Read Samo, Southern Loe 38 Bible Online

Loe 38 - Samo, Southern bible

Loe 38

¹Davida a loe, yiri koa sii li ǹ wɔ nɛ.

²Dɛnaa Lawa, n nyan dɔlɔ bɔ ma-a ka busii-n wa, n nyan ma doroo ka n foo-n wa.

³Á ke, n kiɛn lɛn nə́ kaa ma nɛ, n gɔn ma kũ.

⁴Ma paǹ kɔn din ba kooro doo wa, n foo a yoo lɛ taman yii, ma we kɔn din ba siĩn doo wa, maa sii baraa lɛ taman yii.

⁵A giala, maa sãn lɛn nə́ la ma din ni sisia. Maǹ ka guĩ guguru bɛ́ lɔn, ǹ nə́ guguru kɔ ma-a á la yii ni.

⁶Maa busulɛn dinin nə́ nyiǹ kɔ, ǹ gìĩ n boe, ma din a baãnaabaa taman yii.

⁷Ma gù gã, ma foo yii ziziɛ̃, ma yɔrɔ n kɔsiɛ-n miɛ̃ baraabaraa.

⁸Ma kii yii n paparɛ, ma gɔ̀nɔn tumaa n busi.

⁹Ma pàã nya, ma gù basã, man gini, a giala ma foo n busi.

¹⁰Dɛnaa, ma bɛ́ giɛ màn mɛn li, n din yii bɛ́ a ganaa. Ma bɛ́ màn mɛn a ginii we, a durii ni n ganaa wa.

¹¹Ma foo n biɛ niɛ̃, ma pàã nya, ma yɔrɔ a tɛ pii doo wa.

¹²Maa giaáran laanka maa koakun wolen ne, bɛn ba n mɔrɛ maa busulɛn kɛn-a wa, ma din a minin kɛn, bɛn man giɛ̃ tìãlɛa.

¹³Min mɛnɛn bɛ́ giɛ mà ǹ ma nyin bɔ, bɛn man kan koɛ ma nɛ. Min mɛnɛn bɛ́ giɛ li mà bɔ̀n ma yɛ, bɛn man maa papaã ǹ boo diɛ. Baraabaraa, soɛ kɛ nə ǹ tá kuri kiɛ ma la.

¹⁴Sɛnɛ, masɛ, man ma din biɛ ka too tere-a nɛ, ma a n too koe ǹ lon wa, man ma din biɛ ka lɛ tere-a nɛ, ma a n lɛ diɛ ǹ lɛ wa.

¹⁵Masɛ n ka too tere-a bɛ́ lɔn, ma a boo miɛ wa. Boo ba ma lɛ-n ma á min lɛ sii-n wa.

¹⁶Dɛnaa Lawa, masɛ nə n yii diɛ n din la. Dɛnaa Lawa, maa Lawa, n din nə die boo diɛ.

¹⁷Má goã má pɛ máa bɛ̀ má talaa, n nyan toa ǹ yaa wɔ ma-a wa, n nyan toa ǹ nə n dinin koa ma ganaa wa.

¹⁸Ma á ke die mɛnɛɛ sonbore, maa là-paparɛɛ bɛ́ a nyɛɛ wa.

¹⁹Sonbore, má golee maa sã li. Maa sii baraa lɛ taman yii, ma gɔ́ɔ̃ biimaanɛ.

²⁰Maa zɔ́ɔn kɛn manə ǹ dinin lɛa bii-a, ǹ nə́ kaka. Min mɛnɛn bɛ́ ma biɛ zɔ́ɔ kooro, bɛn nə́ la yii ni.

²¹Min mɛnɛn bɛ́ maa bǐɛ̃ sarɛɛ ka baraa nɛ bɛn man ma zɛ̀rɛ biɛ, a giala, man bǐɛ̃ kio.

²²Dɛnaa Lawa, n nyan ma tii wa, maa Lawa, n nyan nə n wɔlɔ lui ma-a wa.

²³Dɛnaa Lawa, n nanaa n da n dɔ ma lɛ, n din nə ma kirisibaali lɛa.