Read Samo, Southern Loe 49 Bible Online

Loe 49 - Samo, Southern bible

Loe 49

¹ Loe-saalin goledɛnaa loe mɛn lɔ. Koore a minin loe.

²Minbuiinin lɛn, ka tumaa nə n too kɔ kɛ li. Kanaa minin lɛn, ka tumaa nə n too kɔ doɛ̃.

³Min bɔboɛɛnɛn nɛ ka a dadaran nɛ, pàãman laanka doobaan nɛ, ka tumaa nə n too kɔ.

⁴Ma lɛ n yiridɛnaabaa ǹ boo diɛ, ma yiri n sii-doɛ̃ taasɛ.

⁵Ma nə n too koe suusu boon ganaa taãn-taãnɛ. Ma tùtu da loe li, ma boo giməə giala pɛ.

⁶Lɛawaa baraa li, bɛ̀ maa zɔ́ɔn kɛn nə́ ma lɛnpɛnɛ ka ǹ zɔ́ɔbaa ǹ siin ni, wàa mɛn nyɛ́ɛ-n ma á biɛ?

⁷Min mɛnɛn bɛ́ n foo doɛ ǹ gɔn màn ganaa, min mɛnɛn bɛ́ n dinin koɛ ǹ pàãmabaa ǹ màn gigiã a lɛa, bɛ n wàa mɛn nyɛ́ɛ diɛ ma ganaa?

⁸A giala, min ba boe la a n din nyin si wa. Taãn nɛ, a ba boe la a n din nyin giɔ̀mɔ saraa Lawa la wa.

⁹Min nyin giɔ̀mɔ á kaka, min ba boe la a saraa a nya duduu wa.

¹⁰Min tá boe la a goã a yii n koo yǎa duduu? Min tá boe la a goã a ná a giɛ̃ wa?

¹¹Á ke, yiridɛnan dinin nə́ giɛ̃, ǹ nə́ bɔ̀n biɛ kun ka gàãnaan laanka baãnaan nɛ, ǹ nə́ ǹ gɔn mànan toɛ walan min kɔsɔn nɛ.

¹²A laanɛ ǹ nə́ ǹ dinin tɔn kɔ ǹ tánan ganaa, ka maǹ die goɛ̃ kanaa, ǹ bĩ ǹ yala nə ǹ giã ǹ kion lɛa yǎa duduu, bɛ lɛ nə n giã ǹ bǎã lɛa biikoo tumaa li.

¹³Minbuiin nɛ laanka a tɔ golebaa yii ni, a beleboe wa. A n ka tɔɔ bɛ́ lɔn, boɛɛn bɛ̀ a lɛ kuru.

¹⁴Min mɛnɛn bɛ́ n foo doɛ ǹ dinin ganaa ka kaka, boo-diɛ n kɔɔ̃nɛ ǹ ganaa ka wàa baa, bɛn sii bɛ́ re n biɛ lɔn biɛ̃, á ke. *Doa

¹⁵Maǹ nə́ ǹ lui ka tɔɔn bɛ́ lɔn, ǹ nə́ woe ǹ ne geren piɛ. Gɛ̀ nə ǹ lɛduə̃li lɛa. A lɛawaa, min peperen man tɔ we ǹ yalan la ǹ kiɛ̃. Ǹ siĩnbaa tumaa n ziziɛ̃ geren piɛ, ǹ wɔlɔ n lui ni ǹ kion dadaran kɛn ganaa.

¹⁶Sɛnɛ, Lawa á re masɛ nyin sii. Taãn nɛ, á re ma kanbiɛ gɛ̀ ganaa. Doa

¹⁷Bɛ̀ min tá pàãma biɛ, bɛ̀ a kion giala tá n boe li, bɛ baran nyɛ́ɛ da n ganaa wa.

¹⁸A giala, bɛ̀ á gã, a woe ka màn kɔn nɛ wa, a pàãmabaa ǹ màn kɛ ba woe kun ni wa.

¹⁹A yii bɛ́ koo, a nə n nyɛnyɛɛ, minin man a laakalɛɛ, a giala, asɛ a sii tumaa n bǐɛ̃ koe.

²⁰A laanka bɛ yii ni, a n woe ǹ digolon li, bɛn mɛnɛn bɛ́ ǹ ba re wɔlɔ fúlu yii ka ǹ yii-n doo wa.

²¹Minbuiin nɛ laanka a tɔ golebaa yii ni, bɛ̀ a ba sii doɛ̃ wa, a n ka tɔɔ bɛ́ lɔn, boɛɛn bɛ̀ a lɛ kuru.