ná a din dí lɛ nya, ka ǹ boo sii la ǹ pàã baraa kɛ nɛ.

¹²Ǹ gogoonmaa ná a bàlà zũ tán, á n bɔyaa á miɛ̃ baa. Sɛnɛ, Aarɔn a bàlà lɛ miɛ̃ mɛn baa, bɛ nə́ ǹ wɔn lɛn kũ á ǹ mui.

¹³Ka bɛ din yii ni, Faarahɔn too goã a kakabaa gɔ́ɔ̃ nɛ, a n too kɔ Muizu laanka Aarɔn lon wa, ka Dɛnaa din bɛ́ á goã á pɛ lɔn.

¹⁴Dɛnaa pɛ Muizu ni: — Faarahɔn nə́ n too kaka kɔ, a nə n piɛ̃ a toɛ zaman lɛ á woe wa.

¹⁵Wo Faarahɔn li baayɛlɛ gɔrɔ, bɛ̀ á soe woe mu lɛ-a. N nə n yii da la tà lɛ lɛ-a. N bàlà mɛn nə n bɔyaa, á miɛ̃ baa ke lɛn, bɛ lɛ saa n gɔn.

¹⁶A pɛ Faarahɔn nɛ mà Dɛnaa lɛ, Ebrəən Lawa lɛa, mà bɛ lɛ na á n dia, mà n pɛ nɛ: «Toa maa zaman lɛ soo, a wo dí nya ma nɛ don bii.» Sɛnɛ, n tɔn lɛ kɔ ka pelo yii-n wa.

¹⁷ Bɛ lɛ nɛ, Dɛnaa á boo diɛ kɛnɛn: «N tá re doɛ̃ kɛ li, mà n laanka masɛ din Dɛnaa Lawa n kɔn. Man die tà lɛ a mu duwii ka bàlà kɛ lɛ-n ma gɔn, a n bɔyaa a mà baa.

¹⁸Tà mu lɛ a zɔ̀ á re giɛ̃, mu lɛ dinmaa gìĩ á re boe, Ezipti gána minin ba re boe la ǹ mi wa.»

¹⁹Dɛnaa pɛ Muizu ni: «A pɛ Aarɔn nɛ, mà a bàlà lɛ saa, a n gɔn saa lon a dia Ezipti gána a tà mu la, ka a piɛɛrɛnɛn tumaa nɛ, mu bɛ́ bǎã mɛn tumaa nɛ, ǹ tumaa mà baa. Mà goã Ezipti gána lɛ a bǎã tumaa nɛ, á goã a mànan tumaa gɔ́ɔ̃ nɛ, gɔn wɔn nɛ ka kɔlɔ wɔn nɛ.»

²⁰Muizu laanka Aarɔn sii lɛ zɛnaa ka Dɛnaa bɛ́ á pɛ lɔn. Á bàlà lɛ saa lon á tà mu lɛ duwəə Faarahɔn laanka a kiodɛnan yɔrɔ-a. Tà mu lɛ tumaa nə́ n bɔyaa á mà baa.

²¹Tà mu lɛ a zɔ̀ gã, mu lɛ dinmaa gìĩ bɔ, Ezipti gána minin lɛn ba boe la ǹ tá mii wa. Mà goã Ezipti gána lɛ paǹ tumaa ganaa.

²²Sɛnɛ, Ezipti gána a kɔ́lɔnbaalin dɔn ná a din dí goon lɛ nya, ka ǹ boo sii la ǹ pàã baraa kɛ nɛ. Faarahɔn too goã a kakabaa gɔ́ɔ̃ nɛ, a n too kɔ Muizu laanka Aarɔn lon wa, ka Dɛnaa din bɛ́ á goã á pɛ lɔn.

²³Faarahɔn wusoo á woo piɛ, a ná a sii kɛ lɛ din kũ parsii sii lɛa wa.

²⁴Ezipti gána minin tumaa dɛnɛn fɔ̃ tà lɛ lɛ-a, ǹ nə́ ga mi ǹ mu li, a giala, ǹ goã boe la ǹ tá tà mu lɛ mii doo wa.

²⁵Lɛawaa sɔbaa kiɛ̃, Dɛnaa a dɔlɔ bɔ ka tà mu-n lɛ kio.

²⁶Dɛnaa pɛ Muizu ni: — Wo Faarahɔn li n pɛ nɛ: Dɛnaa lɛ n pii kɛnɛn: «Toa maa zaman lɛ soo a wo dí nya ma nɛ.»

²⁷Bɛ̀ á tɔn nə n piɛ̃, a ba toɛ ǹ soo ǹ woo wa, ma á die sɔmɔnɔn kiɛ a gána gɔ́ɔ̃ din tumaa nɛ dɔlɔ lɛa.

²⁸Tà lɛ a mu n die piɛ̃ ka sɔmɔnɔn nɛ, ǹ tá re soe ǹ da kaa a kion, a waa ǹ kion ne, ka a piì dɔ din ni. Maǹ die we a kiodɛnan kionən ne, ka a gána minin kionən ne, a din a buuru da ǹ bǎãn laanka a wùsu yaa ǹ mànan nɛ.

²⁹Sɔmɔnɔn lɛn man die dii a din ganaa, ǹ dii a gána minin ganaa, ka a kiodɛnan nɛ.