Read Samo, Southern Zɔb 36 Bible Online

Zɔb 36 - Samo, Southern bible

Zɔb 36

¹Elihu wusoo á woo nyɛɛn ka boo ne, á pɛ kɛnɛn:

²«A si n ganaa doo boɛɛnɛ, Zɔbu, man die daraa koe n la. Boo kɔsɔn tá tɔn ma li, ma ǹ da Lawa a lɛa.

³Man die maa doɛ̃ lɛ boe sɔsɔɔ, ma maa Zɛnaali lɛ a peperebaa nyaa n nɛ.

⁴Sonbore, ma bɛ́ boo mɛn diɛ, soɛ bie wa. Doɛ̃ wole taãn nə ke n li kɛnɛn.

⁵Lawa n Pàãyiidɛnaa lɛa, a ba n la boe min kɔn ganaa wa! Pàã na a lon, bɛ̀ á golee sii mɛn li bɛ a sàabiɛ wa.

⁶A toɛ min baraa yii goã koo wa, a din dɔ n sonbore koe doobaan la.

⁷A ba n yɔrɔ bɔyɛɛ a bɔ min sonboren la wa. A n kiin koɛ kii dankan la, a ǹ koa kiibaa la yǎa duduu, màn mɛn bɛ́ toɛ ǹ gugurubaa yɛ.

⁸Ta maǹ nə ǹ yii ka fɔlɔ biɛn nɛ, ta nɔmaa sii na á ǹ yɛ,

⁹Lawa n bɛ zɛnɛɛ, a tá ǹ nya ǹ dín nyɛɛ ǹ dinin manɛ, ǹ sii baraan kɛn lɛn, ǹ din gole kɔ ǹ siin kɛn lɛn.

¹⁰Lawa nə n gɔn wɛɛ ǹ nɛ, a tá doree koe ǹ la. A n pii ǹ ni, mà ǹ nə n bɔ kɔkɔrɔbaa wɔlɔ li.

¹¹Bɛ̀ ǹ nə́ n too kɔ ǹ nə́ n dinin doroo, ǹ tá re ǹ lɛawaan giala nyɔmiɛ̃ yii-nyɛɛ gɔ́ɔ̃ nɛ, ǹ tá re n lɛ̀n giala nyɔmiɛ̃ nyɛnyɛɛ gɔ́ɔ̃ nɛ.

¹²Sɛnɛ, bɛ̀ ǹ nə n too kɔ wa, ǹ tá re ǹ dinin koe gɔya gɛ̀ la, ǹ tá re giɛ̃ ǹ sii-doɛ̃baã kɛ lɛ taman yii.

¹³Min mɛnɛn bɛ́ ǹ ba golee-n Lawa li wa, ǹ foo n yoo-n li miɛ̃, ta Lawa lɛ na á fɔlɔ biɛn kaa bɛn ganaa, ǹ ba gu diɛ wa.

¹⁴Maǹ nə́ n toɛ ten ǹ gã, ǹ nyin nə nyɛɛ kɔrɔbaa gɔ́ɔ̃ nɛ.

¹⁵Sɛnɛ, nɔmaa-wɔle ke, a din nə bɛ nɔmiɛ̃ a tá a kirisibiɛ. A din nə nɔmaa diɛ a mìi ni, a tá a too baɛ̃.

¹⁶Nsɛ dɔ, Lawa á re n sii nɔmaa la, n tá re goɛ̃ yii-nyɛɛ la, min kɔn ná a ba n nɔmɛɛ wa. A din tá re màn-bii sonbore gigiã koɛ tán n giulun.

¹⁷Sɛnɛ, bɛ̀ n kiri wɔ ka min baraa bɛ́ lɔn, kiri á re mɛnɛɛ n la.

¹⁸Sɛnɛ, n baran n saa foo li, n là wɔ n din a sii li wa. N baran saa lɛ pii ǹ màn li wa.

¹⁹N lɛ-dɛ kɛ a boe la a n si nɔmaa kɛ la wa, ta ma n nə́ n pàã tumaa kaa kun, a boe la wa.

²⁰N baran ga tèlò a kɔ li wa, a giala, a din lɛ n minin boe boe ǹ bǎã nɛ.

²¹N din kũ, n baran n din kɔ sii baraa la wa. A giala, bɛ lɛ na á toa n tá nɔmaa kɛ lɛ din we.

²²Lawa n nyɛɛ ka a din pàã kɛ nɛ, mà màn kɔn ba kiɛ̃ asɛ la wa. Die n boe la a min doroo ka Lawa bɛ́ lɔn?

²³Die n Lawa a nya ǹ dí pii ni? Die n pii ni, mà á sã?

²⁴N yiri koa li Zɔbu, n Lawa a nya ǹ dí laakalaa. Minbuiinin man loe loe, bɛ̀ ǹ bɛ lɛ laakalaa.

²⁵Minbuiin nɛ tumaa n giɛ bɛ lɛ ganaa, min tumaa nə n toɛ tìãlɛa, a bɛ lɛ yɛ.

²⁶Sonbore, Lawa á gole. Sɛnɛ, wɔ n wɔ a boe la, wɔ á doɛ̃ wa. A Lawabaa lɛ dɔ, min ba boe la, a na a lɛ̀ lɛ yɛ a pɛ wa.

²⁷Lawa n mu bisin baɛ̃ piɛ̃ li, a wo-n lon, a tɔn kaa la lɛa.

²⁸Bɛ lɛ n boe labaran nɛ kiɛ, a n doɛ minbuiin nɛ tumaa la.

²⁹A bɛ́ á labaran kɛn nyɔmaa lon lɔn, die n bɛ giala miɛ A lon a paraa ke, die n bɛ giala miɛ.

³⁰Ga, a n tɛ boe bɛ̀ a n din lɛnpɛnɛ nɛ, a n yìsi mu zuzulu kɛ toɛ wɔlɔ tì li.

³¹A n minbuiinin toe ka bɛa yɔrɔ lɛ nɛ[5] a n màn-bii gigiã dɔ koe ǹ la ka a din yɔrɔ goon lɛ nɛ.

³²A na a tɛ-pɛ lɛ guĩ a gɔn, a saa a dia a woo ǹ bǎã nɛ.

³³A paraa kɛ na a daa nyɛɛ, tɔɔn dɔn dinin tá doɛ̃ mà á die.