Read Samo, Southern Zɔb 40 Bible Online

Zɔb 40 - Samo, Southern bible

Zɔb 40

¹Dɛnaa Lawa wusoo á pɛ Zɔbu ni:

²«Nsɛ mɛn bɛ́ Pàãyiidɛnaa liere koe, n yii n we n tá Lawa zɛ̀rɛ biɛ? Bɛ̀ boo tá n lɛ-n, a da kəni.»

³Zɔbu tɔ́n Dɛnaa Lawa lɛ si á pɛ kɛnɛn:

⁴«Kaa, ma mìi á kiɛɛrɛ bɛ ganaa. Man die n lɛ sii mà wàa? Man die n gɔn koe ma lɛ lɛ.

⁵Má boo da gunyin goon, ma a re n lɛ sii doo wa. Má da gunyin paa dinin, ma a re màn kɔn diɛ li doo wa.»

⁶Dɛnaa Lawa nə́ n toa piɛ̃ gole bii, á Zɔbu lɛ si á pɛ nɛ:

⁷«N bii yii, n golee giĩbaa la, man die nɔ̀n diɛ n la, nsɛ masɛ daraa kəni!

⁸N din parsii, mà n ba masɛ a kiri-kurii lɛ biɛ a lɛa wa? Man giɛ li n masɛ zɛ̀rɛ baa, n sonbore kɔ n din la?

⁹Pàã tá n lon ka masɛ Lawa wɔ bɛ́ lɔn? N lɛn dɔ maa la a paraa kɛ wuu li?

¹⁰Haya kəni, n bɛ́ boe sii la... Gugurubaa laanka golebaa wɔ n din-a, siĩnbaa laanka nyaǹ kaa n din la.

¹¹N foo bɛ́ á yoo, n gàãn kaa minbuiinin la. Min mɛnɛn bɛ́ n dinin gole koe, bɛn gisĩ bǎã goon!

¹²Nsɛ, din gole-kɔlen kɛn munu bǎã goon, n min baraan kɛn tuturu bǎã goon!

¹³Ǹ tumaa kaa tii li yɔrɔ goon la, ǹ tumaa kaa gɛ̀ a kòso-n!

¹⁴Bɛ̀ ń boo la ń bɛ zɛnaa, masɛ dinmaa lɛ tá n nyàa siɛ lon, a giala, n din pàã na á gɔ̀lɔ̀baa kɔ n la.

¹⁵Ga mu li ǹ bərə gole kɛ ganaa, má zɛnaa ka n dɔ bɛ́ lɔn. A n buu soɛ̃ ka dii bɛ́ lɔn.

¹⁶Sɛnɛ, ga pàã mɛn bɛ́ a kii ni, kakabaa mɛn bɛ́ a nɔ̀ biɛn kɛn nɛ.

¹⁷A nə n mui dii ka da kaka bɛ́ lɔn, a gisin man biɛ lɛa kɔn la kuri.

¹⁸A wen man kaka ka zan tã bàbàlan manɛ, a garasa wen man ka fɔlɔ bàbàlan manɛ.

¹⁹Lawa a màn zɛnaan lɛn tumaa a bibinaa nɛ. Bɛ̀ á n bɔ Lawa din ni, màn kɔn ba boe la wa.

²⁰Sɛnɛ, a na a buu soɛ̃ tentenen la, don màn tumaa bɛ́ sàn koe bǎã mɛn nɛ.

²¹A n wɛɛ tán nyan daanan giulun, a nə n duri buruu gòã li, tà lɛ-a.

²²Nyan daanan kɛn manə ǹ wúlu koe lɛ, tà lɛ-a ǹ dan kɛn man a lɛnpɛnɛ.

²³Ta tà lɛ na á pã á toɛ̃, asɛ a bìn diɛ a din ganaa wa. Ta mu lɛ na á yoo ka pàã gole ne, á dɔ a lɛ li, nyɛ́ɛ ba a ganaa wa.

²⁴Die n boe la, a wo golee a yɔrɔ-a a kũ? Die n boe la, a biɛ koa nɛ, a kũ a na a nyin fɔ̃?

²⁵ *Leviatan ke, n tá re koɛ̀ɛ̃n koɛ bɛ nɛ n kũ? N tá re boe la n kũ a lɛwɔn ganaa ka biɛ nɛ?

²⁶N tá boe la n biɛ da a nyin ni? N tá boe la n na a lɛ kawɔ fɔ̃ ka kiɛ nɛ?

²⁷Á re gòã-kũ diɛ nsɛ ganaa mà n na asɛ toa walan? Á re makara bɔ ǹ boo diɛ n nɛ?

²⁸Á re n lɛ koe a dí nya n nɛ? Á re goɛ̃ n bɛ̀rɛ lɛa miɛ̃ yǎa a gɛ̀?

²⁹N tá re sàn koe ne, ka n bɛ́ sàn koe ka bàan nɛ lɔn? N tá re boe la n yii n da tán, mà n nɛlɔn nə sàn kɔ nɛ?

³⁰Tà-baalin tá re n doɛ kɔn ǹ na a pii dɛ? A boe la a n gii pii-kɔlen bii?

³¹N tá re a gɔ̀nɔn fɔfoɛ̃ ka kiɛ lɛ bole-a nɛ? N tá re a mìi fɔfoɛ̃ ka sɛmiɛ̃ nɛ?

³²N gɔn din da a ganaa kooro n ga-a. Zia lɛn zɔɔ̃ a ganaa, n ba re tii a ganaa paa wa.