Read Samo, Southern Loe 80 Bible Online

Loe 80 - Samo, Southern bible

Loe 80

¹Loe-saalin goledɛnaa loe mɛn lɔ tùtu wuu li. Yiri koa sii ni ǹ loe ne. Asaafu a loe goon ne.

² Izirayeli-lɛduə̃li, n too kɔ. N din mɛn bɛ́ miɛ̃ n zaman nyɛɛnɛ, n kii dankan nə lon màn yiikoonaan lalan, n din nyaa.

³N pàã bɔ wɔ yɔrɔ-a, wɔa tɔrɔn kɛn yɔrɔ-a, Efrayimu ni, Bɛnzamɛn nɛ, ka Manaasee ne. N pàã bɔ n da wɔ kirisibaa.

⁴Lawa, wusoo n barka wɔ wɔ nɛ, n wɔ kũ doɛ̃, wɔ á re kirisibiɛ.

⁵Dɛnaa Lawa, Pàãyiidɛnaa, ma n die goɛ̃ wɔa nyankɔn lɛ sii, ka foo-yoo ne miɛ̃ yǎa biĩ doo?

⁶Ma nə n din wɔn gɔ́ɔ̃ piɛ̃ ka foo-ziziɛ̃ nɛ, n nə́ wɔ yii mu diɛ bɔ ganaa, á liɛ yii ni.

⁷Ma n wɔ biɛ wɔ miãkɛnɛn liere kɔ kɔn-a ǹ mànan lɛa, wɔa zɔ́ɔn nə́ yaa we wɔ ganaa.

⁸Lawa Pàãyiidɛnaa, wusoo n barka wɔ wɔ nɛ, n wɔ kũ doɛ̃, wɔ á re kirisibiɛ.

⁹N din nə́ ń Izirayeli woɛ̃ Ezipti, ka da nɛ-kɔle bɛ́ lɔn, ń tɔrɔ kɔsɔn loo, ń wusoo ń zumu.

¹⁰Ń bǎã zɛnaa a nyɛɛnɛ, màn mɛn bɛ́ toɛ, a gòãn nə doa, a gána lɛ pã.

¹¹A wúlu na á goã n koe kelen lɛ, a gùrùn nə́ dii da sɔsɔrɔ tɔrɔ sonboren kɛn ganaa.

¹²A gùrù dadaran kɛn nə́ n nyɔmaa, yǎa Kɔ̀ Gole ganaa, a gùrù bisinin nə́ woo, yǎa Efrati tà ganaa.

¹³Wàa na á baa, ń ná a lɛnpɛnɛ ǹ màn kɛ toɛ̃, ń kaa, n nə́ toɛ kiɛ̃ zii la wolen tumaa á màn siɛ a nɛ?

¹⁴Don birii mɛn bɔ daã nɛ, bɛ n ziziɛ̃, don siĩn man die soɛ̃.

¹⁵Lawa Pàãyiidɛnaa, wusoo n daa kəni, sii mɛn bɛ́ n zɛnɛɛ, n toa lon, n ga n bɛ yɛ. N din sii kɔn zɛnaa, n da nɛ-kɔle kɛa lɛa.

¹⁶N din da giala mɛn wɔ tán ka n gɔn nɛ, bɛ tamaa, n din a zaman kɛ lɛ nɛ, n nɛgiĩ lɛa.

¹⁷Á ke, ǹ nə́ tɛ da a ganaa, ǹ nə́ kuru. N din bɛ́ re baraa mɛn zɛnɛɛ bɛa minin kɛn lɛn manɛ, toa ǹ papaã bɛ gɔ́ɔ̃ nɛ.

¹⁸N gɔn da minin kɛn la, giã nɛ n din gusin, a da n zaman kɛ la, a pàã n boe n din li.

¹⁹Bɛa yɔrɔ kɛ lɛ la, wɔ a re n wɔlɔ lui n din-a doo wa. N tá re toɛ wɔ yii goã koo, wɔ á re n din tɔ boe.

²⁰Dɛnaa Lawa, Pàãyiidɛnaa, wusoo n barka wɔ wɔ nɛ, n wɔ kũ doɛ̃, wɔ á re kirisibiɛ.