Read Samo, Southern Zɔb 8 Bible Online

Zɔb 8 - Samo, Southern bible

Zɔb 8

¹Bɛ kio, Bildaadi mɛn bɛ́ boe Suwaa, bɛ́ tɔ́n pɛ:

²«Nsɛ Zɔbu, ma n die goɛ̃ bɛ miã boon kɛn diɛ yǎa biĩ dinin koɛ? N bɛ́ boo kakaarɛ mɛn diɛ, màn din ba li wa.

³Lawa lɛ á sii kɔkɔrɔ zɛnɛɛ ya? Pàãyiidɛnaa lɛ á sii pepere kɔrɛ?

⁴Bɛ̀ n nɛnyaanan nə́ sii la Lawa la, ǹ sii mɛn zɛnaa, bɛ lɛ a gɛ̀ na á ǹ dɛ.

⁵Sɛnɛ, bɛ̀ nsɛ dɔ n din-a, ń ga Lawa li, bɛ̀ ń Pàãyiidɛnaa gòã kũ, mà a makara bɔ n-a,

⁶bɛ̀ n tá pepere lɛn sonbore, zɛ̀rɛ ná a ba n-a wa, Lawa á re giɛ n walan. N bɛ́ kɔnboe ka màn mɛn nɛ, á re wusii a bɛ kɔ n la.

⁷N màn din yɛ lɛlɛ wa, n biɛ̃ ǹ tá re liɛ n lɛlɛ ǹ kɛ nɛ.

⁸Nɔǹ da lɛlɛ minin kɛn la. Ǹ digolon nə sii mɛn dɔ̃, n taasɛ bɛ ganaa.

⁹A giala, wɔsɛn man gunun nɛnyaanan lɛa, wɔ a màn kɔn doɛ̃ wa. Wɔa yiikoonaabaa lɛ tán la, a n ka màn nyín bɛ́ lɔn.

¹⁰Sɛnɛ, ǹsɛn tá re boo diɛ n nɛ, n doroo kɔ n la, ǹ tá re suusun kɛn boe ǹ taasiɛ nɛ ǹ pɛ n nɛ:

¹¹Kàwɔ buu á boe bǎã kooro ne, bɛ̀ bǎã basiɛ̃ ná a bie wa? Tà buu á gole koe kooro bɛ̀ mu ná a bie wa?

¹²A nə n toɛ bɔlɔn lɛa, a laa buu gialakun kɛ nyɛɛnɛ, ǹ nə́ ǹ tɔn kuru wa.

¹³Min mɛnɛn yiri bɛ́ boe ka Lawa nɛ, bɛ lɛ miã n die bɛn yii. Min mɛn bɛ́ n piɛ̃ ka Lawa nɛ, a foo-doa á re kooro biɛ.

¹⁴A foo doa ǹ bǎã lɛ, gɛ̀sɛ nɛ. A foo bɛ́ doa-n màn mɛn ganaa, nɔɔ kii ni.

¹⁵Ta á n foo doa a gɔn màn ganaa, a n kiɛ̃. Ta á n paraa a ganaa, a goɛ̃ wa.

¹⁶Min mɛn yiri bɛ́ boe ka Lawa nɛ, bɛ n ka koronkoron bɛ́ lɔn, buruu wasa giulun, a nə n gùrùn nyɔmiɛ̃ dù gɔrɔ lɛ lalan.

¹⁷Ta a n kɔlɔ bǎã nɛ, a nə n gòãn we tán kaka, a gòonən nə dɔ yǎa para ganaa.

¹⁸Sɛnɛ, bɛ̀ ǹ nə́ woɛ̃, ǹ nə́ bɔ a giala bǎã nɛ, min din ba doɛ̃ mà á goã walan lɛlɛ wa.

¹⁹A sii-zɛnaan là n ka kɛ nɛ. Da kɔsɔ á re boe a bǎã nɛ.

²⁰A din nə ke. Lawa a min pepere tii wa, a ba n doe min baraan lɛ wa.

²¹Kànaa ka boɛɛn nɛ á re wusii a yaa da n lɛ-n, á re foo kɔɔ̃nbaa ǹ loe diɛ n lɛ-n.

²²Min mɛnɛn bɛ́ n biɛ zɔ́ɔ, sìi á re ǹ kuĩ. Min baraan kɛn kɛbɔlɔ á re kiɛ.»