Read Samo, Southern Loe 25 Bible Online

Loe 25 - Samo, Southern bible

Loe 25

¹Davida a loe. Dɛnaa Lawa, masɛ yii n doa nɛ n din la.

²Maa Lawa, man kiɛ n din yele. N nyan toa sìi ma kũ wa. N nyan toa maa zɔ́ɔn kɛn nə n nyɛnyɛɛ ma la wa.

³Min mɛn tumaa bɛ́ n foo doɛ n ganaa, sìi ba re bɛ kɔn kuĩ wa. Sɛnɛ, min mɛnɛn bɛ́ n piɛ̃ n nɛ, mìi ná a ba la wa, bɛn wɔ n ka sìi ni[14].

⁴Dɛnaa Lawa, n zii lɛ nyaa ma nɛ, ma dɔ̃. Ma daraa n zii lɛ a kɔmalɛ ganaa.

⁵N din die n ma da n sonbore zii la, n din ma daraa, a giala, n din nə Lawa lɛa ma kirisibiɛ, ma nə n foo doɛ n din ganaa babaraa.

⁶Dɛnaa Lawa, n makara kɛ laanka n kɔn-narɛɛ gole kɛa nyɛɛ wa, n yiri kɔ bɛn lɛn li.

⁷Maa tenbaa waáraa a sã ǹ siin laanka bɔlɔ tii siin kɛn, n baran ma kũ bɛn li wa. Dɛnaa Lawa, ma kũ n din a kɔn-narɛɛ gole kɛ li, n bǐɛ̃ duduu kɛa lɛa.

⁸Dɛnaa Lawa á siĩni, á pepere, bɛ lɛ n ke, á sã wolen diɛ zii la.

⁹A n din-gisiĩ wolen diɛ zii pepere la, a nə ǹ darɛɛ a zii lɛ a tɔ wɔ ganaa.

¹⁰Min mɛnɛn bɛ́ Dɛnaa Lawa a lɛ kɔn la ǹ boon kɛn tamaɛ, ka a gɔn waama-n boon kɛn dɔn nɛ, a n bɛn kuĩ ka kɔn-narɛɛ gole ne, á n biɛ̃ duduu zɛnɛɛ ǹ nɛ.

¹¹Dɛnaa Lawa, maa sã lɛ gole kɔ, á la yii ni. N din tɔ kɛa lɛa, a toa ma nɛ.

¹²Bɛ̀ min mɛn tá nyɛ́ɛ biɛ Dɛnaa Lawa nɛ, Dɛnaa Lawa n zii nyɛɛ bɛ nɛ, a kɔ lɛ.

¹³Á die n susui yii-nyɛɛ gɔ́ɔ̃ nɛ, gána lɛ á re a tɔrɔn wɔ biɛ.

¹⁴Min mɛnɛn bɛ́ nyɛ́ɛ biɛ Dɛnaa Lawa nɛ, a nə n gɔ́ɔ̃ pii bɛn manɛ, a na a lɛ kɔ kɔn la ǹ boo lɛ giala pii bɛn manɛ.

¹⁵Ma yii n doa-n Dɛnaa Lawa la biikoo tumaa li, a giala, a din nə ma gòã boe biɛ nɛ.

¹⁶Dɛnaa Lawa, n yɔrɔ bɔyaa n da ma la, n bǐɛ̃ kɔ ma-a. A giala, min ba ma la wa, maa wɔ n ka bɔ̀n nɛ.

¹⁷Màn nə miɛ maa foo-ziziɛ̃ li, bǐɛ̃ kɔ n ma si maa nɔmaa la.

¹⁸Ga maa fuu laanka maa nɔmaa kɛ ganaa, n maa sii baraan tumaa toa ma nɛ.

¹⁹N din ga maa zɔ́ɔn kɛn mɔnaa ǹ gɔn kɛ-a le. Ǹ bɛ́ kakaarɛ ma ganaa lɔn, ga bɛ ganaa.

²⁰Man má kaa n din yele, n nyan toa sìi ma kũ wa. Ma tamaa, n ma kanbaa ǹ ganaa.

²¹Ma bɛ́ má n foo doa n din ganaa, ma tamaa, sonborebaa laanka peperebaa gɔ́ɔ̃ nɛ.

²²E Lawa! Izirayeli kirisibaa. A bɔ n bɔ a fuu lɛ tumaa nɛ.