Read Samo, Southern Loe 66 Bible Online

Loe 66 - Samo, Southern bible

Loe 66

¹Loe-saalin goledɛnaa loe mɛn lɔ. Loe ne. Kanaa min din tumaa nə n lɛ dɛ. Ka n lɛ dɛ Lawa ganaa ka foo kɔɔ̃n nɛ.

²Ka loe lɔ ka Lawa tɔ guguru kɛ bɔ nɛ, ka a guguru kɔ ka kaa loen ne.

³Ka pɛ Lawa nɛ: N nya ǹ dín lɛn man kaãbaa diɛ parsiini. N pàã gole kɛ yɔrɔ-a, n zɔ́ɔn man wusii, ǹ nə n gùrù naa n nɛ.

⁴Kanaa minin tumaa die ǹ kaa tán n giulun, ǹ nə n tɔ bɔ ka ǹ loen ne, ǹ nə nsɛ Dɛnaa Lawa lɛ tɔ bɔ. *Doa

⁵Ka da ga Lawa a nya ǹ dí ganaa, a dí lɛ á kaãbaa diɛ minbuiinin ganaa parsiini.

⁶ Á tàn mu bii kuru kɔn, minin nə́ kiɛ̃ ǹ geremaa gɔ́ɔ̃ nɛ ka ǹ gòã nɛ. Ka daa wɔ n nyɛnyɛɛ bɛa sii gole kɛa lɛa.

⁷A din nə kiibaa la ka pàã gole ne yǎa duduu. A n giɛ tɔrɔ kɔsɔn kɛn gɔn li, ń giɛ, a bɔlɔ-tiilin kɛn baran n dinin gole kɔ wa. Doa

⁸Tɔrɔn lɛn, ka barka da wɔa Lawa nɛ, ka n lɛn bɔ taãnɛ ka a tɔ bɔ.

⁹A din na á wɔsɛn toa yiikoonaabaa gɔ́ɔ̃ nɛ, á wɔ kanbaa talaa ganaa.

¹⁰Lawa, n nə́ n da wɔ gɔ́ɔ̃ li, n *gɔ̀ bɔ wɔ ganaa, ka ǹ bɛ́ wɔrɔ yoe ǹ gɔ̀ bɔ a ganaa lɔn.

¹¹N din nə ń wɔ kaa kan nɛ, ń nɔmaa gole da wɔ mìi ni.

¹²Ń toa minin nə́ tɔrɔ wɔ la ka sùi ni. Á pàã baa wɔ ganaa, wɔ́ tɛ laanka mu bii kuru. Sɛnɛ, ń wɔ bɔ bɛ tumaa nɛ, ń piɛ̃ kaa wɔ ganaa.

¹³Masɛ n we n kion kɛ nɛ, ma wúlu mànan tã, man lɛ kɔ ka siin mɛnɛn nɛ, ma bɛn zɛnaa ma ǹ lɛ pã.

¹⁴Ma goã man lɛ kɔ ka siin mɛnɛn nɛ, bɛ̀ ma bɛ́ nɔmaa gɔ́ɔ̃ nɛ, man die bɛn zɛnɛɛ.

¹⁵Man tɔɔ nyɔɔnaan koe n la ka sère gɔ̀lɔ̀n nɛ, man dii gɔ̀lɔ̀n dii n ni ka butumun ni. Tɛ á re ǹ kuĩ *wúlu bɔ ǹ bǎã kɛ nɛ, ǹ tɛmaa dii lon yǎa n li. Doa

¹⁶Kasɛn mɛnɛn tumaa bɛ́ Lawa bɔlɔ-silin lɛa, ka da n too kɔ. A màn mɛn zɛnaa masɛ nɛ, ma á re bɛ laakalɛɛ ka nɛ.

¹⁷Man má a nyankɔ, máa a n dɔ ma lɛ. Má loe lɔ, má a tɔ bɔ nɛ.

¹⁸Bɛ̀ taasiɛ baraan man nə́ goã ma nɛ, bɛ̀ Dɛnaa Lawa a re n too koe ma lon wa.

¹⁹Sɛnɛ, á ke Lawa nə́ n too kɔ ma lon, a n too kɔ maa nyankɔ li.

²⁰Barka á Lawa-a. A n piã ka maa nyankɔ-n wa, a ma nu ka a bǐɛ̃ duduu kɛ-n wa.