Read Samo, Southern Loe 89 Bible Online

Loe 89 - Samo, Southern bible

Loe 89

¹Gùligiĩ Etan[56] a loe mɛn bɛ́ daraa koe.

²Man die Dɛnaa Lawa a bǐɛ̃baa dadaran kɛn loe loe lɛa, biikoo tumaa li. Man die n peperebaa kɛ laakalɛɛ yǎa duduu.

³Hiĩ, man pii: N bǐɛ̃ duduu kɛ n goɛ̃ miɛ̃. Lon gɔ́ɔ̃ nɛ, ń nə́ n peperebaa koa. N kɔn-narɛɛ gole kɛ dɔ giala n we-n ka kaka, ka lon bɛ́ lɔn.

⁴N din nə́ n pɛ kɛnɛn: Ma maa bɛ̀rɛgiĩ Davida mɛn bɔ, má lɛ kɔ kɔn la wɔ ka bɛ nɛ, má n liɛ nɛ, má pɛ:

⁵ Ma á re n din a min koɛ n kii dankan la, biikoo tumaa li. Man má n kii dankan lɛ koa, yǎa duduu wɔ lɛa. *Doa

⁶Dɛnaa Lawa, toa lon a dia dí-a wolen nə n tɔ bɔ, n kaãbaa ǹ siin zɛnaa a lɛa. Toa min sonbore zaman nə n peperebaa kɛ pɛ.

⁷Dɛnaa Lawa, die n ka n bɛ́ lɔn, lon gɔ́ɔ̃ nɛ? Die n kɔnboe ka Dɛnaa Lawa nɛ lawan bii?

⁸Lon a dia dí-a wolen lɛ-sɔkɔn bǎã nɛ, Lawa, n pàã gole kɛ á nyɛ́ɛ diɛ parsiini, n pàã á gole, á nyɛ́ɛ diɛ á la n lɛnpɛnɛɛ wolen kɛn tumaa nɛ.

⁹Dɛnaa Lawa, Lawa Pàãyiidɛnaa, die n kaka ka n bɛ́ lɔn, Dɛnaa Lawa? N din nə pepere sii tumaa gɔ́ɔ̃ nɛ.

¹⁰N din nə boe yìsi mu la, n tá kuĩ, bɛ̀ a mu á yui, n din na a kala wɛɛ.

¹¹N din nə ń Rahabu[57] gegere kɛ fɔ̃, n ná a gere yɔyɔrɛ, ń nə́ n zɔ́ɔn sasawaa ka n din pàã kɛ nɛ.

¹²Lon nə n din wɔ lɛa, tán dɔ nə n din wɔ lɛa. N din nə ń kanaa laanka a gɔ́ɔ̃ mànan giala wɔ.

¹³N din nə ń gɔsɛ laanka gusin a lɛ̀gɔn zɛnaa. Tabɔɔrɔ laanka Ɛrmɔn kelen maǹ nə́ n din para pii.

¹⁴N din nə kaka, n din nə kaka taãn-taãnɛ, pàã tumaa nə́ n lon.

¹⁵N kiibaa lɛ giala n we-n peperebaa la, a giala n we-n dí-pɛn tamaa dɔ la. Kɔn-narɛɛ laanka biɛ̃ duduu nə n din lon, sii tumaa gɔ́ɔ̃ nɛ.

¹⁶Tɔrɔ mɛn bɛ́ n tɔ boe doɛ̃, bɛ wɔ á re bǐɛ̃ koe. A n die tɔ we wɔlɔ fúlu li, Dɛnaa Lawa din yɔrɔ-a.

¹⁷A minin man die bɛ̀ biɛ baraabaraa, nyɛnyɛɛ gɔn n din a lɛa, maǹ die yui ǹ golee, n din a peperebaa la.

¹⁸Sonbore, n din nə ǹ pàã gole lɛa, n din a bǐɛ̃ zɛnaa lɛ n wɔ mìi siɛ lon.

¹⁹Dɛnaa Lawa, n din nə ń wɔ tamaali kɛ kɔ wɔ la, Izirayeli a Lawa sonbore, n din nə ń kii kɛ koa wɔ mìi la.

²⁰Ǹ kɔn pinaa, ń nə́ n din nyaa, ń boo da n lɛ-silin man kɛnɛn: Má n dɔ giĩ foo taãnaa kɔn lɛ, má tɔntɔraa goon mìi saa lon, maa zaman lɛ bii.

²¹Man má maa bɛ̀rɛgiĩ Davida yɛ, má bɔ má koa kii lɛa, ka maa nyɔɔ sonbore kɛ nɛ.

²²Man die n doe lɛ ka ma din gɔn kaka kɛ nɛ, ma din pàã kɛ n die biɛ min kaka lɛa.

²³Zɔ́ɔ a re boe la, a da kaa la wa, piã wole a re boe la, a na a puusə kɔ wa.

²⁴A giala, mà ma á re a zɔ́ɔn tuturi a nyɛɛnɛ, ma á re a baa zɔ́ɔbaa wolen dii.

²⁵Maa kɔn-narɛɛ gole laanka maa bǐɛ̃ duduu kɛ á re goɛ̃ kun ni, ma din nə die a pàã gole koe.

²⁶Ma á re pàã koe la yìsi mu la, ma á re koe la tàn dɔn la.

²⁷A n die ma bíi kɛnɛn: Maa Díi! Maa Lawa! Ma kirisibaa ǹ kele!

