Read Samo, Southern Loe 22 Bible Online

Loe 22 - Samo, Southern bible

Loe 22

¹Loe-saalin goledɛnaa loe mɛn lɔ, n loe ka Baayɛlɛ a Yuùn Loe kɛ bɛ́ lɔn. Davida a loe n ke.

² Maa Lawa, maa Lawa, wàa na á baa n ma daa? Má n lɛ wurəə má fɔ̃, wàa na á baa n ba die ma kirisibiɛ wa?

³Bɛ̀ lɛ̀ waa man lɛ diɛ, n ba ma lɛ sii wa. Bɛ̀ wɔlɔ tii, susui ba ma lon wa. Ee, maa Lawa!

⁴A da yaa, n din lɛ n kii sonbore lɛa, Izirayeli nɛnyaanan bɛ́ kii mɛn guguru koe.

⁵Wɔ digolon man nə́ goã n foo doɛ n din ganaa. Maǹ nə́ goã n foo doɛ n din ganaa, ń goã ǹ kirisibiɛ.

⁶Maǹ nə́ goã n lɛ dii n ganaa, ń goã ǹ boe sii ni. Maǹ nə́ goã n foo doɛ n ganaa, sìi goã ǹ kuĩ wa.

⁷Sɛnɛ, masɛ n goon ka tán nyuun ni, ma bie minbuiin nɛ lɛa doo wa. Minin man sɔ kiɛ ma la, ma tɔrɔn man ma tii.

⁸ Min mɛn tumaa bɛ́ ma yii, bɛn man ma diɛ yaa lɛa. Maǹ yaa we ma ganaa, ǹ tá n mìi bibiĩ.

⁹ Maǹ pii ma ganaa: N bɛ́ n nə n foo doa Dɛnaa Lawa ganaa, a kiɛ̃ a n si kəni. A bɛ́ n narɛ, a kiɛ̃ a n kirisibaa kəni.

¹⁰Taãn nɛ, Dɛnaa Lawa, n din nə́ ń toa má soo ma dan gɔ́ɔ̃ nɛ. N din nə́ ń ma tamaa a kolo-n miɛ̃.

¹¹A saa maa yɛ ganaa, maa sii nə n din gɔn. Ma dan ma yɛ lɔn, n din lɛ n maa Lawa lɛa.

¹²N nyan nə n wɔlɔ lui ma ganaa wa. A giala, biikoo baraa diri. Á ke, dɔmalɛ wole dɔ ba ma lon wa.

¹³Maa zɔ́ɔn nə́ ma da bii ka dii gɔ̀lɔ̀n manɛ. Ǹ nə́ ma lɛnpɛnɛ, ka Basan daã a dii gɔ̀lɔ̀ baraan kɛn manɛ.

¹⁴Maǹ nə́ n lɛ tii ma li. Maǹ ka yàran mɛnɛn bɛ́ siĩ wɔ̃woɛ̃, ǹ nə́ wɔɔsaa we.

¹⁵A n ka ma pàã yii na á mu baa, ma gù kòròn nə́ n bɔ kɔn lɛ. Ma foo yo ma gɔ́ɔ̃ nɛ ka nyɔɔ nɛ.

¹⁶Ma bɔlɔ yala laa ka kɔlɔ nɛ, ma lɛwɔn dama ma lɛ gɔ́ɔ̃ nɛ. N ma koa gɛ̀ li foɛɛ̃nɛ.

¹⁷Ginin nə́ ma da bii, mɛnaa minin la wolen nə́ ma lɛnpɛnɛ, ǹ nə́ ma gɔnɔn laanka ma gòãn yii kaka.

¹⁸Má pɛrɛ ka ma boo la ma n wen tumaa nimi. Min mɛnɛn bɛ́ ma yii, bɛn man giɛ ma ganaa.

¹⁹Maǹ maa dɔnkɛn gii kɔn, ǹ nə́ n piɛ̃ maa mɔnaan ganaa.

²⁰Sɛnɛ, nsɛ nyan giã sɔsɔɔ wa, Dɛnaa Lawa! N din nə ma pàã lɛa, n nanaa n da n dɔ ma lɛ.

²¹Ma kirisibaa gɛ̀ kakaarɛ wɔ ganaa, ma kanbaa kɛa ginin kɛn sɔ ganaa.

²²Ma kirisibaa yàra lɛ ganaa. N ma kirisibaa don a zù bɛn ganaa. Dɛnaa Lawa, n nə́ n nyəə ma la!

²³ Ma á re n boo diɛ ma dɔɔ̃nɔn manɛ. Ma á re n tɔ boe zaman bii.

²⁴Kasɛn mɛnɛn bɛ́ nyɛ́ɛ biɛ Dɛnaa Lawa nɛ, ka a tɔ bɔ! Kasɛn, Zakɔba tɔrɔn tumaa, ka a guguru kɔ! Kasɛn, Izirayeli tɔrɔn tumaa, ka nyɛ́ɛ baa nɛ!

²⁵A giala a n piã, á yii koe-yɛle lɛ toa nɔmaa gɔ́ɔ̃-n wa, a n yɔrɔ bɔyaa á bɔ la wa. Á na á lɛ dia ma.

²⁶Dɛnaa Lawa, n din a bǐɛ̃baa na á toa, ma á n tɔ boe zaman gole kɛ bii. Man lɛ kɔ n la ka wúlu mànan mɛnɛn nɛ, ma á re bɛn koe n la n nyɛ́ɛbaama-n wolen yɔrɔ-a.

²⁷Doobaan tá re màn bii ǹ kã, min mɛnɛn bɛ́ giɛ Dɛnaa Lawa li, bɛn tá re a guguru koe. A die a ka foo nyɛɛ a yii-nyɛɛ kɔ ka la!

²⁸Min mɛnɛn tumaa bɛ́ tán la, ǹ tá re n taasɛ ǹ wusoo ǹ da Dɛnaa Lawa ganaa. Tɔrɔ din tumaa a sumu minin tá re kiɛ tán a yɔrɔ-a.

²⁹A giala Dɛnaa Lawa n kii lɛa. A din nə gánan mìi la.

³⁰Kanaa a min dadaran tumaa á re kiɛ tán a giulun. Min mɛn tumaa bɛ́ re gɛ̀ we, bɛn tá re n musin koɛ tán a yɔrɔ-a. A ba re ǹ yii toɛ koo wa.

³¹Sɛnɛ, ǹ tɔrɔ tá re dí nyɛɛ Dɛnaa nɛ, ǹ tá re Dɛnaa boo diɛ bɛa tɔrɔ lɛ nɛ.

³²Á re die Lawa a peperebaa laakalɛɛ. Lawa a zaman mɛn bɛ́ re yii, á re Lawa a nya ǹ dí pii bɛ nɛ.