Read Samo, Southern Loe 45 Bible Online

Loe 45 - Samo, Southern bible

Loe 45

¹ Koore a minin loe. A n boe loe-saalin goledɛnaa a sɛ́wɔ nɛ. A nə n loe tùtu wuu li. Kɔn narɛ ǹ loe ne.

²Boo sonbore ma gɔ́ɔ̃ pã, man die loe loe ma kii tɔ bɔ nɛ. Toa ma lɛwɔn lɛ bɔ li, ka sɛ́wɔ-kiɛ̃li sonbore a sɛ́wɔ kiɛ̃ ǹ màn bɛ́ lɔn.

³N tá siĩni, ń la minbuiin nɛ tumaa nɛ, boo bǐɛ̃ n boe n lɛ-n. Á ke, Lawa barka da n ganaa yǎa duduu.

⁴Giĩ a nɛ, n gɔya sa saa n lɔɔ n ganaa, n siĩnbaa ǹ màn nɛ, n nyaǹ màn nɛ.

⁵N sa dii, n kiɛ da la. Zia baa sonbore a lɛa, foo-basiɛ̃ a lɛa, peperebaa a lɛa. Wo ka pàã nɛ, n gɔ̀lɔ̀baa yɛ.

⁶N kiɛ lɛ pɛpɛnɛn kɛn, bɛn tá re n zɔ́ɔn kɛn foɛ̃ ǹ koron ganaa. Tɔrɔ kɔsɔ minin kɛn lɛn tá re kiɛ tán-a n giulun, kii.

⁷ N kiibaa lɛ n Lawa wɔ kɛ miã lɛa yǎa duduu. N din nə n minin lɛn nyɛɛnaan boe ka peperebaa nɛ.

⁸Peperebaa n kɔɔ̃nɛ n ganaa, n ba sii baraa li wa. Bɛ lɛ na á toa, Lawa lɛ, n Lawa lɛa, bɛ nə́ n soɛ kɔ n miãn tumaa nɛ. Á zɔ́n nyɔɔ kaa n mìi ni, á n bɔ á n koa kii lɛa.

⁹N mɔnaa tumaa n *miíri nyɔɔ gìĩ kɔɔ̃n-a lɛa. N kiibaa ǹ kion ke, ǹ ná a nyaǹ kɔ ka don a díi sɔ nɛ, bɛ̀ dɛ ǹ mànan wuu n boe walan, n foo kɔɔ̃n koe.

¹⁰Kiin nɛlɔn man bii-a ka n nyaǹ mànan nɛ, kii lɔ kɛ yoo á golee n gusin, ka sana sonbore dɔnkɛ ná a ganaa.

¹¹N too kɔ, maa nɛniɛ! Ga, n nə n too kɔ doɛ̃: N yiri bɔ n bɔ n minin kio, n yiri bɔ n bɔ n dikion kio.

¹²N siĩnbaa kɛ die a kɔɔ̃n kɔ kii ganaa. A din nə n dɛnaa lɛa. Kaa tán a giulun n na a guguru kɔ.

¹³Bɛa biikoo li, Tiiri minin kɛn, pàãma lɛa ǹ nə́ la min tumaa nɛ, bɛn tá re gɔn màn boe ǹ da kɔ n la, mà ǹsɛn man nə n mɛ boe n ne.

¹⁴Siĩnbaa kii a lɔ kɛ gɔ̀nɔn bɔ kii a kion, a mɔnaa lɛ n sana lɛa, tɛ pii yoloyolo.

¹⁵Mɔnaa wɔrɛɛ na a ganaa, ǹ nə́ kuĩ die ne n li, kii, ǹ miãnɛnɛn mɛnɛn dɔn bɛ́ a kio, ǹ nə́ ke die ka bɛn dɔn nɛ n li, kii,

¹⁶maǹ we ǹ ne ka nyɛnyɛɛ nɛ, ka foo kɔɔ̃nbaa nɛ, maǹ we kii a kion.

¹⁷N nɛnyaanan tá re giɛ̃ n digolon kii dankan la, ǹ kɔn pinaa. N tá re ǹ koɛ kii lɛa, gána lɛ paǹ tumaa nɛ.

¹⁸Masɛ á re minin yiri diɛ n tɔ kɛ nɛ, biikoo woo biikoo, tɔrɔn tumaa á re n tɔ boe baraabaraa, yǎa duduu.