Read Samo, Southern Loe 107 Bible Online

Loe 107 - Samo, Southern bible

Loe 107

¹ Ka barka da Dɛnaa Lawa nɛ, a giala, á siĩni. A kɔn-narɛɛ gole kɛ a nyɛɛ duduu wa.

²Dɛnaa Lawa kasɛn mɛnɛn bɔ sii ni, ka wusoo ka bɛ pɛ. Á ka si kaa zɔ́ɔn la,

³á ka bɔ gánan tumaa nɛ, á ka lɛ sɔkɔn, a saa lɛ̀giala ganaa a wo lɛ̀nyɛɛn li, a saa gusin a lɛ̀guru ganaa a wo gɔsɛ a lɛ̀guru li.

⁴Min tɛn papaã don sa bii, zii banban ǹ tá koe lɛ wa, ǹ yii ba kiwi-a ǹ tá giɛ̃ a-n wa.

⁵Bòo nə́ ǹ kũ, mu boro nə́ ǹ kũ, kanaa tìĩ bɔ ǹ nyin ni.

⁶Ǹ bɛ́ fuu lɛ gɔ́ɔ̃ nɛ, ǹ nə́ n lɛ dɛ Dɛnaa Lawa ganaa, Dɛnaa Lawa nə́ ǹ si ǹ nɔmaa kɛ la.

⁷Dɛnaa Lawa nə́ ǹ da zii pepere la, á woo ǹ ne giã ǹ bǎã kɔn nɛ.

⁸Dɛnaa Lawa a kɔn-narɛɛ á gole, ka barka da-n bɛa lɛa. A bɛ́ kaãbaa ǹ siin mɛnɛn zɛnɛɛ minbuiin nɛn manɛ, ka barka da-n bɛa lɛa.

⁹A giala, mu boro bɛ́ á goã min mɛnɛn ganaa, á mu kɔ bɛn la ǹ nə́ mi. Bòo bɛ́ á goã min mɛnɛn ganaa, á màn kɔ bɛn la ǹ nə́ bii ǹ nə́ kã.

¹⁰Min tɛn na á goã wɔlɔ tì li, wɔlɔ tì biribiri li, ǹ nə́ goã gini ka maǹ kòso-n, fɔlɔ biɛn nə́ ǹ gɔn-a,

¹¹a giala, ǹ nə́ Lawa bɔlɔ tii, ǹ nə́ n piã ka Lon a Lawa Gole a sii yɔrɔ-bɔ nɛ.

¹²Á ǹ doroo ka fuu babaraa nɛ, ǹ pàã nya, min din banban á n doe ǹ lɛ wa.

¹³Ǹ bɛ́ fuu lɛ gɔ́ɔ̃ nɛ, ǹ nə́ n lɛ dɛ Dɛnaa Lawa ganaa, Dɛnaa Lawa nə́ ǹ si ǹ nɔmaa kɛ la.

¹⁴Á ǹ bɔ wɔlɔ tì li, wɔlɔ tì biribiri li, á ǹ fɔlɔ biɛn fore á ǹ bɔ ǹ ganaa.

¹⁵Dɛnaa Lawa a kɔn-narɛɛ á gole, ka barka da-n bɛa lɛa. A bɛ́ kaãbaa ǹ siin mɛnɛn zɛnɛɛ minbuiin nɛn manɛ, ka barka da-n bɛa lɛa.

¹⁶A giala, kiɛnlɛ-a ǹ goon mɛnɛn bɛ́ zan lɛa, á bɛn yiɛ, á ǹ tã ǹ fɔlɔ babàlàn yiɛ.

¹⁷Ǹ Lawa bɔlɔ tii lɛ a lɛa, gialakunun nə́ baãnaan baa, ǹ sii baraan lɛn lɛa, ǹ nə́ nɔmaa kɔ ǹ dinin la.

¹⁸Màn-bii tumaa tìĩ bɔ ǹ nyin ni, ǹ nə́ diri gɛ̀-wɔ lɛ la.

¹⁹Ǹ bɛ́ fuu lɛ gɔ́ɔ̃ nɛ, ǹ nə́ n lɛ dɛ Dɛnaa Lawa ganaa, Dɛnaa Lawa nə́ ǹ si ǹ nɔmaa kɛ la.

²⁰A ná a boo dia á daa ǹ kirisibaa, á daa ǹ si gɛ̀ la.

²¹Dɛnaa Lawa a kɔn-narɛɛ á gole, ka barka da-n bɛa lɛa. A bɛ́ kaãbaa ǹ siin mɛnɛn zɛnɛɛ minbuiin nɛn manɛ, ka barka da-n bɛa lɛa.

