Read Samo, Southern Loe 18 Bible Online

Loe 18 - Samo, Southern bible

Loe 18

¹Loe-saalin goledɛnaa loe mɛn lɔ. Dɛnaa Lawa a dí-nyali Davida a loe ne. Dɛnaa Lawa bɛ́ á Davida si a zɔ́ɔn la, á ná a kanbaa kii Sayulu ganaa, bɛ lɛ nɛ á loe kɛ lɛ lɔ, á Dɛnaa Lawa tɔ bɔ nɛ.

²Dɛnaa Lawa, ma tá n narɛ, n din nə ma pàã lɛa.

³Dɛnaa Lawa, ma nə n foo doɛ n din ganaa, man kiɛ n yele, ma kirisibaali. N din nə maa Lawa lɛa, ma foo doa ǹ bǎã lɛa, maa duru ǹ bǎã lɛa. N din nə ma tamaɛ, ma pàã n ka n din ni, n din nə ma kirisibiɛ.

⁴Masɛ n Dɛnaa Lawa para pii. Ma bɛ́ má bíi, má gɔ̀lɔ̀baa si maa zɔ́ɔn lɛn la.

⁵Gɛ̀ na á goã á n gɔn lɔɔ ma nɛ, a na á baa mu gole a min kũ lɛa, mà a ma papaã.

⁶Bǎã babaraa kɛ gɔn na á goã ma ganaa, gɛ̀ na á goã á kan koa ma nyɛɛnɛ.

⁷Maa fuu lɛ gɔ́ɔ̃ nɛ, má lɛ dia Dɛnaa Lawa la, má n lɛ dɛ maa Lawa lɛ ganaa. Á n toa a bǎã sonbore kɛ nɛ, á ma lɛ ma. Ma lɛ-dɛ mɛn wɔ, á kaa a too ne.

⁸Bɛa biikoo li, tán bìn da, a giala bɔyaa. Kelen dɔn nə́ bìn da tán. Maǹ nə́ bìn da, a giala Dɛnaa Lawa foo na á yoo.

⁹A nyin kàràn yii n tɛmaa boe, tɛ babaraa n soe a lɛ-n, kun ka tɛ nàn nɛ boe a paǹ yii-a.

¹⁰Dɛnaa Lawa lon toɛ̃, á gisĩ. Á gisĩ ka labara kaara nɛ a gòãn giulun.

¹¹A n giã-n lon màn yiikoonaa la, a n piɛ̃ ka nyàa ka na-a, a n yui ka piɛ̃ bɛ́ lɔn.

¹²A na á goã durii-n wɔlɔ tì li. Á bɛ baa a giã ǹ bǎã lɛa. Á labara tìtìn pɛnɛ a din-a, mu bɛ́ labaran mɛnɛn nɛ.

¹³A bɛ́ tɛ pii die, labaran kɛn man baa sii, la gii kɛ n boe lon kiɛ, a n tɛ pii yɛlɛlɛ yɛlɛlɛ.

¹⁴Dɛnaa Lawa paraa lon papapã, lon a Lawa gole boo da. La gii kɛ n boe lon kiɛ, a n tɛ pii yɛlɛlɛ yɛlɛlɛ.

¹⁵Á kiɛ kaã bɔ, á zɔ́ɔn kɛn pɛsɛ̃, á paparaa, á ǹ sasawaa.

¹⁶Dɛnaa Lawa, n bɛ́ ń gini, n foo bɛ́ na á busu á la yii ni, ń tàn mu piɛ̃, ń kanaa giala da kanaa.

¹⁷Dɛnaa Lawa nə́ n toa lon, á n gɔn dia. Sii mɛn lɛ á ke, mà a n ma bii ka mu gole ne, á ma bɔ á ma bɔ a nɛ.

¹⁸Á ma si maa zɔ́ɔ kakan kɛn la, maa zɔ́ɔn mɛnɛn lɛn pàã á ke á la ma nɛ.

¹⁹Ma pàã tumaa bɛ́ a nya ǹ mɛn pinaa, ǹ nə́ yoo ma gialaa, sɛnɛ, Dɛnaa Lawa daa n dɔ ma lɛ.

²⁰Á ma si á ma da, a na á ma si á ma da, a giala a tá ma narɛ.

²¹Dɛnaa Lawa na á ma kũ maa peperebaa li. A na á ma saraa, á kɔnpɛ maa sii la baã nɛ.

²²A giala, má kɔ Dɛnaa Lawa a zii lɛ, má kɔ lɛ ka bɔlɔgoondɛnaabaa nɛ, man piã ka maa Lawa lɛ-n wa.

²³Má n yiri koa a dí-pɛn lɛn li, man piã ka a dùũ siin kɛn nɛ wa.

²⁴Má n nyɛnaa sii baraa nɛ, a zɛ̀rɛ ba ma ganaa wa.

²⁵Dɛnaa Lawa na á ma saraa, á kɔnpɛ ka maa peperebaa nɛ, a na á ma saraa, á kɔnpɛ ka maa sii la baã nɛ.

²⁶Bɛ̀ min mɛn tá bɔlɔgoondɛnaa lɛa, n dɔ n bɔlɔgoondɛnaabaa sii zɛnɛɛ bɛ nɛ. Bɛ̀ min mɛn a sii á pepere, n dɔ n peperebaa sii zɛnɛɛ bɛ nɛ.

