Read Samo, Southern Loe 118 Bible Online

Loe 118 - Samo, Southern bible

Loe 118

¹ Ka barka da Dɛnaa Lawa nɛ, a giala á siĩni. A kɔn-narɛɛ a nyɛɛ duduu wa.

²Izirayeli tɔrɔn lɛn, ka saa doo: A kɔn-narɛɛ a nyɛɛ duduu wa.

³Lawa a wúlu-bɔlen lɛn, ka dɔn nə saa: A kɔn-narɛɛ a nyɛɛ duduu wa.

⁴Kasɛn mɛnɛn dɔn bɛ́ nyɛ́ɛ biɛ Dɛnaa Lawa nɛ, ka saa: A kɔn-narɛɛ a nyɛɛ duduu wa.

⁵Ma bɛ́ má goã fuu gɔ́ɔ̃ nɛ, má Dɛnaa Lawa nyankɔ. Dɛnaa Lawa nə́ n nyəə ma la, á ma bɔ a nɛ.

⁶ Dɛnaa Lawa á kun ka ma nɛ, ma a nyɛ́ɛ biɛ màn kɔn nɛ wa. Minbuiinin man boe la ǹ wàa zɛnaa ma nɛ?

⁷Dɛnaa Lawa á kun ka masɛ nɛ, a din nə n doe ma lɛ. Ma á die n gɔn daɛ maa zɔ́ɔn kɛn giala la.

⁸N kaa Dɛnaa Lawa yele, bɛ á soɛ foo doa minin ganaa nɛ.

⁹N kaa Dɛnaa Lawa yele, bɛ á soɛ foo doa pàãdɛnan ganaa nɛ.

¹⁰Tɔrɔ kɔsɔn tumaa goã ǹ nə́ ma lɛnpɛnɛ. Ka Dɛnaa Lawa pàã nɛ, má boo ǹ la.

¹¹Ǹ nə́ ma lɛnpɛnɛ bǎã yii ni. Ka Dɛnaa Lawa pàã nɛ, má boo ǹ la.

¹²Ǹ nə́ ma lɛnpɛnɛ ka zoo nɛn manɛ, sɛnɛ, ǹ nə́ papaã ka koɛɛ̃ ka làpaa tɛ nɛ. Ka Dɛnaa Lawa pàã nɛ, má boo ǹ la.

¹³Mà maǹ ma nyɛnɛɛ ka pàã nɛ ma daɛ, sɛnɛ, Dɛnaa Lawa nə́ n dɔ ma lɛ.

¹⁴Dɛnaa Lawa n ma pàã laanka maa zia gii-dali lɛa. A din na á ma kirisibaa.

¹⁵Foo kɔɔ̃nbaa ǹ loen lɛ á boe, gɔ̀lɔ̀baa ǹ loen lɛ á boe Lawa a minin kion: E, Dɛnaa Lawa á boe sii la!

¹⁶Dɛnaa Lawa ná a boo sii la nyaa! Dɛnaa Lawa á boe sii la!

¹⁷Á ke, ma gã wa, ma yii á koo. Ma á Dɛnaa Lawa a nya ǹ dín kɛn laakalɛɛ.

¹⁸Taãn nɛ, Dɛnaa Lawa na á ma doroo ka fuu ni, sɛnɛ, a toa má gã wa.

¹⁹Ka Lawa a kion a kiɛnlɛn bũ, kiɛnlɛn mɛnɛn bɛ́ koa-n min peperen ne, man die we ma barka da Dɛnaa Lawa nɛ.

²⁰Dɛnaa Lawa a Kion lɛ a kiɛnlɛ á ke. Min peperen dininsɔɔ̃nɔn man we.

²¹Man barka diɛ n nɛ, Dɛnaa Lawa, a giala, ń maa nyankɔ si. Man barka diɛ n nɛ, a giala, ń ma kirisibaa.

²² Kion-dɔlen nə n piã ka kɔlɔ mɛn nɛ, a din na á wusoo á kɛ gùrù dɔ ǹ kɔlɔ baa.

²³Dɛnaa Lawa na á bɛa dí kɛ nya, bɛ n kaãbaa ǹ sii lɛa wɔsɛn yii li.

²⁴Kɛ n zɔ́n lɛawaa lɛa Dɛnaa Lawa koa. Ka daa wɔ n nyɛnyɛɛ ka foo kɔɔ̃nbaa nɛ.

²⁵ N dɔ wɔ lɛ, Dɛnaa Lawa, n wɔ kirisibaa! N dɔ wɔ lɛ, Dɛnaa Lawa, n wɔa wɔ bǐɛ̃ kɔ!

²⁶ Min mɛn bɛ́ we kànaa ka Dɛnaa Lawa tɔ nɛ, Lawa die a barka da bɛ ganaa. Wɔ nə n toɛ Dɛnaa Lawa a Kion, wɔ á barka diɛ n nɛ.

²⁷Dɛnaa Lawa dinsɔɔ̃ n Lawa lɛa, a din na á n yɔrɔ bǐɛ̃ da wɔ la. Ka daa wɔ paã wɔ luu buruun gũ wɔ gɔn, wɔ wo yǎa a *wúlu bɔ ǹ bǎã kɛ nɛ.

²⁸N din nə maa Lawa lɛa. Man barka diɛ n din ni. N din nə maa Lawa lɛa. Ma nə n din guguru koe.

²⁹Ka barka da Dɛnaa Lawa nɛ, a giala á siĩni. A kɔn-narɛɛ a nyɛɛ duduu wa.