Read Samo, Southern Loe 40 Bible Online

Loe 40 - Samo, Southern bible

Loe 40

¹Loe-saalin goledɛnaa loe mɛn lɔ. Davida a loe n ke.

²Má n yii da Dɛnaa Lawa la, má n yii da la. Á n too kɔ ma lon, á maa lɛ-dɛ ma.

³Á ma bɔ nyankɔrɔ baraa kɛ nɛ, á ma bɔ bɛrɛɛ nyankɔrɔ zuzulu kɛ nɛ. Á ma saa á ma da lon, á ma gòãn kaa gɛ̀fu la, á ma foo doa.

⁴Á loe tii wɔ ma lɛ-n, wɔa Lawa lɛ tɔ bɔ ǹ loe lɛa. Min gigiã á re yii, ǹ tá re nyɛ́ɛ biɛ, ǹ tá re n foo doɛ Dɛnaa Lawa ganaa.

⁵Min mɛn bɛ́ á n foo doa Dɛnaa Lawa ganaa, Lawa á re barka diɛ bɛa dɛnaa ganaa. A koa kun ka din gole-kɔlen ne wa, a n saa ǹ soɛ boon li wa.

⁶Dɛnaa Lawa, maa Lawa, n siin mɛnɛn yɔrɔ bɔ wɔa lɛa, ń kaãbaa ǹ siin zɛnaa, ǹ tá dadara. N miã din banban. Man li ma bɛ lɛ pɛ, ma timəə la, sɛnɛ, ǹ bɛ́ ǹ nə́ mɔnaa ǹ nə́ la yii ni.

⁷ N lɛ kɔ *wúlu màn laanka gɔ ǹ màn ganaa wa. Ń bɛ pɛ, á kaa ma too yala-n. N lɛ kɔ wúlu màn tiɛ̃ laanka sii baraa sawaa ǹ wúlu màn ganaa wa.

⁸Bɛ lɛ nɛ má tɔ́n pɛ, máa màn mɛn nə n kiɛ̃ sɛ́wɔ-munii kɛ nɛ maa wɔ paǹ li,

⁹man die die, man foo sii zɛnaa a kɔnpɛ ka bɛ nɛ. Maa Lawa, ma tá li ma n dí-pɛ kɛ tamaa ma foo ne.

¹⁰Zaman gole kɛ bii, má n peperebaa laakalaa. Dɛnaa Lawa, man lɛ kɔ kɔn lɛ wa. N din tá bɛ doɛ̃.

¹¹Ma n peperebaa kɛ duru ma gɔ́ɔ̃-n wa. N bɔlɔgoondɛnaabaa ke, ka n kirisibaa mɛn dɔ kɔ ma la, má bɛ pɛ. Ma n bǐɛ̃baa laanka n sonbore kɛ duru zaman gole lɛ la wa.

¹²Dɛnaa Lawa, nsɛ baran n makara-doɛ̃ kɛ wɔlɔ lui ma ganaa wa. N bǐɛ̃baa kɛ laanka n sonbore lɛ á re ma tamaɛ biikoo tumaa li.

¹³Koe siin mɛnɛn bɛ́ lɛ doa ná a ba ǹ la wa, bɛn man nə́ baa re ma mui ka mu bɛ́ lɔn. Maa sã ǹ siin lɛn nə́ kaa ma la, ma yii a soo ǹ bǎã ganaa wa. N nə́ mɔnaa ǹ nə́ la ma mìi ka nɛ, a si ma ganaa ǹ foo din ba ma lon doo wa.

¹⁴Dɛnaa Lawa, bǐɛ̃ kɔ n ma kirisibaa! Dɛnaa Lawa, da n dɔ ma lɛ fufuu!

¹⁵Min mɛnɛn bɛ́ zoɛ̃ mà ǹ ma nyin bɔ, sìi gole die a bɛn kũ kun! Min mɛnɛn bɛ́ giɛ maa bɔ̀n li, bɛn yii die a puusə kɔ, ǹ wusoo ka ǹ kio ne!

¹⁶Min mɛnɛn bɛ́ yaa we ma ganaa, sìi die a bɛn dɛ!

¹⁷Min mɛn tumaa bɛ́ giɛ n li, bɛn die ǹ nyɛnyɛɛ gole wɔ n din a lɛa. Min mɛnɛn bɛ́ n narɛ ǹ kirisibaa taman yii, bɛn die ǹ pɛ biikoo tumaa li, mà Dɛnaa Lawa á gole.

¹⁸Masɛ n doobaa lɛa, man yii koe-yɛle lɛa. Sɛnɛ, Dɛnaa tá n yiri koɛ ma li. N din nə maa dɔmalɛ wole lɛa, n din nə ma kirisibaali lɛa. Maa Lawa, n baran nyɔɔbaa kio wa.