Read Samo, Southern Loe 27 Bible Online

Loe 27 - Samo, Southern bible

Loe 27

¹Davida a loe n ke. Dɛnaa Lawa n masɛ a tɛ fúlu laanka ma kirisibaali lɛa, man die nyɛ́ɛ biɛ die nyɛɛnɛ? Dɛnaa Lawa n ma nyin-tamaali lɛa, ma gɔ̀nɔn nə die bìn diɛ die nyɛɛnɛ?

²Bɛ̀ min baraan nə́ yoo ma gialaa, ǹ nə́ zoɛ̃ mà ǹ ma nyin bɔ, maa zɔ́ɔ babaraan kɛn lɛn, ǹ dinin manə n gòã niɛ̃ ǹ mɛnaa.

³Bɛ̀ zia-baalin nə́ daa kɔ ma lɛ, nyɛ́ɛ goon ba ma ganaa wa. Haalɛ ta zia lɛ yoo, foo doa ǹ bǎã tá ma lon.

⁴Man má màn goon nyankɔ Dɛnaa Lawa lon, man giɛ bɛ lɛ li: ma goã Dɛnaa Lawa a kion kɛ nɛ maa yiitákoobaa tumaa gɔ́ɔ̃ nɛ, ma ga Dɛnaa Lawa a siĩnbaa ganaa, ma ga a din foo sii li a kion sonbore kɛ nɛ.

⁵A giala, bɛ̀ koe daa ǹ mɛn pinaa, a din nə ma duri a giã ǹ bǎã nɛ. A din nə n koe ma lɛ a kion kɛa dɔndɔɔn nɛ. A din nə ma koɛ kele lalan, sii kɔn ná a doe ma ganaa wa.

⁶Kanna, má boo maa zɔ́ɔn lɛn la, maa zɔ́ɔn kɛn lɛn ma lɛnpɛnɛ. Ma á boe la ma wúlu mànan kɔ Dɛnaa Lawa la ma foo n kɔɔ̃nɛ. Ma á boe la dɔn ma loe lɔ ma Dɛnaa Lawa tɔ bɔ nɛ.

⁷Dɛnaa Lawa, bɛ̀ ma tá n bíi, bǐɛ̃ kɔ n nə n too kɔ! Makara bɔ ma ganaa, n ma lɛ si!

⁸Dɛnaa Lawa, n boo mɛn da, mà: «Ka ga ma li», man taasiɛ we bɛa boo lɛ ganaa. Dɛnaa Lawa, man giɛ n din li.

⁹N baran n duru ma la wa. N din a dí-nyali n ka masɛ nɛ, n foo baran yoo, n ma loo wa. N din nə maa dɔmalɛ wole lɛa. N baran n bɔ ma li wa, n baran ma toa walan wa. Lawa, n din nə ma kirisibaali lɛa.

¹⁰Haalɛ ta ma di laanka ma dan na á ma daa, nsɛ Dɛnaa Lawa á re ma kuĩ doɛ̃.

¹¹Dɛnaa Lawa, n din nə n zii nyaa ma nɛ. Maa zɔ́ɔn lɛn bɛ́ gɔn diɛ ma ganaa, n din ma da zii sonbore la.

¹²N baran ma baa maa zɔ́ɔn kɛn màn-bii lɛa wa. A giala, siére soɛ-bɔlen nə́ yoo ma gialaa, ǹ nə́ zoɛ̃ mà ǹ ma nyɛɛ ka ǹ kakaarɛbaa nɛ.

¹³Má waa la máa ma á re Dɛnaa Lawa a bǐɛ̃baa yii yiikoonaan kanaa kɛ nɛ.

¹⁴N foo kũ, n nə n yii da Dɛnaa Lawa la. N gù we yii n nə n foo taã. N foo kũ, n nə n yii da Dɛnaa Lawa la.