Read Samo, Southern Zɔb 11 Bible Online

Zɔb 11 - Samo, Southern bible

Zɔb 11

¹Bɛ kio Sofaara mɛn bɛ́ boe Naaman bɛ́ tɔ́n pɛ:

²«N boo zaã kɛ lɛ ń diɛ, ma n taasɛ ma min na a boe la a n lɛ si wa? Bɛ̀ min mɛn lɛ á boo kuĩ kəni, sonbore n bɛa dɛnaa lon?

³Nsɛ a boo kooro kɛ lɛ á boe la, a min kurəə boo-diɛ ganaa? Nsɛ n din koa ǹ boo diɛ, min ná a ba yii a sìi da nsɛ-a wa?

⁴Ń pɛ dinin, mà nsɛ a giã ǹ gɔn tá siĩni, mà Lawa din tá doɛ̃ mà zɛ̀rɛ ba nsɛ-a wa.

⁵Toa bɛ̀ Lawa dinmaa n boo diɛ. Toa bɛ̀ a nə n lɛ buĩ a boo da n nɛ.

⁶Toa bɛ̀ a na a sii-doɛ̃ a zii duriin kɛn nyɛɛ n nɛ. A giala, bɛn giala miɛ á kaka wɔ ganaa. Bɛ̀ ń bɛn woo ǹ bǎã dɔ̃, n tá re doɛ̃ kəni, mà Lawa nə n tɛn toɛ n nɛ.

⁷N tá boe la n Lawa a sii zuzulun kɛn gɔsɛ n nə ǹ dɔ̃? N tá boe la n Pàãyiidɛnaa a siin kɛn lɛ-piɛ̃ giala ma?

⁸Maǹ sɔsɔɔ ka lon bɛ́ lɔn. Ma n die wàa zɛnɛɛ? Maǹ zuzulu ka geren piɛ bɛ́ lɔn. Ma n wàa doɛ̃ a gɔ́ɔ̃ nɛ?

⁹Ǹ sasabaa la tán wɔ nɛ, ǹ pəməbaa la kɔ̀ mu wɔ nɛ.

¹⁰Bɛ̀ Lawa tele min ganaa, á kũ á da kòso-n, bɛ̀ á bɔ á kiri we a ganaa, die n kurii?

¹¹A giala, min mɛnɛn nə́ ke soɛ boe, Lawa tá ǹ doɛ̃. A ba golee a n taasɛ, a tɔn sii a baraabaa dɔ̃ wa.

¹²Sɛnɛ, kɔntan bɛ̀ don dundun nɛ yɛ piɛ wɔ lɛa ǹ mɛn pinaa, gaãnaa dɔ á re yiri yii.

¹³N gɔ́ɔ̃ kaa Lawa-n kaa, n gòã-kũ da a ganaa.

¹⁴N gɔn pii n bɔ sii baraa nɛ. N nyan toa sii kɔkɔrɔ goã n kion wa.

¹⁵Bɛ̀ ń zɛnaa miɛ̃, *gɔ̀ a re goɛ̃ n ganaa wa, n tá re n mìi siɛ lon. Sii kɔn ba re bìn diɛ n-a wa, nyɛ́ɛ a re n kuĩ wa.

¹⁶N yiri á re boe ka n nɔmaa kɛ nɛ. N yiri á re boe ne, ka mu na á baa si á kiɛ̃.

¹⁷N tá kanaa lɛ á re n biɛ ka penleen wasa bɛ́ lɔn. Wɔlɔ tì din tá re n biɛ ka baayɛlɛ bɛ́ lɔn.

¹⁸N tá re wɛɛ la kəni, mà foo doa ǹ bǎã tan. Ta ma n nə́ n yii kɔ kɔn lɛ, n tá re nyuù we, nyɛ́ɛ ná a ba n-a wa.

¹⁹N tá re wɛɛ tán, min kɔn ba re die n susui sàabiɛ wa. Min gigiã á re die n mɛ boe n nɛ.

²⁰Min baraan kɛn, bɛn yii á re wɛ̃. Duru ǹ bǎã din ba ǹ la wa. Ǹ foo doa ǹ bǎã banban, yǎa gɛ̀.»