Read Samo, Southern Loe 116 Bible Online

Loe 116 - Samo, Southern bible

Loe 116

¹Dɛnaa Lawa sii á kɔɔ̃n ma ganaa, a giala a tá maa gòã-kũ sii.

²Á n too kɔ ma lon, bɛ lɛ n ke, ma á re a nyankoe maa yiikoonaabaa tumaa gɔ́ɔ̃ nɛ.

³Gɛ̀ ná a biɛn pɛnɛ ma nɛ, gɛ̀ a zɔ̀ɔ ma kũ. Ma fuu yɛ, ma là-paparɛɛ yɛ.

⁴Bɛ lɛ-n ma á n lɛ dii Dɛnaa Lawa ganaa, máa ee Dɛnaa Lawa, bǐɛ̃ kɔ n ma kirisibaa!

⁵Dɛnaa Lawa n makara doɛ̃ wole sonbore lɛa. Wɔa Lawa lɛ n makara boe min ganaa.

⁶Dɛnaa Lawa nə n doe yii koe-yɛlen lɛ. Ma bɛ́ má goã nɔmaa nɛ, á ma kirisibaa.

⁷Sisia, ma foo basã kəni, a giala, Dɛnaa Lawa bǐɛ̃ zɛnaa ma nɛ.

⁸Ń ma si gɛ̀ la. Ń ma kanbaa yii mu ganaa. Ń ma kirisibaa mɛnaa ganaa,

⁹ń giɛ ma dɔ á tɔ we n din yɔrɔ-a yiikoonaan kanaa kɛ nɛ.

¹⁰ Maa nɔmaa a la yii-n lɛ gɔ́ɔ̃ nɛ, má goã pii, máa koe na á bɔ ma ganaa, máa min tumaa n soɛ-bɔle lɛa, a laanɛ má goã pii miɛ̃, ma foo goã doa-n Dɛnaa Lawa ganaa.

¹²Dɛnaa Lawa bǐɛ̃ mɛn tumaa zɛnaa masɛ nɛ, man boe la ma saraa ka wàa nɛ?

¹³Ma á die mi ǹ màn koe, ma maa barka da Dɛnaa Lawa nɛ, maa kirisibaa kɛ taman yii.

¹⁴Man lɛ kɔ Dɛnaa Lawa la ka mànan mɛnɛn nɛ, ma á die bɛn koe la a zaman tumaa yɔrɔ-a.

¹⁵Min mɛnɛn bɛ́ Dɛnaa Lawa wɔn lɛa, bɛn gɛ̀ á sii kaka lɛa a gɔn.

¹⁶A bɛ́ miɛ̃, Dɛnaa Lawa, ma bɛ́ ke n din a dí-nyali lɛa, dí nyɛɛ n nɛ ka ma dan wɔ bɛ́ lɔn, n din nə ń gɛ̀ gɔnɔn fore ǹ nə́ ǹ bɔ ma ganaa.

¹⁷Ma á die maa barka da ǹ *wúlu màn koe n la, Dɛnaa Lawa, man die n din nyankoe.

¹⁸Man lɛ kɔ Dɛnaa Lawa la ka mànan mɛnɛn nɛ, ma á die bɛn koe la a zaman tumaa yɔrɔ-a,

¹⁹Dɛnaa Lawa din a Kion kɛa sumu gɔ́ɔ̃ nɛ, Zeruzalɛmu kiwi kɛ bii. Aleluya, ka Dɛnaa Lawa tɔ bɔ!