Read Samo, Southern Loe 69 Bible Online

Loe 69 - Samo, Southern bible

Loe 69

¹Loe-saalin goledɛnaa loe mɛn lɔ, ǹ nə́ tùtu da li. Davida a loe goon ne.

²Lawa, ma kirisibaa. Mu na á dii yǎa ma bɔlɔ ganaa.

³Ma na a gialaa we bɛrɛɛ zuzulu kɔn li, gòãn doa ǹ wɔlɔ ba ma la wa. Má papaã mu zuzulu li, a n ma siɛ woe ma nɛ.

⁴Má n lɛ dɛ má nɔmaa, ma lɛn nə́ tã, má n yii da maa Lawa la, ma yii wɔ̃.

⁵ Min mɛnɛn bɛ́ ma biɛ zɔ́ɔ, mìi ná a ba la wa, bɛn nə́ mɔnaa, ǹ nə́ la ma din mìi ka nɛ. Min mɛnɛn bɛ́ giɛ ma li kooro kooro, bɛa basaã-kɔle kɛn lɛn pàã á gole. Ma bɛ́ ma màn mɛn koã wa, mà yǎa ma bɛ sarɛɛ.

⁶Lawa, n din tá maa baãnaabaa doɛ̃. Maa sãn dɔn ba durii ni n ganaa wa.

⁷Dɛnaa Lawa Pàãyiidɛnaa, min mɛnɛn foo bɛ́ doa nɛ n ganaa, n baran toa ma sìi da ǹ màn baa bɛn ganaa wa. Ma baran puusə kɔ wɔ n gamali wolen ganaa wa. Izirayeli a Lawa! Man bɛ nyankoe n la.

⁸N din a lɛa nɛ, ma á sɔ-kɔ sii ma ganaa, n din a lɛa nɛ, ǹ tá ma puusə koe.

⁹N din a lɛa nɛ dɔn, ma á tii lɛa ma dɔɔ̃nɔn gɔn, ma á min kɔsɔ lɛa ma din dannɛn gɔn.

¹⁰ Sonbore, ma bɛ́ n kion lɛ narɛ ka yɔrɔ mɛn nɛ, bɛ n ma kuĩ ka tɛ bɛ́ lɔn. Maǹ sɔ koe n ganaa, ǹ sɔ-kɔn kɛn lɛn man doe masɛ ganaa.

¹¹Má wuu pɛ, má n lɛ sɔɔ, bɛ lɛ dɔ a lɛa, ǹ nə́ sɔ kaa ma la.

¹²Má maa foo-ziziɛ̃ nyaa, ka ń pɛ, mà man gɛ̀ koɛ, bɛ lɛ dɔ a lɛa, ǹ nə́ ma tɔ da wɔlɔ la.

¹³Minin sùnbaa ǹ bǎã nɛ, ma din tɔ nə ǹ lɛ-n, yɔ-milin man loe loe ma ganaa.

¹⁴Dɛnaa Lawa, masɛ a nyankɔ n ka kɛ nɛ. N yɔrɔ sonbore da ma la biikoo lɛ n ke. Lawa, n bǐɛ̃baa á gole, ma á doɛ̃ máa n tá re ma kirisibiɛ, màn kɔn ná a ba a sàabiɛ wa, bɛ lɛ tɔ ganaa, maa nyankɔ si.

¹⁵Ma si bɛrɛɛ kɛ la, n baran toa ma papaã li wa. Ma si maa baa zɔ́ɔbaa wolen la, ka mu zuzulu kɛ nɛ.

¹⁶N baran toa mu lɛ pàã la ma nɛ, a ma saa, a wo ma-n wa. N baran toa yala zuzulu kɛ ma kũ wa. N baran toa dɔn tán nə n lɛ tã ma ganaa wa.

¹⁷Dɛnaa Lawa, maa nyankɔ si, a giala, mà n kɔn-narɛɛ gole lɛ á siĩni. N bɔyaa, n nə n yɔrɔ da ma la, a kɔnpɛ ka n makara-doɛ̃ gole kɛ nɛ.

