Read Samo, Southern Loe 5 Bible Online

Loe 5 - Samo, Southern bible

Loe 5

¹Loe-saalin goledɛnaa loe mɛn lɔ pìi wuu li. Davida a loe.

²Dɛnaa Lawa, n too kɔ ma lon. N maa giniin kɛn ma.

³Aa maa Kii, aa maa Lawa, ma nə n lɛ dii n din bíi we, n too kɔ ma lon doɛ̃. Ma nə n din nyankoe, ma nə n lɛ dii n din bíi we.

⁴Dɛnaa Lawa, bɛ̀ lɛ̀ waa lɔn, n bɛ́ ma lɛ miɛ̃, man maa sii tumaa pii n din ni baayɛlɛ, bɛ̀ man yii da[4].

⁵Sii baraa bɛ́ kɔɔ̃n Lawa mɛn-a, nsɛ bie wa, min baraa a boe la a giã n li wa.

⁶Din-koa wole a giɛ̃ n yɔrɔ-a wa, baraa-zɛnaali kɛ tumaa, bɛn tìĩ bɔ n nɛ.

⁷Soɛ-bɔlen kɛn, n din nə bɛn nyin nyɛɛ. Min mɛn bɛ́ sii-durii zɛnɛɛ, á n gɛ̀ dii, bɛ sii goon ba Dɛnaa Lawa-a wa.

⁸Sɛnɛ, n bǐɛ̃ gole kɛa lɛa, Dɛnaa Lawa, masɛ á re we n kion kɛ nɛ, ma á re kiɛ tán n kion sonbore kɛ nɛ, ma n guguru kɔ, bɛ̀ má n nyɛ́ɛ biɛ n nɛ.

⁹Dɛnaa Lawa, n din ma nyɛɛnaan bɔ ka n peperebaa kɛ nɛ. Maa zɔ́ɔn lɛn bɛ́ ke kuu koe ma ganaa, n din nə n zii kɛ lɛ wɔraa ma nyɛɛnɛ.

¹⁰ Sonbore goon ba soe ǹ lɛ-n wa, ǹ ba taasiɛ kɔsɔ we wa, yǎa basaã, ǹ gɔ́ɔ̃ kɛ n ka gere yala bɛ́ lɔn, ǹ lɛwɔn ba boo goon diɛ wa.

¹¹Lawa, ǹ zɛ̀rɛ lɛ a dɔlɔ bɔ ǹ ganaa! Ǹ sii mɛn yɔrɔ bɔ ǹ nə́ koa, toa bɛ kũ ǹ dinin mìi ni. Ǹ sii baraan lɛn tumaa taman yii, ǹ loo n nə ǹ bɔ n yɔrɔ-a. A giala, ǹ nə́ n piã n nɛ.

¹²Sɛnɛ, min mɛn tumaa bɛ́ kiɛ n yele, bɛn foo á re kɔɔ̃n koe. Ǹ tá re n nyɛnyɛɛ biikoo tumaa li. N din tá re ǹ tamaɛ. N tɔ kɛ bɛ́ kɔɔ̃n min mɛnɛn ganaa, n tá re nyɛnyɛɛ koe bɛn la.

¹³Dɛnaa Lawa, n din nə barka diɛ min pepere ganaa. N din a bǐɛ̃baa kɛ n tamaɛ ka goóro bɛ́ lɔn.