Read Samo, Southern Loe 78 Bible Online

Loe 78 - Samo, Southern bible

Loe 78

¹ Asaafu a minin doroo ǹ loe n ke. Ma tɔrɔn lɛn, ka n too kɔ maa doroo ǹ boo li, ka n too naa ma lɛ gɔ́ɔ̃ ǹ boo li.

² Man die n lɛ buĩ ma boo giməə da, man die lɛlɛ siin pii ka nɛ.

³Wɔ bɛ́ wɔ́ màn mɛn ma, wɔ́ dɔ̃ dɔn, wɔ digolon nə màn mɛn pɛ wɔ nɛ,

⁴wɔ a re bɛ duri wɔ tɔrɔn la wa. Siin mɛnɛn bɛ́ Dɛnaa Lawa tɔ boe, a Pàãyiidɛnaabaa gɔ́ɔ̃ nɛ, a kaãbaa ǹ siin mɛnɛn zɛnaa, wɔ á re bɛn pii kiodɛnan manɛ.

⁵A na á sii zɛnaa ǹ gɔn koa a minin wɔ lɛa, á landa siin koa Izirayeli. Á pɛ wɔ digolon manɛ, mà ǹ nə ǹ nɛnyaanan daraa bɛa siin lɛn ganaa,

⁶ń giɛ min mɛnɛn bɛ́ re die ǹ kio, bɛn nə n daraa ǹ ganaa. Nɛnyaanan mɛnɛn bɛ́ re yii, bɛn dɔn nə yoo, ǹ na a laakalaa ǹ dinin nɛnyaanan manɛ.

⁷Ǹ pɛ ǹ nɛ mà ǹ nə n foo doa Lawa ganaa, ǹ yiri nyan bɔ ka a nya ǹ dí dadaran kɛn nɛ wa, ǹ na a dí-pɛn dɔn tamaa.

⁸Ǹ baran n baa ka ǹ digolon kɛn bɛ́ lɔn wa. Tɔrɔ too kaka-a, piã-wɔlen manɛ. Ǹ yiri n paa, ǹ ba n foo doɛ Lawa ganaa wa.

⁹Efrayimu minin kɛn, a laanɛ ǹsɛn nə́ goã zia biɛ ka kiɛ nɛ, ǹ nə́ n gòã da baa nɛ ziabaa pinaa.

¹⁰A giala, manə ǹ Lawa a lɛ kɔ kɔn la lɛ tamaa wa, ǹ nə́ n piã ǹ kɔ a landa lɛ wa.

¹¹Ǹ yiri bɔ ka a nya ǹ dí dadaran kɛn nɛ, a kaãbaa ǹ siin mɛnɛn nyaa ǹ nɛ, ǹ yiri bɔ ka bɛn nɛ.

¹² Lɛlɛ, Lawa na á kaãbaa ǹ siin kɛn zɛnaa wɔ digolon yii ni, Ezipti gána nɛ, Soan[49] bǎã kɛ li.

¹³ Á kɔ̀ mu yu kɔn màn paa, á toa ǹ nə́ kiɛ̃. Á mu lɛ sɔkɔn wɔlɔ paa ka tà-zuĩ ni.

¹⁴ Bɛ̀ lɛ̀ waa, a nə ǹ nyɛɛnaan boe ka labara nɛ, bɛ̀ wɔlɔ tii lɔn, a nə ǹ nyɛɛnaan boe ka tɛ fúlu ni.

¹⁵ Á gɛ̀fun yu kɔn don sa bii, á ǹ gɔ mu ni, ka mu mɛn bɛ́ boe mu yala gole ne.

¹⁶Á mu bɔ gɛ̀fu ni, bɛ pɛrɛn baa, á toa mu gigiã bɔ a nɛ ka tà nɛ.

