Read Samo, Southern Loe 86 Bible Online

Loe 86 - Samo, Southern bible

Loe 86

¹Davida a Lawa-nyankɔ goon ne. Dɛnaa Lawa, n too kɔ, n maa nyankɔ si, A giala, mà man nɔmaa-wɔle laanka doobaa lɛa.

²Ma tamaa yiikoonabaa gɔ́ɔ̃ nɛ, a giala, mà ma á n lɛ sii. N din bɛ́ n maa Lawa lɛa, masɛ nə n dí-nyali lɛa, ma foo n doa nɛ n ganaa, ma kirisibaa.

³Dɛnaa, makara bɔ ma ganaa. Man lɛ diɛ n din la baraabaraa.

⁴N din nə n dí-nyali foo kɔɔ̃n kɔ, a giala, mà ma yɔrɔ n dia nɛ n din la, Dɛnaa.

⁵Dɛnaa, n din mɛn bɛ́ bǐɛ̃ zɛnɛɛ, n nə́ sã toɛ, min mɛnɛn tumaa bɛ́ lɛ diɛ n la, n kɔn-narɛɛ á gole bɛn wɔ paǹ li.

⁶Dɛnaa Lawa, n too kɔ maa nyankɔ li. N too kɔ maa gòã-kũ diɛ kɛ li.

⁷Maa nɔmaa yɛ pinaa, man lɛ diɛ n la, ma n ma lɛ sii dɔn.

⁸Dɛnaa, n miã banban lawan bii wa. N bɛ́ dí mɛn nyɛɛ, a zɔɔ̃ kɔn-a banban.

⁹ Dɛnaa, n tɔrɔn mɛnɛn tumaa zɛnaa, bɛn tá re die kiɛ tán-a n yɔrɔ-a, ǹ nə n tɔ guguru kɔ.

¹⁰A giala, mà n tá gole, n tá kaãbaa ǹ siin zɛnɛɛ. N dinsɔɔ̃ n Lawa lɛa.

¹¹Dɛnaa Lawa, n zii nyaa ma nɛ, ma á re tɔ we, a kɔnpɛ ka n sonbore ne. Bɛ lɛ dinsɔɔ̃ da ma foo ne, màn mɛn bɛ́ toɛ, ma nyɛ́ɛ baa n tɔ kɛ nɛ.

¹²Maa Dɛnaa Lawa, man giɛ li ma n guguru kɔ, ka ma foo din tumaa nɛ, ma n tɔ guguru kɔ yǎa duduu.

¹³A giala, mà n kɔn-narɛɛ á gole maa wɔ paǹ li, ń ma si gɛ̀ a bǎã babaraa zuzulu kɛ la.

¹⁴Lawa, din-koalin nə́ yoo ma gialaa, min babaraan nə́ n lɛ kaa kun, ǹ nə́ giɛ maa gɛ̀ li, ǹ ba n yiri koɛ nsɛ Lawa din li wa.

¹⁵Sɛnɛ, Dɛnaa, nsɛ n Lawa lɛa, makara doɛ̃, n nə́ bǐɛ̃ zɛnɛɛ. N foo a yui fufuu wa, ma n piɛ̃-n ka kɔn-narɛɛ gole laanka bǐɛ̃ duduu ni.

¹⁶N bɔyaa, n nə n yɔrɔ dia ma la, n makara bɔ ma ganaa. N din nə n pàã kɛ kɔ n dí-nyali la, n nə n bɛ̀rɛlɔ a nɛgiĩ kɛ kirisibaa.

¹⁷Sii zɛnaa maa wɔ paǹ li, n nyaa foaãnɛ. Bɛa yɔrɔ kɛ lɛ la, sìi á re maa zɔ́ɔn kuĩ, bɛ̀ ǹ tá yii, mà n din Dɛnaa Lawa nə n doe ma lɛ, n tá ma foo taɛ̃.