¹⁸Ma bɛ́ n din a dí-nyali lɛa, n baran n yii bɔ ma la wa. Man nɔmaa gɔ́ɔ̃ nɛ, maa nyankɔ si fufuu.

¹⁹Da ma li, n maa dɔmalɛ wole baa. Maa zɔ́ɔn bɛ́ ǹ tan ke, ma si ǹ la.

²⁰N tá doɛ̃, mà maǹ sɔ kiɛ ma la, ǹ nə́ ma puusə koe, ǹ nə́ sìi diɛ ma ganaa. N din yii tá maa zɔ́ɔn lɛn tumaa ganaa, n yɔrɔ-a.

²¹Sɔ ma foo ziziɛ̃, yǎa á busu baa ma ganaa. Man yii da, máa min kɔn tá re sii lɛ doɛ̃ ma la, sɛnɛ, màn kɔn. Man yii da ma foo-taãli la, sɛnɛ, ma min yɛ wa.

²² Bɛ̀ ma á màn bii, maǹ sèwò baraa kiɛ li, bɛ̀ ma á giɛ mu li, maǹ yɔ pipiã koe ma la.

²³ Ǹ dinin zɔ́n màn-biin die ǹ nə n baa kan lɛa ǹ ganaa, ǹ wúlu màn-biin nə ǹ giaáran dɔn gɛwaa.

²⁴Toa ǹ yiin nə tã, ǹ baran wɔlɔ yɛ wa, ǹ gɔ̀nɔn nə bìn da biikoo tumaa li.

²⁵N foo-yoo gisĩ ǹ la, toa n foo-yoo baraa kɛ dɔ ǹ ganaa.

²⁶ Toa ǹ giã ǹ bǎã ziziɛ̃, min din baran goã ǹ kionən ne wa.

²⁷A giala, mà n dɔlɔ bɔ min mɛn ganaa, maǹ fuu nyɛɛ bɛ nɛ. Maǹ màn diɛ n din a dɔlɔ bɔma-a wolen kɛn nɔmaa li.

²⁸Ǹ sãn lɛn tumaa nimi ǹ ni, n baran toa n sii sonbore kɔn dɔ ǹ ganaa doo wa.

²⁹ Ǹ tɔ tuturu, n bɔ yiikoonaabaa ǹ sɛ́wɔ kɛ nɛ. Ǹ tɔ baran goã kiɛ̃-n kun ka min peperen kɛn wɔ-n wa.

³⁰Masɛ fuu yɛ, má nɔmaa. Sɛnɛ, Lawa, n tá re ma kirisibiɛ, n ma bɔ sii ni.

³¹Ma á re boe la, ma Lawa tɔ bɔ ka loe ne, ma barka da nɛ, ma a guguru kɔ.

³²Bɛ din nə kɔɔ̃n Dɛnaa Lawa ganaa, á la dii ni, á la dii gɔ̀lɔ̀ gole ne.

³³Bɛ̀ fuu-yɛlen nə́ maa kirisibaa lɛ yɛ, ǹ tá re n nyɛnyɛɛ. Kasɛn mɛnɛn bɛ́ giɛ Lawa li, a die a kasɛn foo nyɛɛ[37].

³⁴A giala, mà Dɛnaa Lawa á doobaan nyankɔ sii. Bɛ̀ a din wɔn kɛn tá kòso-n, a ba sàn koe ǹ sii-n wa.

³⁵Lon mànan laanka tán wɔn nɛ, yìsi mu laanka a gɔ́ɔ̃gɔ́ɔ̃ ǹ mànan nɛ, ka Lawa tɔ bɔ.

³⁶A giala, mà Lawa á re Zeruzalɛmu kirisibiɛ, A wusoo a Zudaa gána a kiwin dɔ. Bɛa kiwin lɛn tá re a din a minin lɛn wɔn biɛ, ǹ wusoo ǹ giã ǹ nɛ doo.

³⁷A tá re Lawa din a dí-nyalin kɛn nɛnyaanan wɔn biɛ. Min mɛnɛn bɛ́ Dɛnaa Lawa narɛ, bɛn kionən tá re goɛ̃ ǹ nɛ.