¹⁷Bɛ tumaa kio, maǹ wusii bɛ̀ ǹ sii la Lawa la. Maǹ wusii bɛ̀ ǹ nə n gòãn dii Lon a Lawa Gole ganaa, bɛa diə gole kɛ lɛ nɛ.

¹⁸ Ǹ nə́ n da Lawa gɔ́ɔ̃ li woone, mà yǎa a ǹsɛn foo dùũ màn-bii koe ǹsɛn la.

¹⁹Ǹ nə́ boo baraa da Lawa ganaa, ǹ nə́ pɛ: Lawa á boe la a màn-bii kɔ wɔ la diə gole kɛ nɛ?

²⁰Sonbore ne, á gɛ̀fu dɛ, mu gigiã bɔ a nɛ. Sɛnɛ, á boe la a màn-bii dɔ kɔ wɔ la, a siĩ dɔ kɔ wɔ la?

²¹Dɛnaa Lawa bɛ́ a ná a minin lɛn lɛ ma boo diɛ miɛ̃, a foo yoo ǹ li, a foo yoo Izirayeli li ka tɛ nɛ.

²²A giala, ǹ nə n foo doa Lawa ganaa wa, ǹ waa la mà á re ǹsɛn kirisibiɛ wa.

²³Bɛ tumaa kio, á boo da ka lon a labaran nɛ, á lon lɛ bũ,

²⁴ á *maánə gisĩ ǹ la, á ǹ too ne, á lon a màn-bii lɛ kɔ ǹ la.

²⁵Didie lon a dia dí-a wolen màn bii. Lawa màn-bii kɔ ǹ la, ǹ nə́ bii ǹ nə́ kã.

²⁶Bɛ kio, á toa lɛ̀giala piɛ̃ kɛ bɔ lon, ka a din pàã nɛ, á daa ka gusin a lɛ̀ gùrù piɛ̃ kɛ nɛ.

²⁷Á siĩ gisĩ ǹ la, gigiã ka tán tii bɛ́ lɔn. Á bàanan gisĩ ǹ la, gigiã ka kɔ̀ mu li ǹ nyɔɔsɔ̃ bɛ́ lɔn.

²⁸A na á goã ǹ zuĩ ǹ giã ǹ bǎã lɛ nɛ, á ǹ kionən lɛnpɛnɛ nɛ.

²⁹Ǹ nə́ màn bii ǹ nə́ kã, màn mɛn lɛ sii bɛ́ ǹ ganaa, ǹ nə́ bɛ yɛ.

³⁰Sɛnɛ, ǹ tɔn bii ǹ nə́ kã bɔrɔ dinin wa, ǹ lɛ bɛ́ tɔn piɛ̃ nɛ ka màn-bii ni ǹ mɛn waáraa,

³¹Lawa a foo-busii yoo ǹ gialaa, á ǹ min kakan dɛ á ǹ bɔ ǹ bii, á Izirayeli a tɔntɔraan dɛ á ǹ kaa.

³²Haalɛ ka bɛ nɛ, maǹ nə́ goã tɔn sii baraa zɛnɛɛ, ǹ goã wɛɛ a kaãbaa sii zɛnaan kɛn la wa.

³³Bɛ lɛ nɛ, á ǹ tá kanaa a lɛawaan baa ka piɛ̃ nɛ, á ǹ tá kanaa a lɛ̀n ziziɛ̃ ka foo biɛ na ǹ siin ni.

³⁴Bɛ̀ Lawa nə́ ǹ goon nyin bɔ ǹ mɛn pinaa, gialakunun kɛn man doe ǹ dinin ganaa, ǹ wusoo ǹ wo Lawa li.

³⁵Ǹ yiri n gisĩ a nɛ mà Lawa nə ǹsɛn tamaali lɛa, mà Lon a Lawa Gole nə ǹsɛn zia gii dali lɛa.

³⁶Sɛnɛ, ǹ lɛ na á goã Lawa bebele, ǹ lɛwɔn na á goã soɛ boe ne.

