Read Samo, Southern Zɔb 33 Bible Online

Zɔb 33 - Samo, Southern bible

Zɔb 33

¹Kanna kəni, nsɛ Zɔbu bǐɛ̃ kɔ, n nə n too kɔ ma lon. N too kɔ maa boon kɛn tumaa li.

²Á ke, man die n lɛ buĩ, ma lɛwɔn tá re boo diɛ.

³Man die boo diɛ n nɛ ka gɔ́ɔ̃ fubaa nɛ, sonbore dinsɔɔ̃-n ma á re pii.

⁴Lawa din na á masɛ zɛnaa ka a yiri ni. Pàãyiidɛnaa din lɛ gɔ́ɔ̃ ǹ piɛ̃ n toɛ ma yii á koo.

⁵Bɛ̀ n tá boe la, n ma lɛ si kəni, n yɔrɔ bɔ, n daa wɔ golee kɔn yɔrɔ-a.

⁶Lawa yɔrɔ-a, masɛ laanka nsɛ nɛ, wɔ tumaa n goon. Lawa na á ma dɔ zɛnaa ka gì ni.

⁷Bɛ lɛ nɛ, n baran nyɛ́ɛ baa ma-n wa, n nyan taasɛ mà man die n nɔmiɛ̃ wa.

⁸N da ǹ boo lɛ á tɔn ma too ne. N màn mɛn pɛ, má ma:

⁹Táa ń mà zɛ̀rɛ ba nsɛ-a wa, ń mà sii baraa ba n-a wa, Táa ń mà nsɛ n *yoreen ne, ń mà sã ba nsɛ li wa.

¹⁰Ń mà Lawa n giɛ zɛ̀rɛ li, á koɛ nsɛ ganaa, ń mà a nə n piɛ̃ ka nsɛ nɛ, á nsɛ biɛ zɔ́ɔ.

¹¹ Ń mà a na á nsɛ gòãn kaa kan nɛ, a nə́ n lɛ duĩ, a ba toɛ n tá n papasɛ wa.

¹²Zɔbu, man pii n ni, sonbore ba n lon ka bɛ-n wa. A giala, n miã bie ka Lawa nɛ, n tɔn a liere kɔ wa.

¹³Wàa na á baa, n tá Lawa liere koe? Ń bɛ̀ mà nsɛ á nɔ̀n diɛ la, mà a ba n lɛ diɛ nsɛ lɛ wa.

¹⁴Á boo dɔ din diɛ ka yɔrɔ gigiã nɛ, sɛnɛ, wɔ n wɔ ba n yiri koɛ li wa.

¹⁵ Lawa á boo diɛ min ni ka narɛɛ nɛ, á sii nyɛɛ min ni tèlò-n, bɛ̀ nyuù la-n biikoo mɛn li, bɛ̀ a tá waa-n tán biikoo mɛn li.

¹⁶Bɛa biikoo li, siin mɛnɛn bɛ́ nyɛ́ɛ diɛ, a n bɛn nyɛɛ minin manɛ, a doree kɔ ǹ la.

¹⁷Lawa n bɛ zɛnɛɛ, màn mɛn bɛ́ toɛ, a ǹ kanbaa ǹ nya ǹ dín lɛn ganaa, a ǹ kanbaa din gole kɔ ganaa.

¹⁸A n bɛ zɛnɛɛ miɛ̃ a tá ǹ kanbiɛ yala ganaa, a tá ǹ kurii gɔya gɛ̀ wɔ ganaa.

¹⁹Á min dɔ toɛ waa-n tán là-paparɛɛ gɔn, a gɔ̀nɔn yii n bìn diɛ, a n gɔn waa nɛ.

²⁰Bɛ̀ min tá nɔmaa-n miɛ̃, màn-bii tìĩ n boe a nyin ni, màn-bii mɛn din sii bɛ́ minin ganaa, bɛ tìĩ n boe a nyin ni.

²¹A n pɛrɛ a nya, ka min nə fɔ̃ a ganaa. A wen mɛnɛn bɛ́ ǹ goã yii wa, a gɔ̀nɔn siĩ n woe, a bɛn kaa kanaa.

²²A wɔlɔ n kunu koe gɛ̀ ganaa, a wɔlɔ n kunu koe geren piɛ ganaa.

²³Sɛnɛ, bɛ̀ lon a dia dí-a wole goon yɛ la, zɛlɛ goon toto, lon a dia dí-a wole duu damata bii, á minbuiin nɛ da zii pepere la,

²⁴á makara bɔ a ganaa, á pɛ Lawa nɛ, mà a nyan toa a wo yala-n wa, mà asɛ ná a nyin si ǹ giɔ̀mɔ yɛ,

²⁵bɛa biikoo li, a n wusii a nɛ ten gɔ̀nɔn bɔ, a n wusii a na a tenmaa waáraa gɔ̀nɔn saa.

²⁶Bɛ̀ á Lawa nyankɔ, Lawa á re n yɔrɔ bǐɛ̃ diɛ la. Lawa á re wusii a na a peperebaa dɔ̃. Á re golee Lawa yɔrɔ-a ka nyɛnyɛɛ gole ne.

²⁷Bɛa biikoo li, á re loe loe minin yɔrɔ-a, a pɛ: «Má sii baraa zɛnaa, ma kɔ zii lɛ wa. Sɛnɛ, Lawa ma kũ maa sii baraa li wa.

²⁸Á ma kanbaa, màn mɛn bɛ́ toɛ, ma baran gã wa. Á ma kanbaa, màn mɛn bɛ́ toɛ, ma yii wusoo a goã koo.»

²⁹Lawa n bɛ lɛ zɛnɛɛ minbuiin nɛ nɛ, dan ná a ba la wa. Gunyin paa bie wa, gunyin sɔɔ bie wa.

³⁰A n zɛnɛɛ, a tá a kanbiɛ yala ganaa, a n yiikoonaabaa ǹ tɛ fúlu kiɛ a ganaa.

³¹Zɔbu, n too kɔ ma lon doɛ̃. N lɛ tã, man die boo diɛ.

³²Bɛ̀ boo tá n lɛ-n n tá ma lɛ sii ni, a da, a giala, man giɛ li máa sonbore yɛ n lon.

³³Bɛ̀ boo dɔ ba n lɛ-n n tá diɛ wa, n too kɔ masɛ lon. Golee kiĩni, man die n darɛɛ sii-doɛ̃ ganaa.