²⁷Bɛ̀ min mɛn nə́ n gɔ́ɔ̃ kaa n nɛ, n dɔ nə n gɔ́ɔ̃ kiɛ bɛa dɛnaa nɛ. Sɛnɛ, bɛ̀ min mɛn nə́ n gɔ́ɔ̃ tii n-a, n dɔ nə ǹ dɛnaa kuĩ a gɔ́ɔ̃ tìbaa li.

²⁸Ǹ bɛ́ koe boe min mɛnɛn ganaa, n din nə bɛn kirisibiɛ. Min mɛnɛn bɛ́ n dinin gole koe, n din nə bɛn gisĩ.

²⁹Taãn nɛ, n din nə toɛ ma yii á koo. Dɛnaa Lawa, maa Lawa, n din nə wɔlɔ fúlu boe ma nɛ.

³⁰Man die woe zia-baalin gialaa ka n din pàã nɛ. Man die boe ǹ la ka maa Lawa pàã nɛ.

³¹Lawa din a zii lɛ n pepere, bɛ̀ Dɛnaa Lawa boo mɛn da, a n goɛ̃ bɛ-a. A n ka goóro bɛ́ lɔn, min mɛn tumaa bɛ́ kiɛ a yele, a n bɛn tamaɛ.

³²A giala, die kɔsɔ n Lawa lɛa kəni, bɛ̀ n din bie wa, Dɛnaa Lawa? Die kɔsɔ n wɔ tamaɛ, bɛ̀ wɔa Lawa kɛ bie wa?

³³A din Lawa lɛ n pàã koe ma la, a din nə ma diɛ zii pepere la.

³⁴ A din nə toɛ ma gòã á siɛ ka yuùnun wɔ bɛ́ lɔn. A din nə ma tamaɛ kele la.

³⁵A din nə ma darɛɛ ziabaa ganaa. A din nə ma darɛɛ sa kaka[13] zuĩ ganaa.

³⁶N din nə́ n kirisibaa kɔ ma la goóro lɛa. N din gɔn na á n dɔ ma lɛ. N din a bǐɛ̃baa kɛ na á màn da ma li.

³⁷N din nə toɛ ma gòã á siɛ fufuu, n din pàã nɛ, ma gòã din ba talɛɛ wa.

³⁸Má maa zɔ́ɔn lɛn loo má dɔ ǹ-a. Bɛ̀ ma ǹ nya wa, ma ba n bɔyɛɛ wa.

³⁹Man die kɛn pɔpɔsɛ, ǹ nə́ ǹ ba boe la ǹ yoo doo wa. Maǹ die kiɛ tán ma gòãn giulun.

⁴⁰N din nə́ n ziabaa ǹ pàã kɔ ma la, ń maa zɔ́ɔn lɛn pusu n nə́ ǹ kɔ ma la.

⁴¹N din nə toɛ maa zɔ́ɔn lɛn tá baa sii ma nyɛɛnɛ. Min mɛnɛn bɛ́ ma biɛ zɔ́ɔ, ma á re bɔ̀n diɛ bɛn-a.

⁴²Ǹ tá re n lɛ dii, min ba re yii a ǹ kirisibaa wa. Ǹ tá re n lɛ dii Dɛnaa Lawa ganaa, a re ǹ lɛ sii wa.

⁴³Má ǹ suu ka gusuũ bɛ́ lɔn piɛ̃ li, má tɔtɔrɔ ǹ la ka bɛrɛɛ bɛ́ lɔn zii gialaa.

⁴⁴Ń ma kanbaa zaman kɛa kɔn lɛ babaã ganaa. Ń ma koa tɔrɔn mìi la, tɔrɔn mɛnɛn dinin bɛ́ ma a ǹ doɛ̃ wa, ń ma koa bɛn mìi la.

⁴⁵Bɛ̀ má dí pɛ ǹ nɛ lɔn, maǹ ma lɛ sii. Tiin man kiɛ tán ma giulun.

⁴⁶Gána kɔsɔ minin nə́ ma lɛ wɔ, tiin nə́ ma bebele ǹ nə́ fɔ̃ ma li. Ǹ dinin nə́ soo ǹ duru ǹ bǎãn nɛ, ǹ gɔ̀nɔn nə́ bìn diɛ.

⁴⁷Dɛnaa Lawa á boe sii la. Ma tamaali ni, ma á barka diɛ nɛ. Lawa n ma kirisibaali lɛa, ma na a din tɔ boe.

⁴⁸Bɛa Lawa lɛ n maa gɛ̀ dòo boe, a din na á ma koa gánan mìi la.

⁴⁹Dɛnaa Lawa, n din nə ma kanbiɛ maa zɔ́ɔn ganaa, n din nə ma biɛ gɔ̀lɔ̀ lɛa maa zɔ́ɔn kɛn mìi la, n din nə ma kanbiɛ min kakaarɛn kɛn ganaa.

⁵⁰ Bɛ lɛ n ke, Dɛnaa Lawa, ma á re n tɔ boe tɔrɔn bii. Ma á re loe loe, ma n tɔ guguru kɔ nɛ.

⁵¹Dɛnaa Lawa din kii mɛn bɔ, a din na á sii dadaran zɛnaa, á gɔ̀lɔ̀baa kɔ la. A din kii mɛn koa, a din na á kɔn-narɛɛ gole nyaa bɛ nɛ, Davida laanka a tɔrɔn manɛ yǎa duduu.