Read Samo, Southern Zɔb 6 Bible Online

Zɔb 6 - Samo, Southern bible

Zɔb 6

¹Zɔbu ná a lɛ si á pɛ:

²«Ee! Bɛ̀ maa foo-ziziɛ̃ kɛ n boe la a tá n zoɛ̃, bɛ̀ maǹ maa nɔmaa kɛ tumaa kiɛ kun, ǹ nə́ diɛ màn zɔɔ̃ ǹ màn la,

³bɛ̀ ǹ gugurubaa la kɔ̀ mu li ǹ nyɔɔsɔ̃ wɔ-n kanna. Bɛ lɛ n ke maa boon lɛn ba a zii li wa.

⁴A giala, Pàãyiidɛnaa a kiɛn nə́ ma fɔ̃, ma gɔ̀nɔn nə́ ǹ sèwò mi. Lawa a nyɛ́ɛ da ǹ siin man kiɛ kɔn kio, ǹ nə́ die ma gialaa.

⁵Dundun tá re n toɛ buu buruu li, a wusoo a lɛ baa? Dii á re màn-bii toɛ tán a li, a wusoo a lɛ baa?

⁶Sɛnɛ, màn mɛn bɛ́ tɛtɛ, yìsi ná a ba li wa, min tá siĩni a bɛ bii? Kɔɔ̃nbaa tá koo gìi a mu fu kɛ nɛ?

⁷Ma bɛ́ ma goã lɛ koe ma á n gɔn diɛ màn mɛn ganaa wa, bɛ lɛ na á wusoo á maa màn-bii baa, a laanɛ a kɔɔ̃n wa.

⁸Die bǐɛ̃ n die maa nyankɔ kɛ lɛ sii? Ma gɔ́ɔ̃ bɛ́ màn mɛn ganaa, Lawa din die a bɛ kɔ ma la.

⁹Lawa bǐɛ̃ kɔ a ma yɔyɔrɛ, a n gɔn din dia gɔrɔ, a ma giala nyɔmɔɔ.

¹⁰Nɔmaa babaraa kɛ lɛ bii, sii mɛn bɛ́ nyɛnyɛɛ diɛ ma ganaa, bɛ n ka kɛ nɛ: man piã ka Lawa sonbore lɛ a boon ne wa.

¹¹Ma pàã din nə maa doo, ma tɔn nə n yii da? Sii mɛn bɛ́ a bie re sàabiɛ wa, a simaa là n ka wàa nɛ?

¹²Ma á kaka má dɔ kɔlɔ li? Ma gɔ̀nɔn lɛ, zan tã nɛ?

¹³Dɔmalɛ na a ba masɛ lon sonbore wa. Dɔmalɛ wolen tumaa woo ǹ nə́ ma daa.»

¹⁴Zɔbu tɔ́n pɛ: «Bɛ̀ min ba makara boe ǹ miã ganaa wa. Bɛa dɛnaa nə n yii we Pàãyiidɛnaa kɛ la.

¹⁵Á ke, maa giaáran nə́ ma foo ziziɛ̃: Bɛ̀ ń nə́ n yiri koa tà mɛn a mu ganaa, man woe yiɛ bɛ̀ á piɛ̃.

¹⁶Bɛ̀ la mu nya, tàn man piɛ̃-n ka mu tutuu ni.

¹⁷Sɛnɛ, sɛ̀fuu waáraa, maǹ piɛ̃, wasa waáraa, ǹ mu n nyɛɛ.

¹⁸Nyɔɔmaadɛnan mɛnɛn bɛ́ zii tɔ we, bɛn man kanɛɛ bɛ̀ ǹ nə n bɔ ǹ zii la, bɛ̀ ǹ wo ga mu li a nɛ. Bɛn manə n diɛ don la, bɛ̀ ǹ papaã.

¹⁹Temaa nyɔɔmaa zii tɔ wɔlen yii na á goã a din la, Sabaa pii-kɔlen foo na á goã doa nɛ a din ganaa.

²⁰Ǹ bɛ́ ǹ nə́ taasɛ mà ǹsɛn tá re mu yii bǎã mɛn nɛ, ǹ nə́ woo ga, ǹ nə́ fɔ̃. Á foo-ziziɛ̃ baa ǹ ganaa.

²¹Ka dɔn man miɛ̃ masɛ wɔ paǹ li. Ka ma yɛ lɔn, nyɛ́ɛ na á ka kũ, ká n nyɛnaa ma nɛ.

²²Má pɛ ka nɛ máa ka màn kɔ ma la ya? Má pɛ ka nɛ máa ka ka gɔn màn kɔ ma la ya?

²³Ma bin pɛ ka nɛ máa ka ma si zɔ́ɔ la? Ma bin pɛ ka nɛ máa ka ma kanbaa min kakaarɛn kɛn ganaa?

²⁴Man die n lɛ tiɛ̃ kəni, ka ma doroo. Ma bɛ́ má sã ka sii mɛn nɛ, ka bɛ pɛ ma nɛ.

²⁵Bɛ̀ boo á pepere, min ba n piɛ̃-n wa. Sɛnɛ, ma zɛ̀rɛbaa mìi din ni ka wàa nɛ?

²⁶Maa boon kɛn lɛa nɛ, ka tá ma gialaa? Foo busu ǹ boo ke ma á diɛ, ká mà piɛ̃ nɛ.

²⁷Ka n mɛnɛɛ nɛ toenən la, ka á re kaa giaára dinin siɛ̃ pii ni.

²⁸Ka n yɔrɔ dia ma la kanna kəni! Ma á boe la ma soɛ bɔ ka nɛ?

²⁹Ka wusoo ka kio ne, ka nyan mɛnaa ma la wa. Ka wusoo ka kio ne, ka dɔ̃ sonbore, mà ma sii la wa.

³⁰Soɛ soo ma lɛ-n ya? Ma lɛ a boo baraa bɔkɔnlɛ doɛ̃ wa?