Read Samo, Southern Loe 56 Bible Online

Loe 56 - Samo, Southern bible

Loe 56

¹ Loe-saalin goledɛnaa loe mɛn lɔ. A nə n siɛ ka wuruun bɛ́ loe loe lɔn, da dadaran la gána sɔsɔɔ nɛ. Davida a loe goon ne. Filisiti minin bɛ́ ǹ nə́ kũ Gaati kiwi, a n boo diɛ bɛ wɔ gɔn la.

²Makara bɔ ma ganaa, Lawa! A giala, min nə ma gialaa. Baraabaraa a n zia diɛ ma ganaa, á ma nɔmiɛ̃.

³Baraabaraa maa zɔ́ɔn man ma gialaa. Lawa Gole, ǹ tá mɔnaa nɛ, ǹ nə́ zia biɛ ma ganaa[29].

⁴Bɛ̀ nyɛ́ɛ tá ma ganaa ǹ mɛn pinaa, ma nə n foo doɛ n din ganaa.

⁵Man Lawa tɔ boe a lɛ-kɔ kɛa lɛa. Masɛ nə n foo doɛ Lawa ganaa, nyɛ́ɛ ba ma-a wa. Minbuiin nɛ kooro kɛ n die wàa zɛnɛɛ ma nɛ?

⁶Baraabaraa maǹ maa boon kɔkɔrɛ. Ǹ taasiɛ n ka kɛ dinsɔɔ̃ nɛ, ǹ sii baraa zɛnaa ma nɛ.

⁷Maǹ giɛ̃ dɔndɔɔnɔn nɛ, ǹ nə́ kuu koe ma ganaa. Maǹ gɔn diɛ ma ganaa, màn mɛn bɛ́ toɛ, ǹ ma nyin bɔ.

⁸Bɛa sii kɔkɔrɔ kɛ lɛ tumaa kio, maǹ die wusii ǹ la? Lawa, n foo-busii gɔ́ɔ̃ nɛ, minin kɛn dɛ.

⁹Nsɛ á doɛ̃ mà ma gɔ́ɔ̃ wɔ̃. N din ma yii mu si, ń kaa n màn nɛ. Táa n bɛn da sii li.

¹⁰Bɛ̀ má n nyankɔ ǹ mɛn pinaa, máa n nə n dɔ ma lɛ, maa zɔ́ɔn tá re wusii ǹ kio ne. Ma á doɛ̃, Lawa, nsɛ á kun ma nɛ.

¹¹Man Lawa tɔ boe a lɛ-kɔn kɛn lɛa. Sonbore, man Dɛnaa Lawa tɔ boe bɛa boon kɛn lɛa.

¹²Masɛ nə n foo doɛ Lawa ganaa, nyɛ́ɛ ba ma-a wa. Minbuiinin man die wàa zɛnɛɛ ma nɛ?

¹³Lawa, man lɛ kɔ n la ka màn mɛn nɛ, ma doamaa nɛ ma bɛ zɛnaa. Bɛ̀ ma á bɛ zɛnɛɛ, ma á re bǐɛ̃ dɔ̃ ǹ wúlu mànan boe, ma ǹ kɔ n la.

¹⁴Sonbore, ń ma si gɛ̀ la, ń ma kanbaa mɛnaa ganaa. Bɛ lɛ nɛ, ma á tɔn tɔ we Lawa yɔrɔ-a, yiikoonaabaa ǹ wɔlɔ fúlu kɛ li.