Read Samo, Southern Loe 34 Bible Online

Loe 34 - Samo, Southern bible

Loe 34

¹ Davida gàãnaabaa ǹ sii mɛn zɛnaa kii Abimelɛki yɔrɔ-a, á n din tìĩ bɔ a nyin ni. Abimelɛki bɛ́ á loo, a bɛ́ woe a na á loe kɛ lɔ.

²Man die barka diɛ Dɛnaa Lawa nɛ biikoo tumaa li, man die a tɔ boe baraabaraa.

³Dɛnaa Lawa a sii n kiɛ ma foo la. Nɔmaa-wɔlen mɛnɛn bɛ́ n too koe ma lon, ka n nyɛnyɛɛ.

⁴Ka n lɛ kaa kun ma nɛ ka Dɛnaa Lawa guguru kɔ, ka daa wɔ a tɔ saa lon kun.

⁵Má lɛ dia Dɛnaa Lawa la, á n nyəə ma la, á ma kirisibaa maa nyɛ́ɛ tumaa ganaa.

⁶Nɔmaa-wɔlen mɛnɛn nə n yɔrɔ dia la, bɛn tá re n nyɛnyɛɛ, sìi ba re ǹ kuĩ wa.

⁷Masɛ n koe-yɛle goon lɛa. Ma bɛ́ má Dɛnaa Lawa bíi, á ma lɛ ma, á ma kirisibaa maa fuu-yɛ tumaa gɔ́ɔ̃ nɛ.

⁸Minin mɛnɛn bɛ́ nyɛ́ɛ biɛ Dɛnaa Lawa nɛ, a lon a dia dí-a wole kɛ n bɛn lɛnpɛnɛ, a tá ǹ kirisibiɛ.

⁹ Ka Dɛnaa Lawa a bǐɛ̃baa kɛ nɛn da, ka ga a ganaa. Min mɛn bɛ́ kiɛ a yele, bɛa dɛnaa wɔ na á bǐɛ̃ kɔ.

¹⁰Dɛnaa Lawa kasɛn mɛnɛn bɔ a din wɔn lɛa, ka nyɛ́ɛ baa nɛ. A giala, min mɛnɛn bɛ́ nyɛ́ɛ biɛ nɛ, màn kɔn ba re nyaabiɛ bɛa dɛnan ganaa wa.

¹¹Yàra tenən dinin laadoo siin tan, bòo tá ǹ kuĩ. Sɛnɛ, min mɛnɛn bɛ́ giɛ Dɛnaa Lawa li, màn kɔn ba re nyaabiɛ bɛn ganaa wa.

¹²Ka da n too kɔ, maa nɛnyaanan lɛn, man die ka darɛɛ Dɛnaa Lawa guguru-kɔ ganaa.

¹³ Bɛ̀ min mɛn tá li a tá kanaa bǐɛ̃ kɔ, a nyin sasa yɛ là nyantoro gɔ́ɔ̃ nɛ,

¹⁴yǎa ǹ dɛnaa nə n lɛ kuĩ boo baraa diɛ ganaa, a n nyɛnɛɛ soɛ nɛ.

¹⁵A n bɔ sii baraa zɛnaa wɔlɔ li, a sii bǐɛ̃ zɛnaa. A ga là nyantoro li, a baa si a kio.

¹⁶Dɛnaa Lawa n giɛ min peperen walan, a too n koo ǹ lɛ-dɛ li.

¹⁷Dɛnaa Lawa n zia diɛ sii baraa-zɛnaalin ganaa, a tá ǹ sii tuturi á boe minbuiinin taasiɛ nɛ tán la.

¹⁸Bɛ̀ min peperen lɛn nə́ n lɛ dɛ, Dɛnaa Lawa n bɛ miɛ, a nə ǹ kirisibiɛ a ǹ bɔ ǹ fuu siin tumaa gɔ́ɔ̃ nɛ.

¹⁹Min mɛnɛn foo bɛ́ ziziɛ̃ nɛ, Dɛnaa Lawa wɔlɔ á kunu bɛn ganaa. Min mɛnɛn bɛ́ n gɔ́ɔ̃ bii, Dɛnaa Lawa n bɛn kirisibiɛ.

²⁰Min pepere a nɔmaa á gigiã, sɛnɛ, Dɛnaa Lawa n boe bɛ tumaa gɔ́ɔ̃ nɛ.

²¹ A n giɛ a wen tumaa walan, a we goon din ba yiɛ wa.

²²Baraabaa n die min baraa dii, dɔlɔ á re min pepere a zɔ́ɔn kuĩ.

²³Dɛnaa Lawa na a dí-nyalin nyin sii. Min mɛnɛn bɛ́ kiɛ a yele, dɔlɔ ba bɛn kɔn yii wa.