³⁷Ǹ foo goã kun ka Lawa-n taãn wa, ǹ goã n foo doɛ a lɛ kɔ kɔn la ǹ boo kɛ ganaa wa.

³⁸Sɛnɛ, Lawa n makara doɛ̃ wole lɛa, a ǹ dɛ wa, a na á goã ǹ sãn toɛ ǹ nɛ. Biikoo gigiã, a n kirii a din foo la, a toa a foo yoo á la yii-n wa.

³⁹Lawa á doɛ̃ mà maǹ minbuiin nɛn lɛa, piɛ̃ kooro lɛa kiɛ̃, a na a wusii á die doo wa.

⁴⁰Ǹ nə́ n gòãn dii Dɛnaa Lawa ganaa gunyin gigiã, ǹ nə́ wɔ a lon don sa bii gunyin damata.

⁴¹Maǹ nə́ goã n diɛ Lawa gɔ́ɔ̃ li miɛ̃, ǹ nə́ goã Izirayeli a Lawa sonbore kɛ foo ziziɛ̃ ǹ sii zɛnɛɛ.

⁴²Ǹ yiri bɔ ka Lawa a boo sii la nɛ, a bɛ́ á ǹ si ǹ zɔ́ɔn la ǹ mɛn pinaa, ǹ yiri bɔ ka bɛ nɛ.

⁴³ Á sii a kɔnbɔn nyaa Ezipti minin manɛ, á kaãbaa ǹ sii kakan nyaa Soan minin manɛ.

⁴⁴ Á ǹ kɔ̀ mu bɔyaa á baa mà lɛa, á ǹ tà mu baa a lɛa, ń giɛ ǹ baran boo la ǹ mi wa.

⁴⁵ Á nyuunun dia ǹ la, bɛn nə́ sɔn dɔ ǹ ganaa. Á sɔmɔnɔn dia ǹ la, bɛn nə́ bɔ̀n da ǹ tán ganaa.

⁴⁶ Ǹ mànan mɛnɛn dù dɛ, á bɛn kɔ bisinin la, ǹ màn mɛn a dí nya, á bɛ kɔ bisinin la.

⁴⁷ Á ǹ too dan ziziɛ̃ ka la gii ni, á ǹ gɔ́rɔ dan ziziɛ̃ ka nyɛn nɛ.

⁴⁸Á toa la gii nə́ ǹ tɔɔ dadaran dɛ, la a paraa nə́ n tɔɔ bisinin dɛ.

⁴⁹A foo busu Ezipti minin kɛn li á la yii ni. A foo bɛ́ á yoo a là n kakaɛ̃, á daa bɔ̀n da ǹ ganaa[50].

⁵⁰A bɛ́ á zii kɔ a foo-busii la, a ǹ kanbaa gɛ̀ ganaa doo wa, á ǹ toa busu baraa gɔn.

⁵¹ Á Ezipti minin nɛgiĩ bibinaan tumaa dɛ, á ǹ gɔn binaa nɛgiĩn dɛ ǹ kionən tumaa nɛ.

⁵² Á ná a minin lɛn waa á ǹ bɔ Ezipti, á soo ǹ ne ka tɔɔ kuru bɛ́ lɔn, á mɛ ǹ nyɛɛnɛ ka sèren-lɛduə̃li bɛ́ lɔn, á woo ǹ ne don sa bii.

⁵³ Lawa nə́ ǹ nyɛɛnaan bɔ ka là nyantoro ne, sii kɔn ná a nyɛ́ɛ diɛ ǹ ganaa wa. Sɛnɛ, kɔ̀ mu nə́ n kɔ ǹ zɔ́ɔn lɛ.

⁵⁴ Á woo ǹ ne a din a bǎã sonbore kɛ nɛ, kele kɛ la, a din màn mɛn si ka a din pàã nɛ.