²⁸ Masɛ dɔ n die a dɔ biɛ maa nɛgiĩ gole lɛa, kii lɛa, á n gole á la kanaa a kiin manɛ.

²⁹Maa kɔn-narɛɛ gole kɛ n die goɛ̃ a wɔ lɛa yǎa duduu, maa lɛ kɔ kɔn la lɛ dɔ n die goɛ̃ kɔn ka a din ni.

³⁰Ma á re min koɛ a kii dankan la biikoo tumaa li, a kiibaa lɛ á re beleboe ka lon bɛ́ lɔn.

³¹Bɛ̀ a nɛnyaanan nə́ n wɔlɔ lui maa landa boon ganaa, ǹ nə́ ǹ ba koe maa sii yɔrɔ bɔ ǹ boon kɛn lɛ wa,

³²bɛ̀ ǹ nə́ maa gɔn waaman boon kɛn tii, ǹ nə́ ǹ ba maa dí-pɛn kɛn tamaɛ wa,

³³ma á re bàlà siɛ, ma ǹ lɛ-tii lɛ a dɔlɔ bɔ nɛ, ma á re ǹ dii ma ǹ doroo, ǹ sãn lɛn lɛa.

³⁴Sɛnɛ, ma bɛ́ kɔn-narɛɛ gole mɛn zɛnɛɛ Davida nɛ, ma a re bɛ sàabiɛ a wɔ paǹ li wa. Ma a re wusii maa lɛ kɔ kɔn la kɛ dɔ kio wa.

³⁵Ma a re maa lɛ kɔ kɔn la kɛ niɛ̃, ma bɔ kɔn wa, boo mɛn bɔ ma din lɛ-n, ma a re bɛ bɔyɛɛ wa.

³⁶Man má bɛa liɛ kɛ lɛ wɔ, gunyin goon toto, má koa ma din Lawa a siĩnbaa kɛ la. A na a tan yǎa duduu, ma a re Davida bebele wa.

³⁷A din tɔrɔ n die goɛ̃ a kii dankan la biikoo tumaa li. A kiibaa lɛ n die goɛ̃ ma yɔrɔ-a, a belebɔ ka wasa bɛ́ lɔn,

³⁸ka mui dɔ bɛ́ lɔn, a ná a tan duduu, a bǎã nɛ, siére sonbore lɛa, labaran kio. Doa

³⁹Sɛnɛ, n din kii mɛn bɔ, ń koa, táa n din foo na á yoo bɛ lɛ li kanna, ń daa, ń tii.

⁴⁰N din lɛ kɔ kɔn la mɛn wɔ ka n bɛ̀rɛgiĩ ni, ń nə́ n piã ka bɛa lɛ kɔ kɔn la lɛ nɛ, ń ná a kii bafolo zũ tán, ń baa màn kooro lɛa.

⁴¹Ń ná a lɛduə̃ ǹ kungɔnun tumaa yiɛ, ń nə́ ǹ kaa a nɛ, ń ná a bǎã kakan tumaa baa kɛbɔlɔn lɛa.

⁴²Kiɛ̃ wolen tumaa n màn siɛ a nɛ, á ke, ǹ miãkɛnɛn tumaa ná a tɔ ziziɛ̃.

⁴³Ń pàã kɔ a zɔ́ɔn la, ń ná a zɔ́ɔn lɛn tumaa foo kɔɔ̃n kɔ.

⁴⁴Haalɛ, ń ná a ziabaa ǹ mànan lɛn ziziɛ̃ dinin, n nə n dɔ lɛ zia lɛ gɔ́ɔ̃-n wa.

⁴⁵Ń ná a kiibaa ǹ zín kɛ si la, ń ná a kii dankan lɛ kuməə tán.

⁴⁶Ń ná a tɔntɔraabaa biikoo kunun kɔ, ń sìi da a ganaa parsiini. Doa

⁴⁷Dɛnaa Lawa, ma n die n duri miɛ̃, yǎa biĩ doo? N foo n die goɛ̃ yoo-n miɛ̃, yǎa biĩ doo?

⁴⁸N yiri koa ma nɛ. Minbuiin nɛ nyin lɛ á kunu, á la yii ni. Ka n pɛ, mà ma nə n zɛnaa papaã taman yii!

⁴⁹Minbuiin nɛ mɛn nə die goɛ̃ kanaa, a ná a ba gɛ̃ doɛ̃ wa, á n die n sii geren piɛ a kòso kɛ la? Min kɔn.

⁵⁰Dɛnaa, n lɛlɛ a kɔn-narɛɛ gole kɛ lɛ n maa dɔn? N goã, n nə́ n lɛ kɔ Davida la, ka n bǐɛ̃ duduu mɛn nɛ, bɛ dɔ á maa dɔn?

⁵¹Dɛnaa, n yiri kɔ n bɛ̀rɛgiĩn kɛn nɛ, ǹ nə́ sɔ kiɛ ǹ la, n yiri kɔ n din a zaman kɛ tumaa nɛ, ń ma koa a mìi la.

⁵²Dɛnaa Lawa, n zɔ́ɔn nə́ sɔ kaa la. N din nə kii mɛn bɔ ń koa, maǹ bɛ dɔ puusə koe.

⁵³Barka tá Dɛnaa Lawa Lawa ganaa, yǎa duduu. A n miɛ̃! A n miɛ̃!