Read Samo, Southern Zɔb 20 Bible Online

Zɔb 20 - Samo, Southern bible

Zɔb 20

¹Bɛ kio, Sofaara mɛn bɛ́ boe Naaman, bɛ́ pɛ Zɔbu ni:

²— Ma gɔ́ɔ̃ wɛ̃maa nɛ. Bɛ lɛ n ke, maa taasiɛ á die ma diɛ boo-diɛ ganaa.

³Ma boo mɛn ma, a tá ma nɔmiɛ̃, sɛnɛ, maa taasiɛ á die a binyəə koe ma la.

⁴N ba doɛ̃ mà haalɛ lɛlɛ ǹ dun, minbuiin nɛ nə n zɛnaa á n da tán la lɔn,

⁵mà min baraan nyɛnyɛɛ a tɛ wa, Lawa bɔlɔ-tiili a foo kɔɔ̃nbaa a lui wa.

⁶Ta a sasabaa na á dɔ yǎa Lawa ganaa, ta a mìi la na á dɔ labaran ganaa,

⁷a n die papaɛ̃ ka yisi bɛ́ lɔn, bɔyaa ná a ba-n wa. Min mɛnɛn nə goã yii, bɛn man die nɔ̀n diɛ: «A n maa?»

⁸A n die woe ka narɛɛ bɛ́ lɔn, min ba re yii doo wa. A n die goɛ̃ ka narɛɛ bɛ́ papaɛ̃ bɛ̀ a n bɔ min yɔrɔ-a lɔn.

⁹Yii mɛn goã yii, bɛa re yii doo wa, a piɛ minin dinin yiri á die boe ne.

¹⁰A màn mɛn si doobaan la, a nɛnyaanan tá re bɛ sarɛɛ. A màn mɛn si, a din wɔn tá re wusii ǹ bɛ kɔ.

¹¹A we na á goã kaka ka tɔntɔraa ten ne, sɛnɛ, a kakabaa lɛ á die wɛɛ tán kun ni tii li.

¹²Sii baraa zɛnaa lɛ na á goã kɔɔ̃n a lɛ-n, á goã duri a lɛwɔn giulun dinin.

¹³A n piɛ̃, a ba n lɛ boe a ganaa wa, a lɛ n paraa nɛ a ganaa miɛ̃.

¹⁴Sɛnɛ, a màn-bii kɛ á re ziziɛ̃ a gɔ́ɔ̃ nɛ, á re n bɔyɛɛ a kɔɔsɛ kɔ ka miɛ̃ a sèwò ne.

¹⁵A pàãmabaa ǹ mànan kɛn lɛn á ǹ mui, á re pisii ǹ ni. Lawa á die ǹ wɛɛ a bɔ a gɔ́ɔ̃ nɛ.

¹⁶A goã màn mɛn piɛ̃, a n kɔɔsɛ ka miɛ̃ a sèwò ne, a n gɛ̀ dii ka miɛ̃ a sɔn-dɔ nɛ.

¹⁷A ba re zoo nyɔɔ yii ka a yii-n baa sii tán ka yìsi mu gole bɛ́ lɔn wa, a bɔ̀nyaa yɛ baa sii tán ka tà mu bɛ́ lɔn wa.

¹⁸A màn mɛn yɛ, á re bɛ toɛ walan, a re n mui la wa. A pii kɔ á màn mɛn yɛ, a die bii wa.

¹⁹A giala á mɛnaa doobaan la, á n gɔn bɔ ǹ ganaa. Á ǹ kion yu, sɛnɛ, a re doe wa.

²⁰Màn bɛ́ a doe a yii li mɛnɛn ke wa, a re boe la a na a naforo kɔn tamaa wa.

²¹A kuruubaa lɛ taman yii, màn kɔn goã liɛ la wa. Sɛnɛ, a yii-nyɛɛ lɛ a re beleboe wa.

²²Nɔmaa á die kirii la a pàãmabaa gole kɛ lɛ gɔ́ɔ̃ nɛ, sii tumaa á re bɔ̀n diɛ a ganaa.

²³Lawa n die toɛ bɛ̀ a tá n nɔ̀ lɛ piɛ̃ ka màn-bii ni ǹ mɛn waáraa, a na a foo-yoo babaraa kɛ yɔrɔ dia la. Bɛ lɛ n die a màn-bii biɛ, a n die gisĩ la ka la bɛ́ lɔn.

²⁴Ǹ zia da ǹ màn mɛn zɛnaa ka fɔlɔ nɛ, bɛ̀ a tá baa sii bɛ nyɛɛnɛ, ǹ kiɛ mɛn zɛnaa ka zan nɛ, bɛ á re foɛ̃.

²⁵Bɛ̀ á kiɛ lɛ woɛ̃ á bɔ a dɔ̀ɔ̃ nɛ, bɛ̀ á soo á n bɔ a foo-n lɔn, nyin-soo n kuĩ.

²⁶Wɔlɔ tì n die a wɔ gii biɛ. Minbuiin nɛ bɛ́ a tɛ mɛn koa wa, bɛ á re kuĩ. Ta màn mɛn goã a kion, bɔ̀n tá re bɛ yii.

²⁷Lawa á die pìi boe a sii baraa kɛ lɛ, kanaa minin tá re yui a gialaa.

²⁸Bɛ̀ Lawa foo yoo li ǹ mɛn pinaa, a kion a naforo ke, bɛ á die baa sii ka mu bɛ́ lɔn.

²⁹Min baraa a dɔlɔ n ka bɛ lɛ nɛ, Lawa koa nɛ. A wɔ gii n ka bɛ lɛ nɛ, Lawa á re diɛ a mìi ni.