Read Samo, Southern Loe 79 Bible Online

Loe 79 - Samo, Southern bible

Loe 79

¹ Asaafu a loe goon ne. Lawa! Tɔrɔ kɔsɔn nə́ daa n bǎã lɛ kũ, ǹ nə́ si. Ǹ nə́ *gɔ̀ lɔ n Guguru Kɔ ǹ Kion sonbore kɛ ganaa, ǹ nə́ Zeruzalɛmu yu, ǹ nə́ baa kɛbɔlɔ kooro lɛa.

²Ǹ nə́ n dí-nyalin geren kɔ zèwon la. Ǹ nə́ n din lɛ-silin siĩ kɔ don mànan la.

³Tɔrɔ kɔsɔn nə́ n din a minin mà kaa, á baa si tán. Ǹ nə́ bɛ zɛnaa, ǹ nə́ Zeruzalɛmu lɛnpɛnɛ nɛ, min kɔn nə ǹ gere bĩ wa.

⁴Wɔ á ke, wɔ miãkɛnɛn nə́ sɔ kiɛ wɔ la. Min mɛnɛn bɛ́ wɔ lɛnpɛnɛ, bɛn man wɔ diɛ yaa lɛa, ǹ nə́ wɔ pɔpɔsɛ.

⁵Dɛnaa Lawa, n foo-yoo kɛ n die goɛ̃ miɛ̃, a ná a nyɛɛ wa, yǎa biĩ doo? N kakaarɛ kɔ wɔ ganaa ke, á n wɔ kuĩ ka tɛ bɛ́ lɔn, bɛ dɔ n die goɛ̃ yǎa biĩ?

⁶Tɔrɔ kɔsɔn mɛnɛn bɛ́ ǹ ba n doɛ̃ wa, n foo-yoo kɛ kaa bɛn la. Gánan mɛnɛn bɛ́ ǹ ba n guguru koe wa, a kaa bɛn la.

⁷A giala, mà ǹ nə́ mɛnaa Izirayeli la, ǹ ná a mànan goa, ǹ ná a bǎã ziziɛ̃.

⁸Min mɛnɛn nə goã wɔ nyɛɛn lɛlɛ, n baran bɛn zɛ̀rɛn kɛn koa wɔ ganaa wa. Toa n makara bɔ wɔ ganaa fufuu, a giala, mà wɔ́ mɛnaa ka lenlen kəni.

⁹Wɔ kirisibaali Lawa, n dɔ wɔ lɛ, n din tɔ a golebaa a lɛa. Wɔ si sii la, n wɔa sii baraan tuturu, n din tɔ a gugurubaa a lɛa.

¹⁰Wàa na á baa, n tá toɛ tɔrɔ kɔsɔn nə́ pii kɛnɛn: Ǹ Lawa lɛ á maa? Toa ǹ dɔ̃ wɔ yii ni, mà gɛ̀ dòo bɔ tan, ǹ dɔ̃ mà ǹ bɛ́ ǹ nə́ n dí-nyalin mɛnɛn dɛ, mà n tá re bɛn dɛ kɛ a gɛ̀ dòo boe.

¹¹N too kɔ ka sonborebaa nɛ, kòso nɛn lɛ-dɛ kɛ li. N din pàã n gole, ǹ bɛ́ re min mɛnɛn dii, bɛn si gɛ̀ la.

¹²Dɛnaa, tɔrɔn mɛnɛn bɛ́ wɔ miãkɛnɛn lɛa, bɛn nə́ sɔ kɔ n ganaa. Bɛa sɔ kɛ lɛ a dòo a laman sɔbaa bɔ ǹ ganaa.

¹³Sɛnɛ, wɔsɛn mɛnɛn bɛ́ n din a zaman lɛa, wɔ n ka n tɔɔn bɛ́ lɔn, n din nə wɔ lɛduə̃li lɛa, wɔ á re boe la, wɔ n tɔ bɔ biikoo tumaa li, wɔ n gugurubaa laakalaa yǎa duduu.