Read Samo, Southern Zɔb 9 Bible Online

Zɔb 9 - Samo, Southern bible

Zɔb 9

¹Zɔbu tɔ́n pɛ:

² «Bɛ n taãn lɛa. Ma á doɛ̃ má a n miɛ̃. Sɛnɛ minbuiin nɛ din nə siɛ lɔn, a tɔn goã pepere Lawa yɔrɔ-a?

³Ta minbuiin nɛ n kɔn lɛ baɛ̃ ka Lawa nɛ, boo duu goon bii, minbuiin nɛ a boo goon din yii a da wa.

⁴Sii-doɛ̃ na á goã Lawa din ni, pàã tumaa na á goã a din ni. Die nə n gòãn dii a ganaa, n wusoo n na a laakalaa?

⁵A din nə kelen boe ǹ bǎã nɛ, bɛ̀ a foo yoo, a nə ǹ woɛ̃ bɛ̀ a ǹ làfu kɔ, ǹ nə ǹ ba boe a siére-a wa.

⁶A din nə tán zoɛ̃ bɛ̀ a bɔ a bǎã nɛ. A din nə toɛ a bìbìn nə́ bìn diɛ.

⁷A n boo diɛ ka wasa nɛ, a boe wa, a n leeren lɛ tiɛ̃, ǹ ba soe wa.

⁸A na á lon kũ á nyɔmaa, a dinsɔɔ̃. Yìsi mu gole ke, á tɔ wɔ bɛ la.

⁹ A din na á Leere Sɔrɔ laanka Bɛ̀rɛ-sãlin[2] zɛnaa, gusin a lɛ̀gɔn la wɔn nɛ, ka gɔsɛ a lɛ̀gɔn la wɔn nɛ.

¹⁰Á sii dadaran zɛnaa, wɔ ba ǹ giala miɛ wa. Á kaãbaa ǹ siin zɛnaa, lɛ ba la wa.

¹¹Ka ga le, ta a n kiɛ̃ ma li, ma yii a yii wa. Ta a na á n lɔ ma-a á kiɛ̃, ma a doɛ̃ wa.

¹²Bɛ̀ á màn mɛn si, die n gɔsiɛ a bɔ a gɔn? Bɛ̀ á sii mɛn zɛnaa, die n nɔ̀n diɛ la?

¹³Bɛ̀ Lawa foo yoo, yǎa a sii zɛnɛɛ. Mu li ǹ màn baraa tumaa nə n gùrù naɛ nɛ.

¹⁴Masɛ n siɛ lɔn ma tɔn a lɛ si? Man die wàa mɛn boo yii ma da nɛ?

¹⁵Ta sonbore din nə ma lon, ma a re a lɛ sii wa. Man die makara nyankoe maa kiri-kuruli lon.

¹⁶Ta man má lɛ dia la á n nyəə ma la, ma a re golee li máa á n too kɔ ma lon wa.

¹⁷Á ma yɔyɔrɛ, ma yii ba a giala-a wa, a n màn diɛ maa wɔ̀lɔ̀ li, mìi ba la wa.

¹⁸A toɛ ma á piɛ̃ sii wa. Sɛnɛ, a n toɛ sii kɔɔsɛ á liɛ ma yii ni.

¹⁹Bɛ̀ má pàã sii da a nɛ, a din dɔ n pàã lɛ lɛa. Bɛ̀ ga sonbore li ni, die n die a kiri we?

²⁰Ta man pepere, ma din lɛ n die ma diɛ sii ni. Ta zɛ̀rɛ ba ma-a wa, ma din lɛ n die ma zɛ̀rɛ biɛ.

²¹Zɛ̀rɛ tá ma-a hinlaa a ba ma-a wa, ma a doɛ̃ wa, maa tá kanaa din tìĩ bɔ ma nyin ni.

²²A din goon ne, a din lɛ n ke má pɛ: A n zɛ̀rɛbaãnaa dii, ka a bɛ́ zɛ̀rɛdɛnaa dii lɔn.

²³Bɛ̀ sii kaka din min dɛ bǎã goon ne, Lawa n yaa we zɛ̀rɛbaãnaan lɛn nɔmaa ganaa.

²⁴Kanaa lɛ n min baraan gɔn. Lawa din nə n gɔn koe kiri-kurulin yii lɛ. Bɛ̀ a din bie wa, die kɔsɔ nɛ?

²⁵Maa lɛawaan lɛn gòã yii á fuu, ǹ nə́ la baa-silin manɛ, Maǹ baa sii, má n ma tɔn yii-nyɛɛ yɛ wa.

²⁶Maǹ kiɛ̃ fufuu, ka mu la ǹ goon mɛn bɛ́ puusə. Maǹ ka giogialatã-a n woe màn siɛ tán.

²⁷Bɛ̀ má pɛ, máa man die n yiri boe ma bɔ maa nɔmaa siin kɛn tumaa kio, man yɔrɔ kaa, man nyɛnyɛɛ,

²⁸ma gɔ̀nɔn nə wusii bɛ̀ a bìn da maa fuu siin lɛn nyɛɛnɛ. Ma á doɛ̃ máa n ba re sonbore koe ma la wa.

²⁹Ma á doɛ̃ máa zɛ̀rɛ lɛ n die ma din kuĩ. A là n ka wàa nɛ, man din nɔmaa kooro.

³⁰Ta man má n zoo ka sɛfɔnɔ nɛ, ta man má n gɔnɔn pii sɔmaa li,

³¹ma n die wusii n ma nyɛnaa, n ma da bɛrɛɛ li. Ma tìĩ din nə die boe ma din a wɔ ǹ mɔnaan manɛ.

³²A bɛ́ a bie ma miã minbuiin nɛ lɛa, ma tɔn a lɛn bobo wa. Ma a boe la ma bíi, ma wo kiri wɔ a ganaa wa.

³³Bɛ̀ wɔa waa kɔn wole lɛ sɛ din na a tan, a wɔ dinin min paa kũ a wɔ bɔ kɔn.

³⁴Bɛ n die toɛ Lawa na a bàlà yɔrɔ saa a bɔ ma la, màn mɛn bɛ́ toɛ, a nyɛ́ɛ da ǹ siin kɛn baran nyɛ́ɛ da ma ganaa doo wa.

³⁵Bɛ̀ á n baa miɛ̃, man die boo diɛ nɛ, nyɛ́ɛ ná a ba ma ganaa wa. Sɛnɛ a bɛ́ a miɛ̃ wa, ma din laanka ma din ni.