Read Samo, Southern Loe 10 Bible Online

Loe 10 - Samo, Southern bible

Loe 10

¹Dɛnaa Lawa, wàa na á baa n tá n wɔlɔ lui ma ganaa? Wàa na á baa n tá n duri ma la nɔmaa biikoo li?

²Min baraan kɛn manə n dinin gole koe. Maǹ boe nɔmaa-wɔlen kɛn yii ni. Maǹ nə́ ǹ kuĩ ka ǹ sii-doɛ̃ siin ni.

³Min baraa nə n din kalɛɛ, mà asɛ boo sii la. Bɛ̀ á ná a wurumubaa ǹ mànan lɛn yɛ, a n sɔ kiɛ Dɛnaa Lawa la, bɛ̀ a da yaa lɛa.

⁴Min baraa nə n din gole koe, a ba giɛ Lawa li wa. A taasiɛ tumaa n ka kɛ nɛ: mà Lawa banban.

⁵A din yii li, asɛ wɔ n bǐɛ̃ koe biikoo tumaa li. Lawa a kiri kurii ke lon walan, bɛ wɔlɔ á sɔsɔɔ asɛ ganaa, a na a zɔ́ɔn kɛn tumaa diɛ yaa lɛa.

⁶A n taasɛ, mà sii kɔn ba boe asɛ la wa, mà koe sii kɔn ba re asɛ yii duduu wa.

⁷ A lɛ gɔ́ɔ̃ ǹ boo yii n baraa, soɛ, kakaarɛ, boo ziziɛ̃ laanka boo basaã n soe a lɛ-n.

⁸A n kuu koe kigialan li, a nə n duri bɛ̀ a zɛ̀rɛbaãnaa dɛ. A nə n yii gɔsiɛ pàãwɛɛnaa li,

⁹a nə n duri á kuu koe, ka yàra bɛ́ kuu koe daã-n lɔn. A n kuu koe doobaa ganaa á n kuĩ, a na a biɛ koɛ á n doobaa kuĩ ni.

¹⁰Bɛ̀ a gɔn dɔ pàãwɛɛnaa lɛ ganaa, a n dii a duwəə tán, a tuturu tán[9].

¹¹A n taasɛ mà Lawa yiri n boe, mà a giɛ kɛ ganaa wa, mà a yii ba kɛ ganaa wa.

¹²Ee, Dɛnaa Lawa, bǐɛ̃ kɔ n yoo! Lawa, n din nə n gɔn saa! N yiri nyan bɔ ka pàãwɛɛnaan kɛn nɛ wa!

¹³Wàa na á baa min baraa kɛ n Lawa diɛ yaa lɛa, á n pii mà sii kɔn ba boe a-n wa?

¹⁴Sɛnɛ, Lawa, ǹ bɛ́ basaã mɛn koe minin manɛ, ǹ nə́ fuu nyɛɛ ǹ nɛ, n din bɛ tumaa yɛ. Ǹ sii tumaa saa n gɔn. Doobaa na a sii tumaa toɛ n din gɔn. N din nə n doe nɛ toen lɛ.

¹⁵Min baraa kɛ pàã nya. A baraabaa lɛ papaã, min din baran a gòɛ̃ yɛ wa.

¹⁶Dɛnaa Lawa n kii lɛa yǎa duduu. Á Lawa doɛ̃baã wolen loo á ǹ bɔ a gána nɛ.

¹⁷Dɛnaa Lawa, n din bɛ́ n pàãwɛɛnaan gɔ́ɔ̃gɔ́ɔ̃ ǹ siin zɛnɛɛ, n din nə ǹ foo taɛ̃, n din nə n too koe ǹ lon taãn-taãnɛ.

¹⁸N din nə sonbore koe nɛ toen la, ka ǹ bɛ́ fuu nyɛɛ min mɛn dɔ nɛ. Bɛ lɛ n die toɛ minbuiin nɛ kooro kɔn ba re boe ǹ miã yii-n doo kanaa kɛ-n wa.