²²Ka barka da ǹ wúlu mànan kɔ Lawa la. Ka foo kɔɔ̃nbaa ǹ loe lɔ, ka a nya ǹ dín kɛn laakalaa nɛ.

²³Min mɛnɛn bɛ́ we kɔ̀ mu li ǹ goon ne, bɛ̀ ǹ wo zii ni, min mɛnɛn bɛ́ ǹ dí nyɛɛ mu gole kɛ la,

²⁴bɛn nə́ Dɛnaa Lawa a nya ǹ dín lɛn yɛ, ǹ ná a kaãbaa ǹ siin lɛn yɛ kɔ̀ mu la.

²⁵Á pɛ mà piɛ̃ gole bɔ, bɛ́ yoo ka mu koreen ne.

²⁶Ǹ goo lɛ goã yui lon, bɛ̀ a n yii sã mu li. Ǹ dinin nyin soo ka ǹ daa ǹ gã.

²⁷Ǹ yii tii, ǹ nə́ tatalaa ka min na á yɔ mi á kã, ǹ nə́ sii din tumaa zɛnaa ǹ nə́ fɔ̃.

²⁸Ǹ bɛ́ fuu lɛ gɔ́ɔ̃ nɛ, ǹ nə́ n lɛ dɛ Dɛnaa Lawa ganaa, Dɛnaa Lawa nə́ ǹ si ǹ nɔmaa kɛ la.

²⁹Á piɛ̃ gole lɛ kũ á golee-n ka kiĩni, mu koreen lɛn nə́ waa.

³⁰Bɛn waa kɛ lɛ nyɛnyɛɛ da ǹ ganaa parsiini. Lawa tɔn nə ǹ nyɛnaan bɔ á woo ǹ ne ǹ woo ǹ bǎã nɛ.

³¹Dɛnaa Lawa a kɔn-narɛɛ á gole, ka barka da-n bɛa lɛa. A bɛ́ kaãbaa ǹ siin mɛnɛn zɛnɛɛ minbuiin nɛn manɛ, ka barka da-n bɛa lɛa.

³²Zaman nə n lɛ sɔkɔn ǹ Dɛnaa Lawa guguru kɔ, ǹ na a tɔ bɔ min golen lɛsɔkɔn kɛ bǎã nɛ!

³³Dɛnaa Lawa á boe la a tà bɔyaa, a baa bǎã gere lɛa, mu yalan bɛ́ bǎã mɛn nɛ, á boe la a mu wɛɛ̃ kɔ walan.

³⁴Á boe la a tán sonbore bɔyaa a baa fu ka yìsi bɔ ǹ bǎã nɛ, bǎã lɛ a minin baraabaa taman yii.

³⁵Á boe la dɔn a don mu wɛɛ̃ bǎã bɔyaa, a baa mu gole bǎã lɛa, á boe la a bǎã gere bɔyaa, a baa mu yala bǎã lɛa.

³⁶A n bòonaan kiɛ a nɛ ǹ giã a nɛ, bɛn nə koa ǹ giã ǹ kiwi lɛa.

³⁷Maǹ wuru boe, ǹ too da zumu, ǹ na a nɛ na.

³⁸Lawa n barka diɛ ǹ ganaa, màn nə miɛ̃ ǹ li, ǹ nə́ mɔnɛɛ, Lawa a toɛ màn nə n bɔ ǹ tɔɔn lɛ wa.

³⁹Sɛnɛ, bɛ̀ koe daa á bɔ ǹ ganaa, ǹ nə́ ǹ kũ bɛ̀rɛn lɛa, ǹ nə́ fuu gɔ́ɔ̃ nɛ, màn nə n boe ǹ lɛ, ǹ gisĩ tán.

⁴⁰A din nə barka boe pàãman kɛn nɛ, á toɛ ǹ nə́ n bibiĩ don sa bii, zii ná a banban ǹ tá koe lɛ wa.

⁴¹Sɛnɛ, a n doobaa kanbiɛ yii koe-yɛ ganaa, a na a sumu minin mɔnɛɛ ka tɔɔ kuru gigiã bɛ́ lɔn.

⁴²Bɛ̀ min peperen nə́ bɛ yɛ, manə n nyɛnyɛɛ, sɛnɛ, min baraan kɛn manə n lɛ tiɛ̃ ka kiĩn.

⁴³Bɛ̀ min mɛn tá li a sii dɔ̃, a die a n yiri koa bɛa siin kɛn lɛn tumaa li, a dɔ̃ ma Dɛnaa Lawa a bǐɛ̃ lɛ na a tan yǎa duduu.