⁵⁵ Á tɔrɔ kɔsɔn loo á ǹ bɔ ǹ nyɛɛnɛ. Á bɛn bǎãn gii ǹ ni ǹ kíɛ̃ lɛa, á Izirayeli tɔrɔn kaa bɛn mɔnaa kionən ne.

⁵⁶ Bɛ tumaa kio, Izirayeli tɔrɔn nə́ n gòãn dii Lawa ganaa, ǹ nə́ n da Lon a Lawa Gole kɛ gɔ́ɔ̃ li, ǹ kɔ a da ǹ boon lɛ wa.

⁵⁷Ka ǹ digolon bɛ́ lɔn, ǹ nə́ n boɛ̃ ǹ nə n bɔ Lawa li, ǹ nə́ wusoo ka ǹ kio ne, min ba n foo doɛ ǹ ganaa wa. Maǹ ka sa biɛ bubunii bɛ́ lɔn.

⁵⁸Ǹ nə́ Lawa foo busu ka ǹ wúlu bɔ ǹ bǎãn kɛn nɛ, ǹ ná a foo yoo ka ǹ dìn kɛn nɛ.

⁵⁹Lawa bɛ́ á bɛ yɛ, a foo busu parsiini, á nɔmaa á n gɔn bɔ Izirayeli ganaa kəni ka lenlen.

⁶⁰ A giã ǹ bǎã ke Siiloo[51] kiwi, á bɛ toa walan, wɔ mɔnaa kion mɛn lɛ dɔ, a giã ǹ bǎã lɛa minin bii, á bɛ dɔ toa walan.

⁶¹ Goo sonbore ke, Lawa guguru kɔ ǹ bǎã nɛ, a din pàã kɛ laanka a gugurubaa kɛa sii a kɔnbɔ lɛa, á toa zɔ́ɔn nə́ daa bɛ saa, ǹ nə́ woo ne bɛ̀rɛbaa ǹ bǎã nɛ.

⁶²A foo yoo a minin lɛn li, á toa ǹ nə́ ǹ dɛ ka gɔya sa nɛ.

⁶³Zia nə́ ǹ tɔntɔraan bii, ǹ nɛlɔn kɛn, giĩn nə yɛ bɛn wɔ lɛa doo wa.

⁶⁴Ǹ Lawa a wúlu-bɔlen nə́ gɛ̀ kakaarɛ wɔ, ǹ lɔ giɔɔrɔn nə ǹ gɛ̀ wuu pɛ wa.

⁶⁵Bɛa biikoo li, ka min din bɛ́ yui nyuù-n lɔn, ka yɔ bɛ́ we min kaka yii-n lɔn, Dɛnaa yoo.

⁶⁶Á kɔ zɔ́ɔn kɛn kio lɛ á ǹ dɛ, á sìi da ǹ ganaa, sìi mɛn bɛ́ a nyɛɛ duduu wa.

⁶⁷Á n piã ka Zozɛfu tɔrɔn nɛ, a Zozɛfu a nɛ Efrayimu tɔrɔn bɔ wa.

⁶⁸Sɛnɛ, a na á Zudaa tɔrɔn bɔ. *Siɔn kele kɛ lɛ na á kɔɔ̃n kɔ a ganaa.

⁶⁹Á ná a Kion sonbore kɛ dɔ walan, sasa ka lon ne, a giala n doa-n ka tán nɛ, a na a tan yǎa duduu.

⁷⁰ A ná a bɛ̀rɛgiĩ Davida bɔ, a na á woo kũ sèren kion,

⁷¹á bɔ sèren kio á daa nɛ. Á baa a din a minin kɛn lɛduə̃li lɛa, á baa Izirayeli-lɛduə̃li lɛa.

⁷²Davida nə́ ǹ lɛduə̃ ka gɔ́ɔ̃ fubaa nɛ, á ǹ nyɛɛnaan bɔ ka gɔn sonbore ne.