Read Samo, Southern Zɔb 15 Bible Online

Zɔb 15 - Samo, Southern bible

Zɔb 15

¹Temaan Elifaazi tɔn boo saa á pɛ:

²«Zɔbu, n din yiridɛnaa kɛ n min lɛ sii ka boo kooron ne? Ma nə n tìã dii kooro le!

³N din tamaa ǹ boon kɛn, màn din ba ǹ li wa. N bɛ́ boo mɛn tumaa diɛ, a là banban.

⁴Nsɛ ke, ma n die toɛ minin nə n yii wɔ Lawa la. Ma n die minin kiɛ kɔn ka Lawa nɛ.

⁵Ma n boo diɛ ka ma n sii-dɔ̃li lɛa, ma n boo diɛ a giala zɛ̀rɛdɛnaa nə n nɛ.

⁶Masɛ sii bie ke wa. N din lɛ n die n diɛ sii ni, n din lɛwɔn nə n din gialaa.

⁷Minbuiin nɛn bii, nsɛ nə ń yɛ bibinaa nɛ? Nsɛ nə ń yɛ kelen manɛ?

⁸Lawa na á ná a gɔ́ɔ̃gɔ́ɔ̃ ǹ boon pɛ nsɛ nɛ? N dinsɔɔ̃ n sii doɛ̃?

⁹Ma n wàa mɛn doɛ̃, bɛ̀ wɔsɛn nə́ wɔ a bɛ doɛ̃ wa? Ma n sii mɛn giala miɛ, bɛ̀ wɔsɛn nə́ wɔ a bɛ giala miɛ wa?

¹⁰Minin tá wɔ bii ǹ nə́ zizi kɔ, ǹ mìi ka fulu. Ǹ nə́ zizi, ǹ nə́ la n yɛ ǹ di din ni.

¹¹Wɔ bɛ́ boo basiɛ̃ mɛn diɛ n nɛ, Lawa a minin foo basa ǹ boo ke, bɛa doe nsɛ yii li wa?

¹²N foo a yoo wɔ li mìi? Wàa na á baa n tá n yii taɛ̃ wɔ li?

¹³Ń mà wàa! N foo n yoo-n Lawa li, n nə n bɛa boo zaã kɛ miã doe Lawa ganaa?

¹⁴ Minbuiin nɛ n siɛ lɔn, a tɔn goã *yoreen ne? Lɔ min mɛn yɛ, a n siɛ lɔn a tɔn goã pepere?

¹⁵Bɛ̀ ń Lawa yaa a ba wɛɛ a din a dia dí-a wole sonboren kɛn la lon wa, a din lon mɛn zɛnaa bɛ̀ bɛa yoreen ne a yɔrɔ-a wa,

¹⁶sanparɛ, ka minbuiin nɛ bɔnɛɛ babaraa kɛ nɛ, sii baraa zɛnaa n woe la ka mi ǹ mu ni.

¹⁷N too kɔ! Man die sii yɔrɔ nyɛɛ n nɛ. Ma màn mɛn yɛ, man die bɛ laakalɛɛ n nɛ:

¹⁸Doɛ̃-wɔlen nə màn mɛn ma ǹ digolon li, ǹ nə ǹ kɔn duru wa, ǹ ná a tumaa laakalaa.

¹⁹Gána lɛ na á goã ǹ dininsɔɔ̃nɔn wɔ lɛa. A biikoo li, bɛ̀ tii kɔn tɔn nə n dɔ ǹ bii bɔrɔ wa.

²⁰Min baraan man fuu-n miɛ̃ kɛnɛn, yǎa ǹ woe giɛ̃. Ǹ lɛ̀ lɛ n kunu, dan nə la.

²¹Gɔ̀nɔn bìn da ǹ boo ne ǹ tá miɛ miɛ̃. Ta maǹ là nyantoro ne, basaã-kɔli gɔn nə doe ǹ ganaa.

²²Ǹ ba n yiri koɛ a ganaa, mà ǹsɛn tá boe la ǹ kanbaa wɔlɔ tì pàã kɛ ganaa wa. A giala, gɔya sa nə n yii diɛ ǹ dinin lɛn la.

²³Ǹ dɔn dinin tá doɛ̃ mà bɔ̀n nə ǹsɛn duĩ. Ǹ dinin lɛn man die n giala nyɔmiɛ̃ zèwon giulun.

²⁴Fuu laanka nɔmaa babaraa tá re nyɛ́ɛ diɛ ǹ ganaa. Fuu laanka nɔmaa á re kiɛ ǹ la, ka kii kɔn a sɔraasin man nə́ n yɔrɔ bɔ, ǹ nə́ die zia biɛ.

²⁵A giala, ǹ nə́ n gòon pipiri Lawa li, ǹ nə́ n gòãn dii Pàayiidɛnaa lɛ ganaa.

²⁶Min baraa lɛ n baa sii a tele Lawa ganaa ka too kakabaa nɛ, a goóro ná a din siã kətərəə ne.

²⁷A giala, á kã a yɔrɔ zɔnɔ, a kolon nə́ bɔ, bɛ lɛ n we a yii ni.

²⁸Sɛnɛ, á re giɛ̃ kiwi soo ne, kion mɛn nə́ ke min ná a ba a-n wa, giɛ mà a kaa, á re giɛ̃ bɛ nɛ.

²⁹A re pàãma biɛ doo wa, a gɔn màn ba re beleboe wa. Màn ba re miɛ a gɔn màn li gána kɛ-n doo wa.

³⁰A die baa sii a la wɔlɔ tì kɛ la wa, a n die goɛ̃ ka da mɛn bɛ́ tɛ ná a gùrùn laa. Lawa á re siɛ a kiɛ̃ nɛ, ka a din lɛ gɔ́ɔ̃ ǹ piɛ̃ nɛ.

³¹Bɛ̀ á n foo doa sii kooron ganaa, a nə n din yiri siɛ̃. Kooro á die a saraa biɛ.

³²Bɛ á die n zɛnɛɛ, a tɔn gã. A n die goɛ̃ ka da gùrù mɛn bɛ́ a luu piɛ̃ doo wa.

³³A nɛ burun tá re kiɛ ka *rezɛ̃ da wɔ bɛ́ lɔn. A buũ á re papaɛ̃ ka *olivie da wɔ bɛ́ lɔn.

³⁴Sonbore, min baraa a kion gɔ́ɔ̃ kooro á die goɛ̃. A kion mɛn dɔ ka lɛ pii ǹ wɔrɔ nɛ, tɛ á re bɛ kuĩ.

³⁵Bɛ̀ min sii baraa gũ a gɔ́ɔ̃ nɛ, a n bɔ̀n yii. A n giɛ foo-ziziɛ̃ li koɛ a din ni.»