Read Samo, Southern Loe 50 Bible Online

Loe 50 - Samo, Southern bible

Loe 50

¹ Asaafu[25] a loe. Dɛnaa Lawa Pàãyiidɛnaa boo da. Á kanaa minin tumaa bíi wɔ, a saa lɛ̀ nyɛɛnɛ, yǎa lɛ̀giala-n.

²Zeruzalɛmu, siĩnbaa lɛ piɛ̃ n walan, a giala, Lawa wɔlɔ fúlu kaa walan.

³Wɔa Lawa lɛ á die, a re n lɛ tiɛ̃ wa. Tɛ n wɔlɔ kuĩ a nyɛɛnɛ, piɛ̃ gole n boe a lɛnpɛnɛ.

⁴A bɛ́ re kiri we a minin lɛn ganaa, á lon mànan bíi wɔ, á tán mànan bíi wɔ,

⁵á pɛ: Ka maa min sonboren lɛn sɔkɔn, min mɛnɛn lɛn nə lɛ kɔ kɔn la wɔ ka masɛ nɛ, ka *wúlu màn nɛ.

⁶Lon mànan tá a peperebaa kɛ kalɛɛ, kiri-kuruli n ka Lawa nɛ. *Doa

⁷Maa minin lɛn, ka n too kɔ, man die boo diɛ. Izirayeli minin lɛn, man die n gɔn wɛɛ ka nɛ: Ma din Lawa lɛ n kaa Lawa lɛa.

⁸N wúlu mànan kɛn lɛa bie ma tá n zɛ̀rɛ biɛ wa. N tá wúlu mànan tiɛ̃ ma yɔrɔ-a baraabaraa.

⁹Sɛnɛ, ma a re dii gɔ̀lɔ̀ boe n zìã-n wa, ma a re butumu kuĩ n kion wa.

¹⁰A giala, daã gòã li ǹ don màn kɛ tumaa n ma din wɔ lɛa, tɔɔ màn zaã kɛ tumaa kelen lalan, ma din wɔ nɛ.

¹¹Ma á kele lalan bàanan kɛn tumaa doɛ̃, don siĩn kɛ tumaa n ma din wɔ lɛa.

¹²Ta bòo n ma ganaa, ma a pii n ni wa, a giala, kanaa laanka a gɔ́ɔ̃gɔ́ɔ̃ ǹ màn tumaa n masɛ wɔ lɛa.

¹³Dii gɔ̀lɔ̀n kɛn siĩ n ma á soɛ̃ ya? Ma á butumu mà mii?

¹⁴Barka da Lawa nɛ ǹ wúlu màn lɛa, n nə n lɛ kɔ lon a Lawa la ka màn mɛn nɛ, bɛ zɛnaa.

¹⁵Bɛ̀ fuu dɔ n ganaa ǹ mɛn pinaa, ma bíi wɔ, ma á re n kirisibiɛ, n tá re ma guguru koe.

¹⁶Sɛnɛ, Lawa n pii min baraa nɛ: Maa dí-pɛn kɛn pɛ là n ka wàa nɛ n ganaa? Maa lɛ kɔ kɔn la ǹ boo kɛ nə n lɛ-n kooro.

¹⁷N bɛ́ ń maa doroo tii, ń nə́ n piã ka maa boo ne.

¹⁸Bɛ̀ ń wurumu yɛ lɔn, n nə koe bɛ lɛ, n naarɛ-baalin yii, n nə n kun ka bɛn nɛ.

¹⁹Boo bǐɛ̃ ba boe n lɛ-n wa, yǎa a baraa. Boo sonbore ba boe n lɛwɔn la wa, yǎa soɛ.

²⁰Ma n giɛ̃ tán, n tá n dɔɔ̃n tɔ pii minin ni, n nə n din dannɛ tɔ ziziɛ̃ minin li.

²¹N màn mɛn zɛnaa, a din lɛ n ke. Ma á boe la man lɛ tã kɛ lɛ-a sonbore? Ma n taasɛ mà n miãn ka masɛ nɛ? N sii mɛn la, man die n zɛ̀rɛ biɛ, ma a tumaa pɛ ma kaa tán n giulun.

²²Kasɛn mɛnɛn yiri bɛ́ boe ka Lawa nɛ, ka toa ka bɛ giala ma. Bɛ bie wa, man die ka kuĩ, ma ka wɔwoɛ̃ kɔn, min dɔ ná a die yii a ka si wa.

²³Min mɛn bɛ́ barka diɛ ma nɛ, bɛa dɛnaa n ma guguru koe. Min mɛn bɛ́ tɔ pepere we, ma á die nyɛɛ nɛ, máa masɛ Lawa na a kirisibaali lɛa.