Read Samo, Southern Loe 88 Bible Online

Loe 88 - Samo, Southern bible

Loe 88

¹ Loe. Koore a minin loe goon ne. Loe-saalin goledɛnaa loe mɛn lɔ. A nə n loe ka yɔrɔ-kɔsiɛ loe bɛ́ lɔn. Gùligiĩ Eman[55] a loe ne, a n daraa koe.

²Dɛnaa Lawa, ma kirisibaali Lawa. Penleen laanka tèlò ne, má n lɛ dɛ n din ganaa.

³Toa maa nyankɔ lɛ dɔ n din ganaa. N too kɔ maa busii li.

⁴Sonbore, nɔmaa ma gɔ̀nɔn bɔ, á goã boɛɛn nɛ ma gã.

⁵Min tumaa n giɛ ma ganaa gɔrɔ gere lɛa ma gòãn la, min mɛn bɛ́ ǹ ba boe la, ǹ sii kɔn bǐɛ̃ kɔ-n doo wa.

⁶Man kun ka geren ne, man kɔnboe ka geren kɛn nɛ, waa-n tán yala-n. N ba n yiri koɛ ǹ nɛ doo wa, n ba sii kɔn dɔ zɛnɛɛ ǹ lɛa doo wa.

⁷Ń ma da nyankɔrɔ gole zuzulu gɔ́ɔ̃ nɛ, gɛ̀ a wɔlɔ tì zuzulu kɛ li.

⁸N foo-yoo gisĩ ma la ka guĩ bɛ́ lɔn, a tumaa kaa ma la ka mu gole bɛ́ lɔn. *Doa

⁹Ń maa giaáran tumaa loo, n nə́ ǹ bɔ ma ganaa. Ń ma baa nyaǹ bɔ ma ganaa ǹ màn lɛa ǹ yɔrɔ-a. Ma á ke gɛwaa-n maa nɔmaa gɔ́ɔ̃ nɛ, soo ǹ lɛ ba ma la wa.

¹⁰Yɔrɔ-kɔsiɛ ma yiin pàã nya. Dɛnaa Lawa, ma nə n bíi baraabaraa, ma nə n gɔnɔn diɛ n din la.

¹¹N tá re kaãbaa ǹ sii zɛnɛɛ geren manɛ? Ǹ tá re wusii ǹ yoo, ǹ nə n tɔ bɔ?

¹²Geren lɛn tá boe la, ǹ nə n kɔn-narɛɛ gole kɛ pɛ ya? Hinlaa ǹ tá n bǐɛ̃ duduu kɛ boo diɛ geren piɛ?

¹³Gɛ̀ a wɔlɔ tì gole kɛ li, min tá màn doɛ̃ n kaãbaa ǹ sii gɔ́ɔ̃ nɛ, hinlaa yiri a bɔ sii tumaa nɛ ǹ gána kɛ nɛ, min tá boe la, a n peperebaa kɛ giala ma?

¹⁴Sɛnɛ, Dɛnaa Lawa, masɛ nə n lɛ dii n din ganaa. Baayɛlɛ gɔrɔ, má n maa nyankɔ koɛ n yɔrɔ-a.

¹⁵Dɛnaa Lawa, wàa na á baa, ń ma daa? Wàa na á baa, ń nə́ n yɔrɔ saa, ń bɔ ma la?

¹⁶A kũ maa nɛnyaanmaa ganaa, man doobaa lɛa, á goã boɛɛn nɛ ma gã. N nɔmaa mɛn da ma mìi ni, má n bɛ guĩ ka nyɛ́ɛ nɛ, á ma gɔ̀nɔn bɔ.

¹⁷N foo-yoon nə́ kiɛ̃ ma la, n yoo ma gialaa kakan kɛn nə́ ma pàã nya.

¹⁸Baraabaraa, maǹ yui kiɛ ma la, ka mu gole bɛ́ min mui lɔn. Ǹ nə́ ma lɛnpɛnɛ ma paǹ tumaa ganaa.

¹⁹Ń maa koakun wolen laanka maa giaáran tumaa loo, ń nə́ ǹ bɔ ma ganaa. Man ma dinsɔɔ̃ kanna wɔlɔ tì li.